نئی دہلی : مودی سرکار کی مقبوضہ کشمیر میں جی 20 اجلاس کی سیکیورٹی دردِ سربن گئی ، فدائی حملوں کا خوف جی20 اجلاس کیلئے سب سے بڑا خطرہ قرار دے دیا گیا۔
تفصیلات کے مطابق مودی پر خوف سے لرزہ طاری ہے ، جی20 اجلاس کی سیکیورٹی بھارتی حکومت کے لئے ایک ڈراؤنا خواب بن گئی ہے۔
مقبوضہ کشمیر میں کشیدہ صورتحال کے باعث بھارت نے سری نگر میں جی 20 اجلاس میں سیکیورٹی پر خدشات کا اظہار کردیا۔
سیکیورٹی پلان کے مطابق اضافی کمانڈوز کو مقبوضہ وادی میں تعینات کر دیا گیا ہے جبکہ نیشنل سیکیورٹی گارڈ کی مسلح ٹیموں کو اسپیشل آپریشن گروپس کے ساتھ تعینات کرنے کا فیصلہ کیا گیا ہے۔
فدائی حملوں کا خوف جی20 اجلاس کیلئے سب سے بڑا خطرہ قرار دیا گیا ہے ، جس کے پیش نظر بھارتی فوج کے جی او سی کلو فورس کو ہائی الرٹ کر دیا گیا۔
ممکنہ حملوں کو روکنے کیلئے بھی بھارتی فورسز سر جوڑ کر بیٹھ گئیں اور بلٹ پروف شیلڈ کے ساتھ حفاظتی بنکرز بھی تیار کروانے کا فیصلہ کرلیا گیا۔
مقبوضہ وادی کی پولیس نے علاقے میں پوشیدہ پولیسنگ کے نفاذ کا منصوبہ بنا لیا ہے، جس کے تحت ماورائے عدالت گرفتاریوں اور قتل و غارت کا بازار گرم کیا جا سکے۔
600سے زائد پولیس اہلکاروں کی شیر کشمیر پولیس اکیڈمی میں تربیت کا آغاز کر دیا گیا ہے ، اس منصوبے سے مقبوضہ کشمیر کی تمام فورسز کے اہلکاروں کو گرفتاری کی کھلی اجازت ہو گی۔
اب سوال یہ اٹھتا ہے کہ کیا اقوامِ عالم کے سامنے مودی اور بھارت کا بھیانک چہرہ جی20 کی آڑ میں چھپ سکتا ہے؟جی20 ممالک کو اجلاس میں شرکت سے پہلے مقبوضہ کشمیر کی اندرونی صورتحال پر نظر رکھنی ہو گی۔
بھارت مقبوضہ کشمیر میں اضافی فورسز کیوں تعینات کر رہا ہے؟ مقبوضہ کشمیر میں امن و امان ہے تو پھر اتنے بڑے پیمانے پر سیکیورٹی فورسزکو کیوں تعینات کیا جارہا ہے؟
