ARYNews.tv | Urdu – Har Lamha Bakhabar

Tag: مقبوضہ کشمیر

  • ضلع اسلام آباد میں بھارتی فورسز کی گھر پر اندھا دھند فائرنگ، 2 کشمیری شہید

    ضلع اسلام آباد میں بھارتی فورسز کی گھر پر اندھا دھند فائرنگ، 2 کشمیری شہید

    سرینگر: مقبوضہ کشمیر کے ضلع اسلام آباد میں بھارتی فورسز کی ایک گھر پر اندھا دھند فائرنگ سے 2 کشمیری شہید ہو گئے۔

    تفصیلات کے مطابق مقبوضہ وادئ کشمیر میں بھارتی فوج کی ریاستی دہشت گردی نہ رُکی، جنت نظیر وادی کے ضلع اسلام آباد کے علاقے پوشکریری میں قابض بھارتی فوج نے نام نہاد سرچ آپریشن کی آڑ میں ایک گھر پر اندھا دھند فائرنگ کر دی۔

    فائرنگ کے نتیجے میں دو کشمیری نوجوان شہید ہو گئے، بھارتی فوج نے انسانی حقوق کی سنگین خلاف ورزی کرتے ہوئے لاشیں لواحقین کے حوالے کرنے سے انکار کر دیا۔

    کشمیر میڈیا سروس کے مطابق نوجوانوں کے والدین اپنے پیاروں کی لاشوں کے لیے در در کی ٹھوکریں کھانے پر مجبور ہیں۔

    سرچ آپریشن کے دوران قابض فورسز نے داخلی اور خارجی راستوں کو بند کر دیا تھا، گھر گھر تلاشی کے دوران خواتین کے ساتھ بدتمیزی کی گئی اور بزرگوں تک کو ہراساں کیا گیا۔

    وادی میں انٹرنیٹ اور موبائل سروسز بھی بند کر دی گئیں، شوپیاں، پلوامہ، اور بارہ مولا میں بھی حالات انتہائی کشیدہ ہیں۔

  • یوم دفاع پاکستان : مقبوضہ کشمیر میں شہید لیفٹیننٹ جنرل سرفرازعلی کی تصاویر آویزاں

    یوم دفاع پاکستان : مقبوضہ کشمیر میں شہید لیفٹیننٹ جنرل سرفرازعلی کی تصاویر آویزاں

    یوم دفاع :‌ مقبوضہ کشمیر میں یوم دفاع کے موقع پر کشمیریوں نے شہید لیفٹیننٹ جنرل سرفرازعلی کی تصاویر آویزاں کردیں۔

    تفصیلات کے مطابق یوم دفاع پاکستان کے موقع پر مقبوضہ کشمیرمیں پوسٹرز چسپاں کردیئے گئے۔

    حریت رہنماعبدالحمید لون نے بتایا کہ کشمیریوں نے سڑکوں اور راستوں پرپوسٹرزآویزاں کردیئے ہیں ، مقبوضہ کشمیر کے مختلف علاقوں میں شہدا کو خراج عقیدت پیش کیا گیا۔

    حریت رہنما نے کہا کہ پوسٹرزمیں شہید لیفٹیننٹ جنرل سرفرازعلی کی تصاویربھی موجودہیں، سری نگر،پلوامہ،بڈگام اوروادی کے دیگرعلاقوں میں پوسٹرز چسپاں کئے گئے ہیں۔

    ان کا کہنا تھا کہ وادی کے مختلف علاقوں میں بھارتی قابض افواج نے پکڑ دھکڑ شروع کردی ہے۔

    عبدالحمید لون نے کہا کہ پاکستان کرکٹ ٹیم کی جیت کےبعدکشمیریوں نےجشن منایاتھا، نوجوانوں نےپاکستان کی جیت کے بعد آزادی اورپاکستان کے نعرے بلند کیے تھے۔

    حریت رہنما نے بتایا کہ بھارتی افوج ویڈیوزمیں نظرآنے والے نوجوانوں کے گھروں پر چھاپے مار رہی ہے۔

  • بھارت کیخلاف پاکستان کی جیت : مقبوضہ کشمیرمیں بھی جشن کا سماں

    بھارت کیخلاف پاکستان کی جیت : مقبوضہ کشمیرمیں بھی جشن کا سماں

    سری نگر : بھارت کیخلاف پاکستان کی جیت پر مقبوضہ کشمیر میں بھی جشن منایا، نوجوانوں نے پاکستان زندہ باد کے نعرے لگائے۔

