اسلام آباد: وزیر اعظم عمران خان سے آرمی چیف جنرل قمر جاوید باجوہ کی ملاقات ہوئی، ملاقات میں قومی سلامتی سمیت مختلف امور زیر غور آئے۔
تفصیلات کے مطابق وزیر اعظم عمران خان سے آرمی چیف جنرل قمر جاوید باجوہ کی ملاقات ہوئی۔ ملاقات میں سیکیورٹی سے متعلق امور پر تبادلہ خیال کیا گیا۔
ذرائع کا کہنا ہے کہ وزیر اعظم اور آرمی چیف کی ملاقات میں ملکی سیکیورٹی اور سلامتی سے متعلق امور پر بات چیت ہوئی۔
اس سے قبل رواں ماہ کے آغاز پر بھی سیاسی و عسکری قیادت کی ملاقات ہوئی تھی۔ ملاقات میں ملکی سلامتی اور سیکیورٹی سے متعلق امور پر تبادلہ خیال ہوا جبکہ پاک فوج کے پیشہ ورانہ امور پر بھی تفصیلی بات چیت ہوئی۔
گزشتہ ملاقات میں دونوں اہم شخصیات نے امن و امان کی صورتحال اور خطے کی مجموعی صورتحال پر بھی گفتگو کی تھی۔
خیال رہے کہ پاک فوج کی جانب سے اپنے اخراجات میں اضافہ نہ لینے پر وزیر اعظم نے پاک فوج کو زبردست خراج تحسین پیش کیا تھا۔
وزیر اعظم نے قومی اسمبلی کے اجلاس سے خطاب کرتے ہوئے کہا تھا کہ پاکستان کے حالات کو دیکھتے ہوئے فورسز نے اپنے اخراجات کو منجمد کیا، فورسز کے اقدام پر ان کا بہت شکر گزار ہوں۔
دوسری جانب آرمی چیف جنرل قمر جاوید باجوہ نے کہا تھا کہ ملکی استحکام معاشی خود مختاری کے بغیر ممکن نہیں۔ ہم اس وقت مشکل معاشی صورتحال سے گزر رہے ہیں۔
ان کا کہنا تھا کہ ہم سب کو اپنی ذمے داریاں نبھانے کی ضرورت ہے تاکہ مشکل حکومتی اقدامات کامیاب ہوسکیں۔ وقت آگیا ہے کہ ہمیں ایک قوم بن کر سوچنا ہوگا۔
آرمی چیف نے مزید کہا تھا کہ معاشی خود مختاری کے بغیر کوئی دوسری خود مختاری ممکن نہیں، ملک نہیں بلکہ خطے ترقی کرتے ہیں، معاشی کاوشیں کامیاب بنانے کے لیے سب کو ذمے داری پوری کرنا ہوگی۔
