Tag: ملاقات

اسلام آباد: وزیراعظم عمران خان کا کہنا ہے کہ بے سہارا، غریب اور نادار لوگ ریاست کی ذمہ داری ہیں۔

تفصیلات کے مطابق وزیراعظم عمران خان سے فوکل پرسن برائے پناہ گاہ نسیم الرحمان نے ملاقات کی جس میں ملک بھر میں پناہ گاہوں کی مزید بہتری ، دائرہ کار توسیع کرنے کے اقدامات پر گفتگو کی گئی۔

اس موقع پر وزیراعظم عمران خان کا کہنا تھا کہ بے سہارا، غریب اور نادار لوگ ریاست کی ذمہ داری ہیں، نجی شعبے پناہ گاہوں کی تعمیر میں بڑھ چڑھ کر حکومت کا ساتھ دے رہے ہیں۔

وزیراعظم پاکستان کا مزید کہنا تھا کہ نجی شعبے کا تعاون معاشرے کی مثبت اقدار کے جذبے کی عکاسی کرتا ہے۔

یاد رہے کہ گزشتہ ہفتے معاون خصوصی ڈاکٹر فردوس عاشق اعوان کا کہنا تھا کہ وزیراعظم عمران خان نے پناہ گاہوں کے منصوبے کو موثر انداز میں آگے بڑھانے کے لیے نسیم الرحمان کو فوکل پرسن تعینات کیا ہے۔

ڈاکٹر فردوس عاشق اعوان کا کہنا تھا کہ یہ تعیناتی وزیراعظم کے غریبوں، مسافروں اور بے گھر افراد کے لیے چھت کی سہولت فراہم کرنے کے وژن اور جذبہ خدمت خلق کو تقویت دے گی۔

معاون خصوصی برائے اطلاعات کا مزید کہنا تھا کہ وفاقی حکومت آئندہ 12 ماہ میں تقریباََ ایک ہزار پناہ گاہیں تعمیر کی جائیں گی۔

کوالالمپور : وزیراعظم عمران خان دو روزہ سرکاری دورے پر ملائیشیا پہنچ گئے، دورے کے دوران وزیراعظم اور ملائیشین ہم منصب مہاتیر محمد کے درمیان ون آن ون ملاقات ہوگی۔

تفصیلات کے مطابق وزیراعظم عمران خان 2 روزہ دورے پر ملائیشیا پہنچے، کوالالمپور ایئرپورٹ پر وزیراعظم کا استقبال ملائیشیا کے وزیر دفاع محمد صابو نے کیا۔ وزیراعظم کے ہمراہ وزیر خارجہ شاہ محمود قریشی، وزیر منصوبہ بندی اسد عمر، مشیرتجارت اور سیکرٹری خارجہ بھی ہیں۔

وزیراعظم عمران خان اور ملائیشیا کے وزیر دفاع محمد صابو کے درمیان ملاقات میں دفاعی تعاون بڑھانے سمیت باہمی دلچسپی کے امور پر تبادلہ خیال کیا گیا، پاکستان اور ملائیشیا کے وفود بھی ملاقات میں موجود تھے۔

وزیراعظم عمران خان ملائیشن ہم منصب مہاتیر محمد کی دعوت پر دورہ کر رہے ہیں، دورے میں خطے کی صورت حال، تجارتی معاملات اور پاک ملائیشیا تعلقات میں بہتری کے حوالے سے گفتگو کی جائے گی۔

ترجمان دفتر خارجہ عائشہ فاروقی کے مطابق وزیراعظم عمران خان اور مہاتیر محمد میں ون آن ون ملاقات ہوگی، دورے کے دوران مختلف معاہدوں اور یاداشتوں پر دستخط کیے جائیں گے، وزیراعظم تھنک ٹینک سے بھی خطاب کریں گے۔

