Tag: مقبوضہ کشمیر

اسلام آباد: وزیر خارجہ شاہ محمود قریشی کا کہنا ہے کہ کشمیر میں بھارتی حکمت عملی مکمل طور پر ناکام ہوچکی ہے۔

تفصیلات کے مطابق وزیر خارجہ شاہ محمود قریشی نے اپنے بیان میں کہا کہہ بھارت نہتے کشمیریوں پر طاقت کا استعمال 7 دہائیوں سے کر رہا ہے،طاقت کےاستعمال سے یہ مسئلہ حل نہیں ہوگا۔

انہوں نے کہا کہ کشمیر میں بھارتی حکمت عملی مکمل طور پر ناکام ہوچکی ہے،حکمت عملی ناکام ہونےکی آوازیں بھارت کے اندر سےاٹھ رہی ہیں۔

شاہ محمود قریشی کا کہنا تھا کہ بھارت نے یکطرفہ قوانین سے کشمیریوں کی آواز کو دباناچاہا،5 اگست 2019 کے بعدکشمیریوں پر ڈھائےگئے مظالم کی مثال نہیں ملتی،بھارت وقتی آواز دبانے میں کامیاب تو ہوسکتا ہے مگرمسئلہ حل نہیں ہوگا۔

وزیر خارجہ نے کہا کہ بھارتی اقدامات کی وجہ سے آج کشمیریوں میں اشتعال پایا جاتا ہے،مقبوضہ کشمیر میں آزاد کشمیر کا پرچم لہرایا جا رہا ہے،کشمیری شہیدوں کوپاکستانی پرچم میں لپیٹ کر دفن کیا جا رہا ہے،کشمیر میں پاکستان زندہ باد کے نعرے لگتے ہیں۔

انہوں نے کہا کہ ہم کشمیر کا مسئلہ ہر فورم پر اٹھاتے رہیں گے،آج عالمی فورمز پر مسئلہ کشمیرکو زیر بحث لایا جا رہا ہے۔شاہ محمود قریشی نے کہا کہ وزیراعظم 25 تاریخ کو جنرل اسمبلی میں خطاب میں مسئلہ کشمیر پر بات کریں گے۔

نیویارک : اقوام متحدہ میں پاکستانی مندوب منیراکرم نے کہا ہے کہ سلامتی کونسل کے کام میں فوری اصلاحات کی ضرورت ہے۔

تفصیلات کے مطابق اقوام متحدہ کی سلامتی کونسل کی مکمل سالانہ رپورٹ سے متعلق غیر رسمی اجلاس کے دوران پاکستان کے مستقل مندوب منیر اکرم نے عالمی برادری پر زور دیا کہ وہ بھارت کو مودی کی آباد کاری اسکیم کے ذریعے مقبوضہ کشمیر میں مسلم اکثریت کو اقلیت میں بدلنے سے روکے۔

پاکستانی سفیر نے کہا کہ سلامتی کونسل کے کام میں فوری اصلاحات کی ضرورت ہے، کونسل نے دہشت گردی انتہا پسندی اور فاشسٹ تنظیم کو نظر انداز کرتے ہوئے القاعدہ اور داعش کا مقابلہ کرنے پر توجہ دی ہے۔

منیر اکرم کا کہنا تھا کہ سلامتی کونسل انتہا پسندوں اور فاشسٹ ہندوتوا گروپوں کی طرف سے مسلمانوں پر ہونے والی دہشت گردی کو نظر انداز کر رہی ہے۔

انہوں نے کہا بھارتیہ جنتا پارتی اور آر ایس ایس کے گٹھ جوڑ پر مبنی حکومت مقبوضہ کشمیر میں خود کو حتمی حل کے نام سے موسوم کر رہی ہے۔

پاکستانی مندوب کا کہنا تھا کہ آباد کاری کے ذریعے آبادیاتی سیلاب کا مقصد کشمیری عوام کو تقسیم اور ان کے آزادانہ حقوق سے محروم کرنا اور ان کی مسلم شناخت کو ختم کرنا ہے۔

اسلام آباد: وفاقی وزیر برائے انسانی حقوق ڈاکٹر شیریں مزاری نے کہا ہے کہ ہمیں کشمیر کے حوالے سے روایتی ڈپلومیسی سے آگے بڑھنا ہوگا، کشمیری ثقافت، شاعری، ان کی دردناک موسیقی کو دنیا بھر میں پھیلا کر مسئلہ کشمیر اجاگر کیا جا سکتا ہے۔

