اسلام آباد : اقوام متحدہ کے سیکریٹری جنرل انتونیوگوتریس آج وزیراعظم عمران خان اور آرمی چیف جنرل قمر جاوید باجوہ سے ملاقات کریں گے اور یواین مشنز کیلئے پاکستانی دستوں کی خدمات کی تصویری نمائش کا افتتاح کریں گے۔
تفصیلات کے مطابق اقوام متحدہ کے سیکریٹری جنرل انتونیوگوتریس کی آج مصروفیات کا شیڈول جاری کردیا گیا ہے ، انتونیوگوتریس آج وزیر اعظم عمران خان سمیت اعلیٰ سیاسی و عسکری قیادت سےملاقاتیں کریں گے۔
سیکریٹری جنرل آج عالمی افغان مہاجرین کانفرنس سے خطاب کریں گے ، جس میں افغانستان، ایران سمیت 20 سےزائدممالک کے وفودشریک ہوں گے، کانفرنس میں یو این ایچ سی آر کےسربراہ فلپوگرانڈی بھی شرکت کریں گے ، کانفرنس کا مقصد پاکستان کی 40 سالہ میزبانی اور کاوشوں کو اجاگر کرنا ہے۔
مرکز برائے بین الاقوامی امن واستحکام میں تصویری نمائش آج ہوگی، جس کاافتتاح اقوام متحدہ سیکرٹری جنرل انتونیوگوتریس کریں گے اور مہمانوں کی کتاب میں تاثرات بھی قلمبندکریں گے، جبکہ امن مشنز میں خدمات انجام دینے والے پیس کیپرز سے ملیں گے۔
منعقد کردہ تصویری نمائش پاکستان کی اقوام متحدہ کیساتھ چھ دہائیوں پرمحیط سفرکی کہانی بیان کرتی ہے اور اس میں پاکستانی دستوں کی امن مشنز میں خدمات کی عکاسی کی گئی ہے، پاکستان کے پہلےامن دستےکی کانگومیں1960میں تعیناتی نمائش کاحصہ ہے جبکہ تصاویرمیں پاک فوج کی28 ملکوں میں 46 امن مشنزمیں خدمات کااحاطہ کیاگیاہے۔
نمائش کے شروع میں قائداعظم محمدعلی جناح کی امن سوچ کی عکاسی کی گئی ہے اور یواین سیکرٹری جنرل،60 سال کی شبیہہ،اقوام متحدہ کی فاختہ دکھائی گئی ہے۔
نمائش یواین امن مشنزمیں 157پاکستانی اہلکاروں کی قربانی کاادراک ہے جبکہ انتونیو گوتریس کا امن کیلئے ایکشن پروگرام بھی نمائش کا حصہ ہے اور امن کیلئے ایکشن کے نکات امن، کارکردگی، عوام، اشتراک اور سیاست واضح ہیں۔
نمائش میں امن مشنز میں78پاکستانی خواتین کی خدمات کودکھایاگیاہے اور پاکستان خواتین دستے تعینات کرنے والا پہلاملک اور یہ امر نمائش کاحصہ ہے جبکہ پاکستانی امن فوج کیلئےعالمی رہنماؤں کےخیالات بھی نمائش کا حصہ ہیں۔
نمائش میں یواین میں اعلیٰ عہدوں پرفائزرہےپاکستانی نمائندگان تصویروں میں نمایاں ہیں اور ہرخطےمیں امن مشنزکی ترتیب خوبصورت وتاریخی تصاویرسےواضح کی گئی ہے۔