    سیکریٹری جنرل کل جماعتی حریت کانفرنس شیخ عبدالمتین نے اپنے بیان میں کہا کہ بھارت کیخلاف پاکستان کی جیت پر سرینگر میں جشن منایا جارہا ہے، پاکستان کی جیت پر کشمیری نوجوانوں نے پاکستان زندہ باد کے نعرے لگائے اور مٹھائیاں تقسیم کیں۔

    شیخ عبدالمتین کا کہنا تھا کہ کشمیریوں کے دل پاکستان کے ساتھ دھڑکتے ہیں، کشمیر کا بچہ بچہ پاکستان کی جیت پر خوشی منا رہا ہے، کشمیریوں نے ثابت کردیا کہ وہ بھارت کے ساتھ نہیں رہنا چاہتے۔

    حریت رہنما عبدالحمید لون نے پاکستان کرکٹ ٹیم کی جیت پر قوم کو مبارکباد دیتے ہوئے کہا کہ بھارتی حکومت نے مقبوضہ کشمیر میں انٹرنیٹ کو معطل کردیا لیکن کشمیریوں کے دلوں سے پاکستان کی محبت کو ختم نہیں کیا جاسکتا۔

    حریت رہنما یاسین ملک کی اہلیہ مشعال ملک نے بھی پاکستان کرکٹ ٹیم کی جیت پر قوم کو مبارکباد دیتے ہوئے کہا مقبوضہ کشمیر میں پاکستان کی جیت پر جشن کا سماں ہے۔

    خیال رہے کہ پاکستان نے بھارت کو میچ میں شکست دے کر دبئی کا حساب دبئی میں ہی چُکا کر دیا۔ قومی ٹیم نے حریف کو 5 وکٹوں سے ہرایا۔ ٹیم نے 182 رنز کا ہدف آخری اوور میں پورا کیا۔

    محمد رضوان نے 71 رنز کی شاندار اننگز کھیلی، محمد نواز نے 20 گیندوں پر جارحانہ 42 رنز بنائے۔ بھارت نے پہلے کھیل کر 7 وکٹوں پر 181 رنز اسکور کیے۔ کوہلی نے 60، راہول اور روہت نے 28، 28 رنز بنائے۔ اس دوران شاداب نے 2، نواز، حارث، نسیم اور حسنین نے 1، 1 وکٹ حاصل کی۔

  • بھارتی فورسز کی فائرنگ سے 3 کشمیری شہید

    بھارتی فورسز کی فائرنگ سے 3 کشمیری شہید

    بارہ مولا: مقبوضہ کشمیر میں بھارتی فورسز کی فائرنگ سے مزید 3 کشمیری شہید ہو گئے۔

    تفصیلات کے مطابق جموں و کشمیر میں قابض بھارتی فورسز کی ریاستی دہشت گری کا سلسلہ جاری ہے، قابض فوج نے ضلع بارہ مولا کے قصبے اڑی میں فائرنگ کر کے تین کشمیریوں کو شہید کر دیا۔

    علاقے میں موبائل اور انٹرنیٹ سروس بند ہے اور گھر گھر سرچ آپریشن جاری ہے۔

    کشمیر میڈیا سروس کے مطابق قابض فوجیوں نے کشمیری نوجوانوں کو بارہ مولا کے اڑی سیکٹر میں جعلی مقابلے میں گولی مار کر شہید کیا۔

    جموں و کشمیر میں ماورائے عدالت قتل اور جعلی مقابلے بھارتی فوجیوں کا معمول بن چکے ہیں، فوجی نہتے کشمیری نوجوانوں کو ان کے گھروں سے اٹھاتے ہیں، انھیں لائن آف کنٹرول کے قریب لے جاتے ہیں اور جعلی مقابلے میں شہید کر دیتے ہیں۔

    کشمیر میڈیا سروس کے مطابق بھارتی فوج کشمیریوں کی جدوجہد آزادی اور پاکستان کو بدنام کرنے کے لیے شہید نوجوانوں کو پاکستانی عسکریت پسند قرار دے دیتی ہے۔

    2000 کے پتھری بل فرضی انکاؤنٹر اور 2010 کے مچل فرضی انکاؤنٹر کے واقعات بھارتی فوج کے اس گھناؤنے عمل کی واضح مثالیں ہیں۔ ضلع اننت ناگ میں پتھری بل جعلی مقابلے نے جموں و کشمیر کو ہلا کر رکھ دیا تھا، اس کیس کو بھارتی فوج نے تقریباً 14 سال بعد بند کر دیا۔

