کوئٹہ : مغربی بائی پاس رئیسانی ٹاؤن کے مقام پر لوڈر رکشا اور بس میں تصادم کے نتیجے میں پانچ افراد جاں بحق اور آٹھ زخمی ہوگئے۔
تفصیلات کے مطابق کوئٹہ میں مغرب بائی پاس کے قریب پٹرول کے ڈرموں سے بھری بس اور رکشے کے درمیان تصادم ہوا ، جس کے نتیجے میں کم از کم 5 مسافر جاں بحق اور 7 زخمی ہوگئے۔
پولیس نے بتایا کہ واقعہ کلی رئیسانی کے علاقے میں اس وقت پیش آیا، جب پیٹرول کے ڈرموں سے لدا ایک لوڈر رکشہ مقامی مسافر بس کے عقب سے ٹکرا گیا جس سے بس میں آگ بھڑک اٹھی اور آگ تیزی سے پھیل گئی، جس سے بہت سے مسافر اندر پھنس گئے۔
واقعے کی اطلاع ملتے ہی ریسکیو ٹیمیں فوری طور پر جائے وقوعہ پر پہنچیں اور جاں بحق اور زخمیوں کو قریبی اسپتال منتقل کیا۔
پولیس نے واقعے کی ایف آئی آر درج کرکے تحقیقات شروع کردی ہے۔
ترجمان بلوچستان حکومت شاہد رند کی جانب سے بیان میں کہا گیا ہے کہ مسافربس آتشزدگی واقعےکی تحقیقات شروع کردی گئیں، ذمہ داروں کے خلاف سخت کارروائی عمل میں لائی جائے گی، متاثرہ خاندانوں کی ہر ممکن مددو معاونت کی جائے گی، زخمیوں کو بہترین طبی امداد فراہم کی جا رہی ہے۔
یاد ہرہے گذشتہ ہفتے کوئٹہ جانے والی مسافر ٹرین ٹیکسلا میں مارگلہ ٹنل کے قریب پٹری سے اتر گئی تھی ، جس کے باعث راولپنڈی پشاور سیکشن کے درمیان ریلوے ٹریفک معطل ہو گئی تاہم خوش قسمتی سے حادثے میں کوئی جانی نقصان نہیں ہوا۔
واقعے کے فوراً بعد مقامی پولیس، ریلوے پولیس اور ریلوے مینٹیننس ڈیپارٹمنٹ کے اعلیٰ حکام جائے وقوعہ پر پہنچ گئے تاکہ واقعے کی تحقیقات کی جا سکیں اور مین ٹریک پر بحالی کا کام شروع کیا جا سکے۔
