سری نگر: مقبوضہ کشمیر میں کشمیری رہنما مقبول بٹ کی برسی پر سید علی گیلانی، میر واعظ عمر فاروق، یاسین ملک اور دیگرحریت رہنماؤں نے ہڑتال کی کال دی ہے۔
تفصیلات کے مطابق مقبول بٹ شہید کی 35 ویں برسی کے موقع پرآج مقبوضہ وادی میں مکمل ہڑتال ہے، کاروباری مراکز، تعلیمی ادارے، ٹرانسپورٹ مکمل طور پر بند ہے۔
کشمیری لیڈر مقبول بٹ شہید کی برسی منانے سے روکنے کے لیے کٹھ پتلی انتظامیہ نے سید علی گیلانی، میرواعظ عمر فاروق اور یاسین ملک سمیت دیگر حریت رہنماؤں کو نظر بند کردیا ہے۔
کٹھ پتلی انتظامیہ نے افضل گرو کی برسی پر بھارت کے خلاف مظاہروں کو روکنے کے لیے سری نگر اور دیگر علاقوں میں غیر اعلانیہ کرفیو لگا دیا ہے۔ موبائل، انٹرنیٹ سروس اور ٹرین سروس بھی معطل کردی گئی ہے۔
کشمیری حریت رہنماؤں کی جانب سے جاری بیان میں کہا گیا کہ مقبول بٹ شہید کو پھانسی دینا عدالتی تاریخ کا سیاہ ترین باب تھا، انہوں نے کٹھ پتلی انتظامیہ کی جانب سے کشمیری رہنما کی برسی منانے سے روکنے کے عمل کی بھی شدید مذمت کی۔
کشمیر کی آزادی کی تحریک چلانے پر بھارت کی جانب سے مقبول بٹ کو 11 فروری 1984 کو نئی دہلی کی تہار جیل میں پھانسی دی گئی تھی اور انہیں جیل کے احاطے میں ہی دفن کردیا تھا۔
افضل گرو کی برسی پر مقبوضہ کشمیر میں ہڑتال
خیال رہے کہ دو روز قبل بھی مقبوضہ کشمیرمیں کشمیری رہنما افضل گرو کی برسی پر مکمل شٹر ڈاؤن ہڑتال تھی اور کشمیریوں کی جانب سے پُرامن مظاہرہ بھی کیا گیا تھا۔
مقبوضہ کشمیر میں بھارتی فوج کی قتل و غارت گری جاری، 5 کشمیری شہید
یاد رہے کہ گزشتہ روز بھارتی فورسز نے مقبوضہ کشمیر میں نام نہاد آپریشن کے نام پر 5 کشمیریوں کو شہید کیا تھا۔
