اسلام آباد: چیف جسٹس نے مقدمات میں التوا کی روش کے خلاف عملی قدم اٹھا لیا، تیسری مرتبہ التوا کی درخواست بھیجنے والے وکیل کا مقدمہ خارج کر دیا گیا۔
تفصیلات کے مطابق اسلام آباد ہائی کورٹ میں ایک کیس کے لیے تیسری مرتبہ التوا کی درخواست بھیجنے والے وکیل کا مقدمہ خارج کر دیا گیا، دو دن قبل اسلام آباد ہائی کورٹ کی جانب سے زیر التوا کیسز کی فکسیشن پالیسی جاری ہونے کے بعد یہ پہلا عملی قدم ہے۔
چیف جسٹس نے التوا کی درخواست پر کہا کہ وکیل کا کیس آج تیسری مرتبہ سماعت کے لیے مقرر ہوا، لیکن ان تینوں تاریخوں پر کوئی پیش نہیں ہوا، مقدمات کو طول دیے جانے کے اقدامات کی حوصلہ افزائی نہیں جا سکتی۔
اسلام آباد ہائی کورٹ کا زیرِ التوا کیسز کی سماعت مقرر کرنے کے حوالے سے بڑا فیصلہ
چیف جسٹس نے کہا فاضل وکیل کا مقدمہ عدم پیروی کی بنا پر خارج کیا جاتا ہے۔ کیس کے سلسلے میں سپریم کورٹ آفس آرڈر کی کاپی سپریم کورٹ کی ویب سائٹ پر جاری کر دی گئی۔
یاد رہے کہ بدھ کو اسلام آباد ہائی کورٹ نے زیر التوا کیسز کی سماعت مقرر کرنے کے حوالے سے بڑا فیصلہ کرتے ہوئے مقدمات کے تعین کے لیے پالیسی کی منظوری دے دی تھی، اس نئی پالیسی کے تحت کوئی کیس بغیر کسی کارروائی کے التوا کا شکار نہیں ہوگا۔
