ملتان: پاکستان ڈیموکریٹک موومنٹ کے ملتان میں جلسے کے لیے حکومت نے تمام رکاوٹیں ہٹانے کا حکم دے دیا ہے، اپوزیشن جماعتیں آج قاسم باغ اسٹیڈیم میں پاور شو دکھا رہی ہیں۔
تفصیلات کے مطابق پی ڈی ایم کے کارکنوں نے تمام رکاوٹیں ہٹا دی ہیں اور قلعہ کہنہ قاسم باغ اسٹیڈیم میں داخل ہو گئے ہیں، گھنٹہ گھر چوک پر بھی پی ڈی ایم کارکنوں نے پڑاؤ ڈال دیا ہے، پی ڈی ایم قیادت نے کارکنوں کو جلسے کے لیے جلد سے جلد اسٹیج تیار کرنے کی ہدایت کر دی ہے۔
پی ڈی ایم کے جلسے کے باعث ملتان کا سیاسی پارا ہائی ہو چکا ہے، رکاوٹیں ہٹنے پر سربراہ پی ڈی ایم مولانا فضل الرحمان کا قافلہ گھنٹہ گھر پہنچ گیا، کارکن قاسم باغ اسٹیڈیم میں داخل ہو چکے ہیں، بے نظیر بھٹو اور آصف زرداری کی بیٹی آصفہ بھٹو ریلی کی صورت میں گیلانی ہاؤس سے جلسہ گاہ کی جانب رواں دواں ہیں۔
سابق وزیر اعظم یوسف رضا گیلانی گاڑی ڈرائیور کر رہے ہیں، مسلم لیگ ن کی نائب صدر مریم نواز کا قافلہ بھی ریلی کی صورت میں ملتان کی حدود میں داخل ہوگیا ہے۔ مریم نواز نے کہا کہ گرفتاریوں سے ڈرنے والی نہیں، بغیر کسی گناہ کے جیل کاٹ چکی، حکومت خوف زدہ ہے، جلسہ ہونے سے پہلے ہی کامیاب ہو چکا۔
پی ڈی ایم جلسہ، آئی جی پنجاب نے کنٹینرز ہٹانے کا حکم دے دیا
مولانا فضل الرحمان جلسہ گاہ پہنچ چکے ہیں، انھوں نے کہا کہ ہم خاموش لاشیں نہیں، وہ بندوق سے مارے تو کیا ہم ڈنڈے سے بھی نہ ماریں۔
ادھر حکومت نے ملتان میں تمام رکاوٹیں ہٹانے کا حکم دے دیا ہے، فردوس عاشق اعوان نے پریس کانفرنس میں کہا کہ اپوزیشن جو شور مچانا چاہتی ہے مچائے، حکومت رخنا نہیں ڈالے گی، ایس او پیز کی خلاف ورزی پر قانون کے مطابق کارروائی ہوگی، جو قانون کے منہ پر تمانچے مارے گا تو قانون اپنا راستہ خود بنائے گا۔
فردوس عاشق اعوان نے کہا مریم نواز اپنی جماعت کی تباہی کے لیے کافی ہیں، جب کہ آصفہ زرداری کا سیاست میں آنا موروثی سیاست کا تسلسل ہے۔
وزیر اعظم عمران خان کا کہنا تھا کہ مکمل لاک ڈاؤن کے نعرے لگانے والے ایس او پیز بلڈوز کر رہے ہیں، کرونا سے زندگیاں بچانا ہماری پہلی اور معیشت اٹھانا دوسری ترجیح ہے، معیشت سے متعلق تازہ اعداد و شمار حوصلہ افزا ہیں۔
