کراچی : اسحاق بوبی اور عاصم کیپری ہائی پروفائل دہشت گرد ہیں، جیل حکام نے دونوں ملزمان کو سیکیورٹی رسک قرار دیتے ہوئے مقدمات عدالت کی بجائے جیل ہی میں چلانے کی سفارش کردی۔
تفصیلات کے مطابق کراچی کی انسداد دہشت گردی عدالت میں ہائی پروفائل دہشت گردوں کی پیشی کامعاملہ پیچیدہ صورت اختیار کرگیا، کراچی جیل حکام نے کالعدم تنظیم کے اسحاق بوبی اورعاصم کیپری کو ہائی پروفائل دہشت گرد قرار دیتے ہوئے عدالت لانے لے جانے سے معذرت کی ہے۔
عدالت کے پروڈکشن آرڈرز کے جواب میں جیل حکام نے سیکیورٹی رپورٹ جمع کرادی ۔ رپورٹ میں جیل انتظامیہ نے دہشت گرد اسحاق بوبی اورعاصم کیپری کو عدالت میں پیش کرنا سیکیورٹی رسک قرار دے دیا۔
رپورٹ میں جیل حکام نے عدالت کو بتایا کہ ملزمان کے مقدمات جیل میں چلانے کے لیے محکمہ داخلہ سے سفارش کر رہےہیں، مذکورہ ملزمان امجد صابری قتل کیس سمیت دیگر درجنوں ہائی پروفائل مقدمات میں ملوث ہیں۔
