لاہور: وزیر اعظم عمران خان نے کہا ہے کہ پرانا نظام اب نہیں چل سکتا، نئے پاکستان میں پرانا مائنڈ سیٹ تبدیل کرنا ہے۔
تفصیلات کے مطابق وزیر اعظم عمران خان سے آج وزیر اعلیٰ پنجاب، چیف سیکریٹری اور آئی جی نے ملاقاتیں کیں، وزیر اعظم نے آئی جی پنجاب اور چیف سیکریٹری کو ہدایت کی عوام کی خدمت کرنا آپ کا اوّلین فرض ہے، کسی سیاسی شخصیت کا کوئی بھی ناجائز کام ہرگز نہ کریں، آپ نے سب کام میرٹ پر کرنے ہیں۔
انھوں نے کہا بیوروکریسی اور دیگر عہدوں پر تعیناتیاں میرٹ پر کی گئیں، معاشی ترقی کے لیے قابل بیوروکریسی کا کردار بہت اہم ہے، پنجاب میں امن اور گورننس کے نظام میں بہتری لانے کی ضرورت ہے، افسران کی مدت ملازمت کو تحفظ فراہم کریں گے، پہلے تھانوں میں طاقت ور کو تحفظ فراہم کیا جاتا تھا۔
وزیر اعظم نے آئی پنجاب پولیس شعیب دستگیر کو ہدایت کی کہ عوام کے جان ومال کے تحفظ کے لیے وسائل بروئے کار لائے جائیں۔ دریں اثنا، نئے آئی جی پنجاب نے وزیر اعظم کو پولیس رویے میں بہتری کے لیے وژن سے آگاہ کیا۔ وزیر اعظم انھیں تمام وابستگیوں سے بالاتر ہو کر اقدامات اٹھانے کی ہدایت کی اور کہا صوبے میں تھانہ کلچر کی تبدیلی کے لیے سفارشات کو حتمی شکل دی جائے۔
دوسری جانب آئی جی پنجاب شعیب دستگیر کی زیر صدارت پہلی آر پی اوز، سی پی اوز، ڈی پی اوز کانفرنس ہوئی جس میں آئی جی پنجاب نے پیشہ ورانہ امور پر افسران کو اہم احکامات جاری کیے۔
شعیب دستگیر نے کہا کہ عوام کی حفاظت اور امن قائم کرنے والا ہی میری ٹیم میں رہے گا، شہریوں سے بدسلوکی یا بد کلامی کسی صورت برداشت نہیں ہے۔ انہوں نے کہا کہ تفتیش کے نظام کی بہتری میری ترجیحات میں شامل ہے، آر پی اوز، ڈی پی اوز مقدمات کی تفتیش میں خود دلچسپی لیں۔
