Tag: ملازمین

اسلام آباد: وفاقی وزیر صنعت و پیداوار حماد اظہر نے کہا ہے کہ پاکستان اسٹیل کے 9 ہزار کے قریب ملازمین فارغ ہوں گے جس سے حکومت کو تنخواہوں اور سود کی مد میں70کروڑ روپےماہانہ کی بچت ہوگی۔

نجی ٹی وی کے پروگرام میں گفتگو کرتے ہوئے حماد اظہر نے کہا کہ اسٹیل مل پیپلزپارٹی کےدور میں منافع سےخسارے میں گئی اور ن لیگ دور میں پاکستان اسٹیل کو 2015 میں بند کر دیا گیا۔

حماد اظہر نے کہا کہ گزشتہ 5سال سے پاکستان اسٹیل ملز کی پیداوار صفر ہے، بنداسٹیل ملز کے ملازمین کو 35 ارب روپے تنخواہوں کی مد میں ادائیگی کی گئی جب کہ ماضی میں پاکستان اسٹیل کو 90ارب کابیل آؤٹ پیکج دیامگرچل نہ سکی۔

وفاقی وزیر نے کہا کہ پاکستان اسٹیل کا قرضہ 230 ارب روپے سے تجاوز کر گیا ہے، 9ہزار کے قریب ملازمین فارغ ہوں گے جس سے حکومت کو تنخواہوں اور سود کی مد میں70 کروڑ روپے ماہانہ کی بچت ہوگی۔

واضح رہے کہ وفاقی حکومت نے اسٹیل ملز کے ملازمین کو گولڈنگ ہینڈ شیک دے کر فارغ کرنے کا فیصلہ کیا ہے اور اس عمل کو تیز سے تیز کیا جارہا ہے۔

کراچی: وزیراعلیٰ سندھ مراد علی شاہ نے محکمہ صحت سندھ کے ملازمین کے لیے بونس کا اعلان کیا ہے۔

تفصیلات کے مطابق کرونا کے خلاف جنگ میں لڑنے والے محکمہ صحت سندھ کے ملازمین کے لیے حکومت سندھ کی جانب سے بڑا اعلان سامنے آگیا۔

محکمہ صحت سندھ کے ملازمین کو ایک بیسک تنخواہ اضافی دی جائےگی، ہیلتھ رسک الاؤنس کرونا کے علاج پر تعینات اسٹاف کو دیا جائےگا،اسپتالوں اور لیببارٹریز میں کام کرنے والے ہیلتھ کیئر اسٹاف ہیلتھ رسک الاؤنس کے مستحق ہوں گے۔

محکمہ خزانہ سندھ کی جانب سے جاری کردہ نوٹیفکیشن کے مطابق ہیلتھ رسک الاؤنس کا اطلاق مارچ 2020 سے ہوگا،اسپتالوں کے ایم ایس،سربراہان ہیلتھ کیئر اسٹاف فہرستوں کی تصدیق کریں گے۔ہاؤس جاب آفیسر،پوسٹ گریجویٹ ڈاکٹرز کو بھی ہیلتھ رسک الاؤنس ملے گا۔

کرونا وبا پرقابو پانےتک ڈاکٹروطبی عملے کو اضافی تنخواہ ملتی رہےگی،عثمان بزدار

اس سے قبل رواں سال اپریل میں وزیراعلیٰ پنجاب سردار عثمان بزدار کا کہنا تھا کہ کرونا وبا پر قابو پانے تک ڈاکٹر وطبی عملے کو اضافی تنخواہ ملتی رہےگی۔

واضح رہے کہ پاکستان میں کرونا وائرس کی وبا سے اموات میں خوف ناک حد تک اضافہ ہوگیا ہے، گزشتہ چوبیس گھنٹوں کے دوران ملک بھر میں مزید 78 افراد کرونا انفیکشن کا شکار ہو کر جاں بحق ہو گئے ہیں۔

اسلام آباد: ترجمان دفتر خارجہ کا کہنا ہے کہ وزارت خارجہ کے ملازمین نے کرونا فنڈ میں حصہ ڈالنے کا اعلان کیا ہے۔

