Tag: ملتان این اے 149

ملتان:حلقہ این اے 149 کی نشت پر ضمنی انتخاب کیلئے پولنگ ہو رہی ہے، جاوید ہاشمی اور عامر ڈوگر میں کانٹے دار مقابلہ ہے۔

ملتان کے حلقے این اے 149 پر ضمنی انتخابات کیلئے پولنگ کا سلسلہ صبح آٹھ بجے شروع ہوا، جو شام پانچ بجےتک جاری رہے گا، حلقہ میں کل دو سو چھیاسی پولنگ اسٹیشنوں میں سے ایک سو چھ کو حساس اور سولہ کو انتہائی حساس قرار دیا گیا ہے۔

ضلعی انتظامیہ کی درخواست کے بعد حساس پولنگ اسٹیشنز پر کسی بھی ناخوشگوار واقعے سے نمٹنے کے لیے رینجرز کو بھی تعینات کیا گیا ہے، فوج کر اسٹینڈ بائی پر رکھا گیا ہے۔

پولنگ کے دوران ضلع بھر میں عام تعطیل ہے، آزاد امیدوارجاوید ہاشمی اور عامرڈوگر اور پی پی پی کے ڈاکٹر جاوید صدیقی کے درمیان کانٹے کے مقابلے کی توقع کی جارہی ہے۔

آج کے ضمنی انتخابات کو اس لحاظ سے بھی اہمیت حاصل ہےکہ کل اٹھارہ امیدواروں میں سے صرف ایک امیدوار ایسے ہیں، جو اپنی جماعت پیپلز پارٹی کےٹکٹ پراس میں حصہ لے رہےہیں۔

جاوہدہاشمی اور ملک عامر ڈوگر آزاد امیدوار کے طور پرانتخاب میں حصہ لے رہےہیں لیکن جاوید ہاشمی کو ن لیگ اورعامر ڈوگر کو تحریکِ انصاف کی حمایت حاصل ہے۔

ملتان میں سیکیورٹی ہائی الرٹ ہے، اس موقع پر ضلعی انتظامیہ کی جانب سے سیکیورٹی کے فول پروف انتظامات کئے گئے ہیں، ایک سو چھ پولنگ اسٹیشن حساس قرار دیئے گئے ہیں ، پولیس اور رینجرز کی بھاری نفری موجود ہیں۔

دو ہزار آٹھ کے انتخابات میں جاوید ہاشمی ن لیگ کے ٹکٹ پر کامیاب ہوئے، دو ہزار تیرہ کے انتخابات میں جاوید ہاشمی باغی ہوکر تحریک انصاف میں شامل ہوئے اور تحریک انصاف کے ٹکٹ پر انتخاب جیتا لیکن اب وہ آزاد امیدوارکے طور پرضمنی انتخاب لڑرہے ہیں۔

دوسری طرف آزاد امیدوارعامر ڈوگر جو ایک بار پیپلزپارٹی کے ٹکٹ پر جیت چکے ہیں اور اب انہیں اسی حلقے کے مضبوط سیاسی ستون اور تحریک انصاف کے رہنما شاہ محمود قریشی کی حمایت بھی حاصل ہے۔