    سی بی آئی نے 2006 میں جعلی مقابلے میں 5 فوجیوں کو قصور وار ٹھہرایا، سی بی آئی نے تحقیقات کے بعد کہا کہ ساتویں راشٹریہ رائفلز کے افسران بریگیڈیر اجے سکسینہ، لیفٹیننٹ کرنل برہیندر پرتاپ سنگھ، میجر سوربھ شرما، میجر امیت سکسینہ اور صوبیدار ادریس خاں نے جعلی مقابلے کا ڈراما رچاتے ہوئے 5 بے قصور شہریوں کو جنوبی کشمیر میں چٹی سنگھ پورہ میں سکھوں پر حملے میں ملوث دہشت گرد قرار دیتے ہوئے گولیاں ماریں۔

  • مقبوضہ کشمیر: چند ماہ میں 25 لاکھ نئے ہندو ووٹرز کے اندراج کا بھارتی منصوبہ

    مقبوضہ کشمیر: چند ماہ میں 25 لاکھ نئے ہندو ووٹرز کے اندراج کا بھارتی منصوبہ

    سرینگر: مقبوضہ جموں و کشمیر میں چند ماہ میں 25 لاکھ نئے ہندو ووٹرز کے اندراج کا بھارتی منصوبہ سامنے آ گیا ہے۔

    تفصیلات کے مطابق مقبوضہ کشمیر میں مسلم اکثریت کو اقلیت میں بدلنے کا بھارتی گھناؤنا منصوبہ تیزی سے آگے بڑھ رہا ہے، بھارتی حکومت غیر قانونی زیرِ قبضہ جموں و کشمیر میں 25 لاکھ نئے ہندو ووٹرز کا اندراج کرے گی۔

    بھارت نے مقبوضہ کشمیر میں کھلے عام آبادیاتی تبدیلی اور آباد کاری کے منصوبوں کا اعلان شروع کر دیا، جموں و کشمیر کے چیف الیکٹورل آفیسر ہردیش کمار کے مطابق نومبر میں ہونے والے مقامی انتخابات سے قبل خطے میں 20 لاکھ سے زیادہ نئے رائے دہندگان کا اندراج متوقع ہے۔

    اس کے بعد ہندو ووٹروں کی کُل تعداد ایک تہائی سے زائد ہو جائے گی، اس وقت خطے کے موجودہ ووٹرز 76 لاکھ ہیں۔

    فاشسٹ مودی نے 2019 میں مقبوضہ وادی کی نیم خود مختاری چھینی تھی اورغیر کشمیریوں کو ووٹ ڈالنے اور وہاں زمین رکھنے یا خریدنے کی اجازت دینے کے لیے وفاقی آئین میں ترمیم کی تھی۔

    اب بھارتی حکومت کی نئی اسکیم سے ہندو مقبوضہ کشمیر میں جائیداد خرید سکیں گے۔

  • مقبوضہ کشمیر میں بھی کئی مقامات پر پاکستانی پرچم لہرائے گئے

    مقبوضہ کشمیر میں بھی کئی مقامات پر پاکستانی پرچم لہرائے گئے

    سرینگر: بھارتی فورسز کے ہاتھوں غیر قانونی طور پر مقبوضہ علاقے جموں و کشمیر کے لوگ بھی آج پاکستان کا یوم آزادی منا رہے ہیں۔

    اے آروائی نیوز براہِ راست دیکھیں live.arynews.tv پر

    کشمیر میڈیا سروس کے مطابق مقبوضہ جموں و کشمیر میں کشمیری عوام آج پاکستان کا یوم آزادی انتہائی جوش و خروش، عقیدت اور احترام کے ساتھ منا رہے ہیں۔

    بڑی تعداد میں بھارتی فورسز، پولیس اہل کاروں، ڈرونز اور نگرانی کے سی سی ٹی وی کیمروں کی موجودگی کے باوجود مقبوضہ کشمیر میں لوگوں نے سرینگر، بارہمولہ، بڈگام، شوپیاں، پلوامہ، اسلام آباد، کولگام اور خطہ جموں کے کئی علاقوں میں 14 اگست کی آدھی رات کو پاکستان سے محبت کے اظہار میں پاکستانی پرچم لہرائے۔

    کشمیریوں نے پاکستان کے حق میں اور بھارت مخالف نعرے بھی لگائے۔

    کشمیریوں نے سرینگر میں بھی پاکستان کے یوم آزادی پر بھارتی افواج کی طرف سے جوابی کارروائی کے خوف کے بغیر اپنی خوشی کا اظہار کرنے کے لیے پٹاخے پھوڑے، باوجود یہ کہ بھارتی فورسز نے کل بھارت کے یوم آزادی سے قبل مقبوضہ علاقے کو فوجی چھاؤنی اور ایک کھلی جیل میں تبدیل کر دیا ہے۔