یاد رہے کہ مارچ 2019 میں ملائیشین وزیراعظم مہاتیر محمد تین روزہ دورے پر پاکستان پہنچے تھے ، جہاں اُن کا نور خان ایئربیس پر وزیراعظم عمران خان نے شانداراستقبال کیا اور مہمان کے اعزاز میں اکیس توپوں کی سلامی دی گئی تھی۔

راولپنڈی: آرمی چیف جنرل قمر جاوید باجوہ سے امریکی نمائندہ خصوصی زلمے خلیل زاد نے ملاقات کی اور باہمی دلچسپی کے امور پر تبادلہ خیال کیا۔

پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ سے امریکی نمائندہ خصوصی زلمے خلیل زاد نے جی ایچ کیو میں ملاقات کی۔

آئی ایس پی آر کے مطابق ملاقات میں باہمی دلچسپی کے امور،علاقائی سیکورٹی کی صورت حال پر تبادلہ خیال
کیا گیا۔ ملاقات میں افغانستان میں مفاہمتی عمل پر بھی بات چیت ہوئی۔

زلمے خلیل زاد کی شاہ محمود قریشی سے ملاقات

اس سے قبل امریکی نمائندہ خصوصی زلمے خلیل زاد نے وزیر خارجہ شاہ محمودقریشی سے ملاقات میں طالبان سے مذاکرات کی تفصیل سے آگاہ کرتے ہوئے پاکستان کے مصالحانہ کردار کی تعریف کی تھی۔

اس موقع پر شاہ محمود قریشی کا کہنا تھا کہ امریکہ اور طالبان کے مابین امن معاہدہ طے پانے سے “انٹرا افغان مذاکرات” کی راہ ہموار ہوگی جو نہ صرف افغانستان کے لیے بلکہ پورے خطے کے امن و استحکام کے لیے خوش آئند ثابت ہوگا۔

دوحا: وزیرخارجہ شاہ محمود قریشی نے قطر کے ڈپٹی وزیراعظم اور ہم منصب عبداللہ بن نصر بن خلیفہ الثانی سے ملاقات کی۔

تفصیلات کے مطابق وزیرخارجہ شاہ محمود قریشی نے دوحا میں قطر کے ڈپٹی وزیراعظم عبداللہ بن نصر بن خلیفہ الثانی سے ملاقات کی اور دوطرفہ تعلقات، افغان امن عمل، خطے میں امن وامان کی صورت حال پر بات چیت کی۔

شاہ محمود قریشی نے کہا کہ قطر کے ساتھ پاکستان کے تاریخی، برادرانہ تعلقات ہیں، پاکستان، قطر کے ساتھ دو طرفہ تعلقات کو بہت اہمیت دیتا ہے، پاکستان دونوں ممالک میں کثیرالجہتی تعاون کو بڑھانے کا متمنی ہے۔

وزیر خارجہ نے مقبوضہ کشمیرمیں انسانی حقوق کی خلاف ورزیوں سے آگاہ کیا، مقبوضہ وادی میں نہتے 80 لاکھ کشمیری 5ماہ سے بھارتی مظالم کا سامنا کر رہے ہیں۔

شاہ محمود قریشی نے قطری ہم منصب کو امن کے لیے پاکستان کی جاری کاوشوں سے آگاہ کیا۔ انہوں نے کہا کہ افغانستان میں قیام امن کی پاکستانی کوششوں کوعالمی سطح پر پذیرائی مل رہی ہے۔

قطری ڈپٹی وزیراعظم عبداللہ بن نصر بن خلیفہ الثانی اور وزیرخارجہ نے شاہ محمود قریشی کے دورہ قطر کو سراہا اور افغان امن عمل سمیت خطے میں قیام امن کے لیے پاکستان کی مصالحانہ کاوشوں کی تعریف کی۔

اسلام آباد: وزیراعلیٰ پنجاب سردار عثمان بزدار کا کہنا ہے کہ پنجاب میں اتحادی جماعت کو ساتھ لے کر چل رہے ہیں، عوام کی خدمت کے سفر میں کسی کو رکاوٹ نہیں ڈالنے دوں گا۔

