کراچی : پاکستان مسلم لیگ (فنکشنل) کے سربراہ پیرپگارا نے کہا ہے کہ آرمی چیف کی خدمات لائقِ ستائش ہیں ہم افواجِ پاکستان کے شانہ بشانہ کھڑے ہیں کراچی کی طرز پر اندرونِ سندھ بھی آپریشن کی ضرورت ہے۔

یہ بات انہوں نے ایم کیو ایم پاکستان کے رہنما عامر خان کی رہائش گاہ پر ظہرانے کے بعد میڈیا سے بات کرتے ہوئے کہی،انہوں نے کہا کہ عامر خان مجھ سے ملنا چاہتے تھے میں نے جواب دیا کہ میرا خرچہ کیوں کراتے ہو میں خود تمہارے گھر آجاتا ہوں۔

پیرپگارا صبغت اللہ شاہ راشدی نے آرمی چیف راحیل شریف کی خدمات کو سراہتے ہوئے کہا کہ افواجِ پاکستان کے شانہ بشانہ کھڑے ہیں،فوجی جوان ملک کے لئے جانوں کا نذرانہ پیش کررہے ہیں، ہم سب کو مل کر فوج کا ساتھ دینا پڑے گا ضربِ عضب اور کراچی میں امن کا تسلسل بڑی کامیابی ہے جسے جاری رہنا چاہیے۔

انہوں نے کہا کہ میں نے 2013 کے انتخابات سے پہلے ہی کہہ دیا تھا کہ پیپلزپارٹی تین صوبوں سے آؤٹ ہوجائے گی کیوں کہ کارکردگی صفر ہو تو ایسے ہی نتائج سامنے آتے ہیں، گزشتہ آٹھ سالوں میں سندھ کا جو حال کیا گیا ہے اس کے سدباب کے لیے ایم کیو ایم کے ساتھ مل کر لائحہ عمل بنائیں گے۔

پیر صاحب پگارا نے کہا کہ کراچی کی طرح اندرونِ سندھ بھی آپریشن ہونا چاہیے تا کہ جرائم کا خاتمہ ہو اور کرپشن سے عوام کی جان چُھوٹے،اندرونِ سندھ میں ترقیاتی فنڈز غلط جگہوں پر لگائے گئے ہیں نئے وزیر اعلیٰ آئے ہیں لیکن ان کے پاس وقت ہی کتنا رہ گیا ہے؟

ایم کیو ایم پاکستان کے رہنما عامر خان نے میڈیا سے بات کرتے ہوئے کہا کہ پیر پگارا کی جانب سے عزت افزائی کا موقع دینے پر نہایت شکر گذار ہوں میں اور میری پارٹی کے لیے یہ اعزاز کی بات ہے کہ پیر پگارا صاحب میرے گھر تشریف لائے اور ہمارے ساتھ ظہرانہ کیا۔

کراچی : وزیراعلیٰ سندھ مرادعلی شاہ کا کہنا ہے کہ وہ کراچی کی تعمیر اور ترقی میں میئر کراچی وسیم اختر کے ساتھ کھڑے ہیں،سندھ حکومت اور شہری حکومت مل کام کریں گی۔

یہ بات انہوں نے میئرکراچی وسیم اختر سے ملاقات میں کہی،اُن کا کہنا تھا کہ کراچی میرا شہر ہے میں یہاں پلا بڑھا ہوں اور یہی تعلیم حاصل کی ہے اپنی زندگی کا بیشتر حصہ کراچی میں ہی گذارا ہے اس لیے کراچی کی تعمیر اور ترقی میں حصہ ڈال کر حق ادا کرنا چاہتا ہوں۔

دورانِ ملاقات میئر کراچی وسیم اختر نے بلدیہ عظمی کراچی اور کراچی ڈیولپمنٹ اتھارٹی کے درمیان تنازعات سمیت شہری حکومت کو درپیش مالی اور انتظامی مسائل ، کراچی میں کچرے کے انبار اور ٹرانسپورٹ کی کمیابی سے وزیراعلیٰ کو آگاہ کیا اور ان کے حل کے لیے تجاویز بھی دیں۔

وزیراعلیٰ سندھ نے میئر کراچی کو اپنی ہر ممکن تعاون کی یقین دہانی کرتے ہوئے کہا کہ کراچی کی تعیر اور ترقی کے حوالے سے شہری حکومت کے ہر مسئلے کو حل کریں گے اور جو بھی تجاویز دی جائیں گی ان پر غور کیا جائے گا۔

جس پر وسیم اختر نے وزیراعلیٰ سندھ کی حمایت کو سراہا اور دونوں رہنماؤں نے کراچی کی ترقی کے لیے مل کر کام کرنے پر اتفاق کیا۔

واضح رہے میئر کراچی حال ہی میں سینٹرل جیل سے ضمانت پر رہا ہو کر اپنی ذمہ داریاں نبھا نا شروع کردی ہے اور آج وزیر اعلیٰ سندھ سے بہ طور میئر کراچی پہلی ملاقات کی ہے۔