بیجنگ: وزیراعظم عمران خان نے اورینٹ ہولڈنگز گروپ کے چیئرمین آف بورڈ، لانگ مارچ ٹائرکمپنی کے سی ای او اور چائنامیٹالرجیکل گروپ کے چیئرمین سے ملاقاتیں کیں ، اورینٹ ہولڈنگز گروپ چین کا بڑا انویسٹمنٹ گروپ ہے جبکہ لانگ مارچ کا شمار بہترین ٹائرمینوفیکچرنگ کمپنیوں میں ہوتا ہے۔
تفصیلات کے مطابق وزیراعظم عمران خان سے چائنامیٹالرجیکل گروپ کے چیئرمین کی ملاقات ہوئی ، ملاقات میں دونوں ممالک کے درمیان اسٹیل انڈسٹری میں تعاون بڑھانے پر تبادلہ خیال کیا گیا۔
اس موقع پر وفاقی وزرا شاہ محمود قریشی، خسرو بختیار، شیخ رشید بھی موجود تھے جبکہ مشیرتجارت، مشیر توانائی، چیئر مین بورڈ آف انویسٹمنٹ بھی موجود تھے، میٹالرجیکل گروپ چین کا سب سے بڑا تعمیراتی گروپ ہے، گروپ لوہے اور اسٹیل انڈسٹری میں کام کرنے والا چین کا پہلا گروپ بھی ہے۔
وزیراعظم عمران خان نے وفد کے ہمراہ اورینٹ ہولڈنگز گروپ کے چیئرمین آف بورڈ سے بھی ملاقات کی، جس میں پاکستان میں کاروباری اور سرمایہ کاری سے متعلق معاملات پر تبادلہ خیال کیا گیا۔
اورینٹ ہولڈنگز گروپ چین کا بڑا انویسٹمنٹ گروپ ہے، گروپ انفراسٹرکچر، تعمیرات، رئیل اسٹیٹ اور کیمیکل فائیبر کے شعبوں میں بزنس کر رہا ہے۔
اس سے قبل وزیراعظم عمران خان سے لانگ مارچ ٹائرکمپنی کےسی ای او کی ملاقات ہوئی ، لانگ مارچ کا شمار بہترین ٹائرمینوفیکچرنگ کمپنیوں میں ہوتا ہے۔
وزیراعظم عمران خان نے چائنہ گیژوبہ گروپ کے چئیرمین ژی ژیانگ سے بھی ملاقات کی ، جس میں دونوں ممالک کے درمیان توانائی کے شعبوں میں تعاون بڑھانے پر تبادلہ خیال کیا گیا۔
اس موقع پر وفاقی وزرا شاہ محمود قریشی، خسرو بختیار، شیخ رشید، مشیر تجارت، مشیر توانائی اور چیئر مین بورڈ آف انویسٹمنٹ بھی ملاقات میں شریک تھے ۔
چائنہ گیژوبہ گروپ چائنہ انرجی انجینئرنگ گروپ کا اہم ممبر ہے، گروپ 100 سے زائد ممالک کے ساتھ توانائی معاہدوں پر کام کر رہا ہے۔
گیژوبہ گروپ نے پاکستان میں توانائی کے شعبے میں تعاون پر آمادگی کا اظہار کرتے ہوئے کہا کہ گروپ پاکستان میں توانائی کے نئے ذخائر کی دریافت کے لئے کام کرنے کا خواہش مند ہے۔
یاد رہے وزیراعظم عمران خان 3 روزہ دورے پر چین پہنچے تو ایئرپورٹ پر شاندار استقبال کیا گیا اور وزیراعظم کو گارڈآف آنر پیش کیا گیا، وزیراعظم عمران خان آج چینی ہم منصب سے ملاقات کریں گے اور چین کی کونسل فارپروموشن آف انٹرنیشنل ٹریڈ سے خطاب بھی کریں گے۔
وزیراعظم عمران خان اورچینی قیادت کی ملاقات میں بھی جنرل قمرجاوید باجوہ ساتھ ہوں گے۔