تفصیلات کے مطابق ترجمان دفتر خارجہ عائشہ فاروقی نے کہا کہ وزارت خارجہ کے ملازمین نے کرونا فنڈ میں حصہ ڈالنے کا اعلان کیا ہے، وزارت خارجہ کے افسران 4 دن کی تنخواہ، دیگر اسٹاف 3 دن کی تنخواہ دے گا۔

ترجمان عائشہ فاروقی کا کہنا تھا کہ تمام پاکستانی سفارتی مشن بھی کرونا فنڈ میں حصہ ڈالیں گے۔

اس سے قبل 31 مارچ کو پاک فوج کے شعبہ تعلقات عامہ (آئی ایس پی آر) کا کہنا تھا کہ ایس پی ڈی اور این سی اے کے ملازمین کرونا فنڈ میں حصہ ڈالیں گے، سائنسدان،انجینئرز اور دیگر ملازمین اپنی تنخواہوں کا حصہ عطیہ کریں گے۔

آئی ایس پی آر کا کہنا تھا کہ چیئرمین جوائنٹ چیفس آف اسٹاف کمیٹی جنرل ندیم رضا نے کرونا فنڈ میں 1ماہ کی تنخواہ دینے کا اعلان کیا۔

کرونا سے جنگ: وزیراعظم کا ریلیف فنڈ کے قیام اور ٹائیگرفورس بنانے کا اعلان

یاد رہے کہ گزشتہ دنوں وزیراعظم عمران خان نے کرونا سے لڑ نے کے لیے ریلیف فنڈ کے قیام اور ٹائیگرفورس بنانے کا اعلان کیا تھا۔

وزیراعظم کا کہنا تھا کہ کرونا وائرس کے خلاف جنگ وسائل سے نہیں جیتی جاسکتی،کرونا وائرس کے خلاف جنگ متحد ہو کر حکمت سے جیتی جاسکتی ہے۔

کراچی: سول ایوی ایشن اتھارٹی (سی اے اے) نے کرونا وائرس کے پھیلاؤ کی روک تھام کے لیے سی اے اے کا اہم اقدام سامنے آگیا۔

تفصیلات کے مطابق سول ایوی ایشن اتھارٹی (سی اے اے) نے کرونا وائرس کے پیش نظر ملازمین کے لیے نئی ایڈوائزری جاری کردی جس میں بتایا گیا ہے کہ سی اے اے ملازمین کی ڈیوٹی کے اوقات کار تبدیل کر دیے گئے ہیں۔

سول ایوی ایشن اتھارٹی کی جانب سے جاری نوٹیفکیشن کے مطابق ہیڈکوارٹرز، جنرل ڈیوٹی والے ملازمین 6گھنٹے کام کریں گے۔نوٹیفکیشن میں کہا گیا ہے کہ سی اےاے ملازمین صبح 10سے شام 4 بجےتک ڈیوٹی انجام دیں گے، جمعہ کوصبح 10بجےتا دوپہر ایک بجے تک ڈیوٹی ہوگی۔

حکومت پاکستان کا کرونا وائرس سے بچاؤ کے لیے بڑا فیصلہ

یاد رہے کہ دو روز قبل حکومت پاکستان نے کرونا وائرس کی وجہ سے بین الاقوامی پروازوں کی منسوخی کے بعد تمام علاقائی پروازیں بھی منسوخ کردی تھیں۔

ڈائریکٹر ائیر ٹرانسپورٹ نے علاقائی پروازوں کی منسوخی سے متعلق نوٹم جاری کیا تھا جس میں کہا گیا تھا کہ حکومت پاکستان نے تمام ایئر لائن آپریٹرز سے مشاورت کے بعد فیصلہ کیا۔

قبل ازیں حکومت پاکستان کی ہدایات کے بعد پاکستان انٹرنیشل ایئرلائنز (پی آئی اے) نے اپنی تمام بین الاقوامی پروازوں کو عارضی طور پر معطل کر دیا تھا۔