ڈاکٹر شیریں مزاری نے ’کشمیر آرٹ کے ذریعے‘ کے موضوع پر آج اسلام آباد میں منعقدہ نمائش کے موقع پر تقریب سے خطاب کرتے ہوئے کہا ہمیں کشمیر کے حوالے سے روایتی ڈپلومیسی سے آگے بڑھنا ہوگا، وزیراعظم عمران خان نے مسئلہ کشمیر کے حوالے سے ایک بہترین بیانیہ پیش کیا جس کو دنیا بھر میں نہ صرف سراہا گیا بلکہ مودی کے شرم ناک عزائم بھی بے نقاب ہوئے۔

انھوں نے کہا کسی بھی معاشرے میں مسائل کو اجاگر کرنے اور تحریکوں کو کامیاب بنانے میں سول سوسائٹی کا بنیادی کردار ہوتا ہے، فلسطین کی تحریک کو بھی دنیا بھر میں کامیاب بنانے میں دنیا بھر کی سول سوسائٹی نے اہم کردار ادا کیا، یہی وجہ ہے کہ متحدہ عرب امارات اور اسرائیل کے درمیان تعلقات قائم ہونے پر کوئی بھی یورپین ملک واہ واہ نہیں کر رہا کیوں کہ وہاں پر سول سوسائٹی بہت فعال ہیں۔

شیریں مزاری کا کہنا تھا ہمیں وزیر اعظم کے کشمیر کے حوالے سے پیغام کو آگے لے کر جانا ہے تاکہ کشمیریوں کو ان کی منزل تک پہنچایا جا سکے۔

انھوں نے کہا ہماری وزارت کی طرف سے ڈیجیٹل فلم فیسٹیول جاری ہے جس میں پہلی فلم کشمیر کے حوالے سے وزارت کی ویب سائٹ پر جاری کی گئی اور اس فلم کا نام فریاد تھا جس کو 5 لاکھ افراد نے آن لائن دیکھا۔

وفاقی وزیر نے کہا ہمیں کشمیر کا مقدمہ لڑنے کے لیے نئے طریقے اختیار کرنا ہوں گے تاکہ ہم معنی خیز انداز میں کشمیر کا بیانیہ اجاگر کر سکیں۔

تقریب میں میں 100 سے زائد تصاویر رکھے گئے تھے جن میں کشمیر میں جاری لاک ڈاؤن کی منظر کشی کی گئی تھی، یہ تصاویر ملک کے نامور مصوروں، طالب عملوں اور دیگر شعبہ زندگی سے تعلق رکھنے والے افراد نے تیار کی تھیں۔

سری نگر: مقبوضہ کشمیر میں کل جماعتی حریت کانفرنس نے بدھ کو ہڑتال کی کال دے دی۔

تفصیلات کے مطابق حریت کانفرنس نے مقبوضہ کشمیر میں بدھ کو ہڑتال کا اعلان کیا ہے۔ہڑتال کا اعلان سری نگر میں 3 کشمیری مزدوروں کے قتل کے خلاف کیا گیا ہے۔

بھارتی فورسز نے 18جولائی کو 3 کشمیریوں کو شہید کر کے تدفین کر دی تھی،3 کشمیری مزدور کام ڈھونڈنے کے لیے سری نگر گئے تھے۔قتل کیے گئے تین کشمیریوں کے اہل خانہ نے ڈی این اے ٹیسٹ کا مطالبہ کیا تھا۔

ایمنسٹی انٹرنیشنل نے کشمیری نوجوانوں کے ماورائے عدالت قتل کی تحقیقات کا مطالبہ کیا ہے۔

یاد رہے کہ مقبوضہ کشمیر کے علاقے شوپیاں میں مزدوری کے لیے جانے والے تین نوجوانوں کو دہشت گرد قرار دے کر جعلی مقابلے میں شہید کر دیا گیا تھا۔

ایک سال کے دوران 214 کشمیری شہید

واضح رہے کہ مقبوضہ کشمیر میں بھارتی فورسز نے ایک سال سے غیرقانونی محاصرہ کے دوران 214 کشمیریوں کو شہید کیا جبکہ بھارتی فورسز کے تشدد سے تیرہ سو نوے کشمیری زخمی ہوئے۔