تل ابیب : مقبوضہ بیت المقدس کے اطراف بسائی ناجائز یہودی بستیوں کو خوفناک آگ نے گھیر لیا، جس سے پانچ ہزار ایکٹر سے زائد رقبہ جل کر خاکستر ہو گیا۔
تفصیلات کے مطابق اسرائیل میں مقبوضہ بیت المقدس کےقریب جنگلات میں خوفناک آگ بھڑک اٹھی، جسے دہائی کی سب سے بڑی آگ قرار دیا جارہا ہے۔
آتشزدگی میں تئیس افراد زخمی ہوئے جبکہ پانچ ہزار ایکٹر سے زائد رقبہ جل کر خاکستر ہو گیا۔
آگ مغربی پہاڑوں پر جنگلات میں پانچ مقامات پر لگی اور دیکھتے ہی دیکھتے شاہراہوں تک پہنچ گئی، جس کے بعد مقبوضہ بیت المقدس اور تل ابیب کےدرمیان شاہراہ کو بند کردیا گیا ہے۔
تل ابیب کے قریب اور گردونواح میں بھی شعلے اور دھویں کے بادل پھیل گئے، اسرائیلی میڈیا کا کہنا ہے آگ سے جھلس کر تیرہ افراد زخمی ہوئے۔
اسرائیلی حکام نے ایمرجنسی نافذ کرتے ہوئے لوگوں کو انخلاءکی ہدایات جاری کردیں۔
صہیونی حکومت نے ملک میں ایمرجنسی کا اعلان کرتے ہوئےآگ پرقابو پانے کےلیےعالمی برادری سےمدد مانگ لی۔
فرانسیسی میڈیا کے مطابق مقبوضہ بیت المقدس کے قریب جنگلات میں لگنے والی آگ کے باعث اسرائیلی وزیر اعظم نیتن یاہو نے قومی ایمرجنسی کا اعلان کرتے ہوئے خبردار کیا کہ آگ مقبوضہ بیت المقدس تک پہنچ سکتی ہے۔
