Tag: مقام ابراہیم

فرزندانِ توحید کے لیے مقامِ ابراہیم اجنبی نہیں ہے۔ مکہ مکرّمہ کی مسجدِ حرام میں‌ داخل ہونے والے اس کے صحن میں‌ موجود اس مخصوص جگہ کی زیارت کرتے ہیں۔

مسجدِ حرام میں اس مقام پر ایک اونچا سنہری جار نصب ہے جس کے اندر ایک پتھر پر پیروں کے دو نشان دیکھے جاسکتے ہیں۔ اس پتھر کو ‘حجرِ اسماعیل’ بھی کہا جاتا ہے۔

کہا جاتا ہے کہ یہ وہ پتّھر ہے جس پر حضرت ابراہیم علیہ السلام نے اپنے قدم رکھ کر کعبے کی دیواریں چنی تھیں۔ اسی زمانے کی یہ عظیم یادگار سنہری جار میں‌ محفوظ ہے اور حضرت ابراہیم کے قدم مبارک کے نشانات پر پیتل کا خول چڑھا دیا گیا ہے۔

مقامِ ابراہیم زمین سے کچھ بلند ہے اور اس پر گنبد موجود ہے جو چار ستونوں پر کھڑا ہے۔ اسی کے اندر وہ پتّھر موجود ہے جس پر پائوں کے نشانات ہیں۔ ان چاروں ستونوں کے ساتھ چار آہنی دریچے بنائے گئے ہیں، دو ستونوں پر گنبد ہے۔ گنبد کے اندر سونے کے پانی سے آیات اور مقدس عبارات منقش ہیں۔

مقامِ ابراہیم کے اس گنبد کی کئی بار تزئین اور مرمت کی جاچکی ہے۔ شاہ فیصل بن عبدالعزیز نے مقامِ ابراہیم پر لگا عارضی پردہ ہٹا کر یہاں‌ کرسٹل کی شکل میں‌ گنبد کا اضافہ کیا۔ اسی طرح شاہ فہد بن عبدالعزیز نے مقامِ ابراہیم کا پورا ڈھانچہ دھاتوں سے تیار کرایا اور اس کی تیاری میں اعلیٰ معیار کا تانبا استعمال کیا گیا۔ اس کے اندرنی حصّے میں سنہرے پانی سے تیار دریچہ نصب کیا گیا جب کہ اس مقام کے فرش پر سیاہ گرینائٹ کی جگہ سنگِ مرمر لگایا گیا۔

مقامِ ابراہیم کے گنبد کا خالص وزن 1 کلو 750 گرام ہے اور اونچائی ایک اعشاریہ 30 میٹر ہے۔ اس کا زیریں قطر 40 اور بالائی حصّے سے 20 سینٹری میٹر ہے۔

مقامِ ابراہیم کو منور اور معطّر رکھنے کے لیے خصوصی انتظامات کیے گئے ہیں اور اس پتّھر کو محفوظ کرکے خانہ کعبہ کے معمار اوّل کی یاد کو محفوظ کیا ہے۔

حضرت ابراہیم علیہ السلام کی بود و باش حلب کی تھی۔ آپ کے پاس بہت سی بکریاں تھیں۔

فقرا و مساکین اور آنے جانے والوں کو آپ انہی بکریوں کا دودھ پلاتے اور ان کی تواضع کرتے تھے۔ آپ کے اس عمل کا شہرہ اتنا ہوا کہ جب لوگ اس شہر میں داخل ہوتے تو دریافت کرتے کہ حلبِ ابراہیم کہاں تقسیم ہوتا ہے۔

یہ شہر دنیا کے ان نامی اور مشہور شہروں میں سے ہے جو حسنِ وضع اور اتقانِ ترتیب میں بے مثل ہیں۔ بازاروں کی نہایت مناسب وسعت اور ایک بازار کا دوسرے بازار سے ایسا سلسلہ ہے کہ شاید و باید۔ اس کے تمام بازار مسقف اور چھتیں لکڑی کی ہیں۔ دکان دار راحت سے سودا کرتے ہیں۔ یہ ابن بطوطہ کے سفر نامے سے چند سطور ہیں جو انھوں نے شام کے قدیم شہر حلب میں قیام کے دوران تحریر کی تھیں۔

آج یہ شہر کھنڈر بن چکا ہے۔ شام میں جنگ کے آغاز سے پہلے اس قدیم شہر کی آبادی بیس لاکھ سے زائد تھی، مگر اب یہاں چند لاکھ ہی خاندان کسی طرح زندگی کے دن پورے کررہے ہیں۔

شام کے شمال مغرب میں یہ شہر قدیم زمانے میں ایک بڑا تجارتی مرکز اور اہم گزر گاہ رہا ہے۔ کہتے ہیں بغداد میں تجارت کی غرض سے جانے والے قافلے اسی راستے سے گزرا کرتے تھے۔ اس پر مختلف ادوار میں حملے ہوئے۔ کبھی یہاں کے باشندے بازنطینی حکم رانوں کے تابع ہوئے، کبھی عربوں، سلجوق ترک اور کبھی اسے ہلاکو خان اور امیر تیمور کے لشکر کا سامنا کرنا پڑا۔ کسی زمانے میں یہاں کا آئینہ بہت مشہور تھا۔

ہزاروں سال پرانے اس شہر میں کئی تاریخی مقامات، آثار اور یادگاریں تھیں جو اس جنگ کے دوران برباد ہو گئیں۔ تاریخی حوالوں کے مطابق اسی شہر کو ایک زمانے میں حلبِ ابراہیم بھی کہا جاتا تھا اور یہ نام حضرت ابراہیم علیہ السلام کا بکریوں کے دودھ سے لوگوں کی تواضع کرنے کی وجہ سے پڑا تھا۔