مانچسٹر: مقبوضہ کشمیر میں جاری بھارتی مظالم کو اجاگر کرنے کی ایک مہم کے دوران برطانوی شہر مانچسٹر کی ٹیکسیوں پر تشہیری مہم شروع کر دی گئی۔
تفصیلات کے مطابق مقبوضہ کشمیر میں جاری بھارتی مظالم کی طرف اقوام عالم کی توجہ مبذول کروانے کے لیے برطانوی شہر مانچسٹر میں ایک تشہیری مہم کا آغاز کیا گیا ہے جس میں کشمیریوں پر ڈھائے جانے والے بھارتی مظالم کے بینرز شہر کی ٹیکسیوں پر لگائے گئے ہیں۔
گاڑیوں پر چسپاں پوسٹرز میں بھارت سے مطالبہ کیا گیا ہے کہ وہ کشمیریوں پر اپنی بربریت اور مظالم کا سلسلہ فوری بند کرے۔
یہ مہم ایک برطانوی شہری کی جانب سے شروع کی گئی ہے، مہم کے آرگنائزر نے اے آر وائی نیوز سے گفتگو کرتے ہوئے کہا اس مہم کا مقصد دنیا کو مقبوضہ کشمیر میں جاری بھارتی مظالم کی طرف متوجہ کرنا ہے۔
مجاہدین سے جھڑپ میں 4 بھارتی فوج ہلاک
برطانوی شہری کا کہنا تھا کہ وہ اس تشہیری مہم کا دائرہ کار دیگر شہروں تک بھی بڑھائیں گے۔
یاد رہے کہ 7 اور 8 نومبر کی شب مقبوضہ کشمیر کے علاقے کپواڑہ میں مجاہدین اور بھارتی فوج کے درمیان ہونے والی جھڑپوں میں 4 بھارتی فوجی ہلاک ہوگئے تھے، آئی ایس پی آر کے مطابق اس واقعے کے بعد بھارتی فوج نے ایل او سی کے مختلف سیکٹرز پر شر انگیزیاں شروع کیں اور بھاری ہتھیاروں، مارٹرزگولوں کا بے دریغ استعمال کیا۔
آئی ایس پی آر کی جانب سے جاری بیان میں کہا گیا کہ بھارتی اشتعال انگیزیوں سے چار معصوم شہری شہید جبکہ بارہ زخمی ہوئے، پاک فوج نے بھارتی اشتعال انگیزیوں کا منہ توڑ جواب دیا، پاک فوج نے بھارتی چیک پوسٹوں کو موثرانداز میں نشانہ بنایا، پاک فوج کی جوابی کارروائی سے بھارتی فوج کو بھاری جانی نقصان اٹھانا پڑا، جبکہ پاک فوج کا ایک جوان بہادری سے لڑتاہوا شہید ہوا جبکہ پانچ زخمی ہوئے۔