تفصیلات کے مطابق وزیراعلیٰ پنجاب سردار عثمان بزدار سے معاون خصوصی فردوس عاشق اعوان نے ملاقات کی جس میں باہمی دلچسپی کے امور، سیاسی صورتحال اور ملکی امور پر تبادلہ خیال کیا گیا۔

اس موقع پر وزیراعلیٰ پنجاب نے کہا کہ تنقید برائے تنقید کرنے والے ملک و قوم کے خیر خواہ نہیں، ایسےعناصر محض ذاتی مفادات کے ایجنڈے کو لے کر چل رہے ہیں، ہمارا مقصد عوام کو ریلیف دینا اور ان کے لیے آسانیاں پیدا کرنا ہے۔

سردار عثمان بزدار نے کہا کہ پنجاب میں آٹے کی قیمتوں میں استحکام کے لیے ہر ضروری اقدام اٹھایا ہے، آٹے کی قیمت میں اضافہ کرنے والوں کے خلاف قانون اپنا راستہ خود لے رہا ہے۔

وزیراعلیٰ پنجاب نے کہا کہ آٹے کی قیمت میں اضافہ کسی صورت قابل قبو ل نہیں، چکی مالکان کو بھی آٹے کی قیمت میں اضافے کی اجازت نہیں دیں گے۔ انہوں نے مزید کہا کہ پنجاب میں اتحادی جماعت کو ساتھ لے کر چل رہے ہیں، عوام کی خدمت کے سفر میں کسی کو رکاوٹ نہیں ڈالنے دوں گا۔

معاون خصوصی برائے اطلاعات نے کہا کہ پنجاب حکومت نے آٹے کی دستیابی یقینی بنانے کے لیے اقدامات کیے، وزیراعلیٰ پنجاب صوبے کو بہترین انداز سے چلا رہے ہیں۔

فردوس عاشق اعوان نے کہا کہ پی ٹی آئی وزیراعظم عمران خان کی قیادت میں متحد ہے، اپوزیشن کا بیانیہ بری طرح بے نقاب ہوچکا ہے، سیاسی یتیم پاکستان کی سیاست سے آؤٹ ہوچکے ہیں۔

لندن: سابق وزیراعظم اور مسلم لیگ ن کے قائد نوازشریف سے سابق افغان صدر حامد کرزئی نے لندن میں ملاقات کی۔

تفصیلات کے مطابق سابق افغان صدر حامد کرزئی لندن میں نواز شریف کی عیادت کے لیے ایون فیلڈ اپارٹمنٹس پہنچے جہاں انہوں نے مسلم لیگ ن کے قائد سے ملاقات کی۔

نوازشریف کی عیادت کے بعد میڈیا سے گفتگو کرتے ہوئے سابق افغان صدر حامد کرزئی کا کہنا تھا کہ نوازشریف کی عیادت کے لیے آیا تھا، طبیعت اچھی ہے۔ انہوں نے کہا کہ اپنے گہرےدوست سے مل کر بہت خوشی ہوئی۔

اس موقع پر مسلم لیگ ن کے صدر شہباز شریف کا کہنا تھا کہ سابق افغان صدر حامد کرزئی نوازشریف کی خیریت پوچھنے آئے تھے اور انہوں نے پاکستان کے عوام کے لیے خیرسگالی کا پیغام دیا۔

نوازشریف کی میڈیکل رپورٹ ان کے کنسلٹنٹ ڈیود لارنس نے تیار کی ہے جس میں کہا گیا ہے کہ پلیٹلیٹس غیرمستحکم، شریانیں جزوی بند اور فالج کا خطرہ ہے۔

واضح رہے کہ لندن میں سابق وزیراعظم نوازشریف کے علاج معالجے کا سلسلہ جاری ہے جہاں وہ 20 نومبر سے موجود ہیں۔