    نوجوانوں نے بارہمولہ اور بڈگام کے علاقوں میں وہ بھارتی جھنڈے بھی جلائے جو بھارتی حکام نے انھیں زبردستی دیے تھے، واضح رہے کہ مقبوضہ جموں و کشمیر میں کشمیری کل بھارت کے یوم آزادی کو یوم سیاہ کے طور پر منائیں گے۔

    حریت رہنما عبدالحمید لون نے بھی ایک بیان میں کہا کہ مقبوضہ کشمیر میں کئی مقامات پر پاکستانی پرچم لہرائے گئے، نوجوانوں نے پاکستانی پرچم کے ساتھ پاکستان زندہ باد کے نعرے بھی لگائے، انھوں نے کہا کہ بھارت کشمیری مسلمانوں کے دلوں سے پاکستان کی محبت ختم نہ کر سکا۔

  • سرینگر میں 8 محرم کے جلوس پر پابندی

    سرینگر میں 8 محرم کے جلوس پر پابندی

    سرینگر: مقبوضہ کشمیر میں بھارت کی جارحیت جاری ہے، قابض انتظامیہ نے سری نگر میں 8 محرم کے جلوس پر پابندی لگا دی۔

    تفصیلات کے مطابق بھارتی فورسز نے سرینگر میں سیکیورٹی خدشات کا بہانہ کر کے آٹھ محرم کے جلوس پر پابندی لگا دی۔

    سری نگر کے علاقے گرو بازار سے ڈل گیٹ تک محرم کا جلوس نہیں نکالا جا سکے گا، قابض فورسز کا کہنا ہے کہ سیکیورٹی خدشات کے پیش نظر محرم کے جلوسوں کی اجازت نہیں دی جا سکتی۔

    قابض فورسز نے سرینگر اور وادئ کشمیر کے کئی علاقوں کو بند کر دیا ہے، موبائل انٹرنیٹ سروسز بھی معطل کر دی گئی ہیں۔

    واضح رہے کہ انتظامیہ 1979 سے 8 اور 10 محرم کے 2 بڑے جلوسوں پر پابندی لگاتی آ رہی ہے۔

  • یوم استحصال کشمیر، وادی میں ہڑتال، پاکستان کا حمایت جاری رکھنے کے عزم کا اعادہ

    یوم استحصال کشمیر، وادی میں ہڑتال، پاکستان کا حمایت جاری رکھنے کے عزم کا اعادہ

    اسلام آباد: بھارت کی جانب سے مقبوضہ کشمیر کی خصوصی حیثیت ختم کرنے اور یک طرفہ اقدامات کے 3 سال مکمل ہو گئے، پاکستانی قوم اور دنیا بھر میں مقیم کشمیری عوام آج یوم استحصال منا رہے ہیں۔

    تفصیلات کے مطابق یوم استحصال کشمیر پر پاکستان نے کشمیریوں کی منصفانہ جدوجہد کی سیاسی، اخلاقی اور سفارتی حمایت جاری رکھنے کےعزم کا اعادہ کیا ہے، اور مقبوضہ کشمیر کی جغرافیائی حیثیت اور آبادی کا تناسب تبدیل کرنے کے بھارتی اقدامات ناقابل قبول قرار دیے۔

    حریت کانفرنس کی جانب سے آج مقبوضہ کشمیر میں مکمل ہڑتال کی اپیل کی گئی ہے۔

    یوم استحصال کشمیر کے موقع پر صدر مملکت ڈاکٹرعارف علوی نے اپنے پیغام میں کہا ہے کہ بھارت کے 5 اگست کے اقدامات سلامتی کونسل کی قراردادوں کی خلاف ورزی ہیں، بھارت جموں و کشمیر میں زمینوں پر قبضے اور غیر کشمیریوں کی آباد کاری جیسے اقدامات کر رہا ہے۔

    انھوں نے کہا پاکستان ہمیشہ کی طرح کشمیری بھائیوں کی منصفانہ جدوجہد میں شانہ بشانہ کھڑا رہے گا۔

    وزیر خارجہ بلاول بھٹو زرداری نے پیغام میں کہا کہ جب تک کشمیریوں کو آزادی نہیں مل جاتی ایک بھی پاکستانی چین سے نہیں بیٹھے گا،بھارت نے 370 اور 35 اے میں تبدیلی کر کے اقوام متحدہ کی قراردادوں کو پامال کیا ہے، اور خطے کے امن و استحکام کو تباہی کی جانب دھکیل دیا ہے۔

    بلاول نے کہا 3 سال سے مقبوضہ وادی کے عوام آزادی اظہار، پر امن اجتماع سمیت تمام بنیادی حقوق سے محروم ہیں، اقوام متحدہ اپنے چارٹر پر عمل درآمد سے مقبوضہ کشمیر میں انسانی حقوق بحال کرائے۔

  • کشمیریوں نے جدوجہد آزادی کا چراغ نسل در نسل جلائے رکھا: وزیر اعظم

    کشمیریوں نے جدوجہد آزادی کا چراغ نسل در نسل جلائے رکھا: وزیر اعظم

    اسلام آباد: وزیر اعظم شہباز شریف کا کہنا ہے کہ یوم شہدا کشمیریوں کی قربانیوں کو یاد رکھنے کا دن ہے، کشمیریوں نے بھارتی تسلط کے باوجود جدوجہد آزادی کا چراغ نسل در نسل جلائے رکھا۔

    تفصیلات کے مطابق وزیر اعظم شہباز شریف نے سماجی رابطے کی ویب سائٹ ٹویٹر پر اپنے ٹویٹ میں کہا کہ کشمیری اپنے حق خود ارادیت کے لیے قربانیاں دیتے آرہے ہیں۔

    وزیر اعظم کا کہنا تھا کہ یوم شہدا کشمیریوں کی ان قربانیوں کو یاد رکھنے کا دن ہے، کشمیریوں نے بھارتی تسلط کے باوجود جدوجہد آزادی کا چراغ نسل در نسل جلائے رکھا۔

    خیال رہے کہ عید سے قبل بھی مقبوضہ کشمیر میں بھارتی فوج کی جارحیت جاری رہی، ضلع گلگام میں نام نہاد سرچ آپریشن کے دوران صرف 24 گھنٹوں کے اندر 4 نوجوان شہید کردیے گئے۔

    بھارتی پولیس نے ضلع بانڈی پورہ سے ایک کشمیری نوجوان کو گرفتار بھی کیا تھا۔

  • بھارتی فورسز نے سوپور اور پلوامہ میں بھی 2 کشمیری نوجوان شہید کر دیے

    بھارتی فورسز نے سوپور اور پلوامہ میں بھی 2 کشمیری نوجوان شہید کر دیے

    سوپور: مقبوضہ کشمیر میں بھارتی فورسز نے بربریت کا مظاہرہ کرتے ہوئے مزید دو کشمیری نوجوانوں کو بے دردی سے شہید کر دیا۔

    تفصیلات کے مطابق مقبوضہ کشمیر میں قابض فورسز نے ریاستی دہشت گردی کی تازہ کارروائی میں ضلع سوپور اور پلوامہ میں دو کشمیری نوجوانوں کو شہید کر دیا ہے۔

    کشمیر میڈیا سروس کے مطابق نوجوان کو فوجیوں اور نیم فوجی دستوں نے سوپور قصبے کے علاقے طولیبل میں محاصرے اور تلاشی کی نام نہاد کارروائی کے دوران شہید کیا، آخری اطلاعات تک آپریشن جاری تھا۔

    قابض بھارتی انتظامیہ نے پلوامہ میں بھی ایک جوان کو شہید کر دیا ہے، فورسز کی جانب سے علاقے کی ناکہ بندی کی گئی ہے، بھارتی پولیس کے ایک اعلیٰ اہل کار نے کہا کہ ضلع پلوامہ میں بھی محاصرہ اور تلاشی آپریشن جاری ہے، دوسری جانب شوپیاں پولیس نے ایک نوجوان کو گرفتار کر لیا ہے۔

    کپواڑا میں بھارتی فورسز کی فائرنگ سے 2 کشمیری شہید، تعداد 7 ہو گئی

    دریں اثنا، پولیس نے دی ریئل کشمیر نیوز کے فیس بک پیج کے ہینڈلر کے خلاف سوشل میڈیا پر ایک پوسٹ کے لیے مقدمہ درج کر دیا ہے، ہینڈلر نے پوسٹ میں یہ انکشاف کیا تھا کہ ایک گرفتار نوجوان کو بھارتی فوجیوں نے ضلع کپواڑہ کے چندیگام لولاب میں جعلی مقابلے میں جان سے مارا۔