Tag: ملتان

ملتان: دوحہ سے آنے والی پرواز میں مسافر زیورات سے بھرا پاؤچ چھوڑ گیا، تاہم ملتان ائیر پورٹ پر سی اے اے نے ایمان داری کی ایک اور مثال قائم کر دی۔

تفصیلات کے مطابق ملتان ائیر پورٹ پر گزشتہ روز سی اے اے نے ایمان داری کی ایک اور مثال قائم کر دی ہے، مسافر کا قیمتی پاؤچ جو وہ پرواز ہی میں چھوڑ گیا تھا، واپس کر دیا گیا۔

قطر ایئر ویز کی پرواز QR 618 دوحہ سے ملتان ایئر پورٹ پہنچی تو غلام نبیل نامی مسافر اپنے کالے رنگ کا پاؤچ پرواز ہی میں بھول گیا، جس میں موبائل فون، سونے کے زیورات اور شناختی کارڈ موجود تھا۔

ایئر پورٹ ذرایع کا کہنا ہے کہ شفٹ کے اے پی ایس سپروائزر ثمر خان کو جہاز کلیئرنس کے دوران کالے رنگ کا ایک پاؤچ ملا تھا، جو انھوں نے حکام کے حوالے کیا۔ شناختی کارڈ سے مسافر کی نشان دہی ہونے کے بعد اس کے لیے اناؤنسمنٹ کی گئی جس پر مسافر غلام نبیل کاؤنٹر پر پہنچا۔

سول ایوی اتھارٹی کے عملے نے ایک بار پھر ایمانداری کی مثال قائم کردی

اے آر وائی نیوز کے مطابق ٹرمینل منیجر عبد الماجد کی موجودگی میں مسافر غلام نبیل کو ان کا بھرا ہوا قیمتی پاؤچ لوٹایا گیا۔

دوسری طرف کراچی کے جناح انٹرنیشنل ایئر پورٹ پر بھی دبئی جانے والا مسافر ڈالروں سے بھرا پرس بھول گیا، مسافر فہیم یوسف غیر ملکی ائیر لائن کی پرواز EK 603 کے ذریعے دبئی جا رہا تھا، اے ایس ایف کے کاؤنٹر پر سرچ کے دوران پرس بھول گیا، جس میں 5000 امریکی ڈالر اور دیگر چیزیں موجود تھیں۔ تاہم اے ایس ایف کے سب انسپکٹر نے مسافر کو بین الاقوامی ڈپارچر لاؤنچ میں تلاش کر کے پرس حوالے کر دیا۔

خیال رہے کہ ملک کے متعدد ایئرپورٹس پر اس سے قبل بھی اس طرح کے واقعات رونما ہو چکے ہیں، جن میں سول ایوی ایشن اتھارٹی کے عملے کی ایمان داری سامنے آئی، اور مسافروں کی جانب سے ان کا بھولا ہوا قیمتی سامان انھیں واپس کیا گیا۔

ملتان: جلالپور پیروالا میں حاجی پل کے قریب مبینہ پولیس مقابلے کے دوران پولیس نے 4 ملزمان کو ہلاک کر دیا۔

تفصیلات کے مطابق ملتان کی تحصیل جلالپور پیروالا میں حاجی پل کے قریب ڈاکو روڈ پر ناکا لگا کر لوٹ مار کر رہے تھے، پولیس نے موقع پر پہنچ کر انکاؤنٹر میں چار ڈاکو مار دیے۔

پولیس کا کہنا ہے کہ انھیں 15 پر اطلاع ملی تھی کہ ڈاکو ناکا لگا کر لوٹ مار کر رہے ہیں، جس پر پولیس اہل کار موقع پر پہنچے، فائرنگ کے تبادلے میں 4 ڈاکو ہلاک جب کہ دیگر فرار ہو گئے۔

پولیس کے مطابق جلالپور پیروالا میں ہلاک ڈکیتوں سے کلاشنکوف، موٹر سائیکل اور نقدی برآمد ہوئی، ہلاک ہونے والے ایک ڈاکو کی شناخت شوکت عرف شوکی کلال کے نام سے ہوئی ہے جب کہ باقی کی شناخت تاحال نہیں ہو سکی ہے۔

یہ بھی پڑھیں:  ملتان میں مبینہ پولیس مقابلہ، 4 ڈاکو ہلاک

پولیس کے مطابق ڈاکوؤں کی تعداد چھ تھی، جن میں سے دو فرار ہونے میں کام یاب ہو گئے ہیں، فائرنگ کے تبادلے میں ایس ایچ او تھانہ صدر بھی زخمی ہونے کی اطلاع ہے۔ کارروائی کے دوران ایک پولیس گاڑی کو بھی شدید نقصان پہنچا ہے۔

اطلاعات کے مطابق ڈاکوؤں نے پولیس پارٹی کو دیکھ کر فائرنگ شروع کر دی تھی، فائرنگ کا تبادلہ ایک گھنٹے تک جاری رہا تھا۔ ڈاکوؤں کی لاشیں نشتر اسپتال منتقل کی جا رہی ہیں، جب کہ فرار ہونے والے ڈاکوؤں کو بھی پکڑنے کی کوشش کی جا رہی ہے۔

ملتان: خواجہ سرا بھی مقبوضہ کشمیر کے مظلوم عوام کے لیے سڑکوں پر نکل آئے، انھوں نے مقبوضہ کشمیر میں بھارتی مظالم کے خلاف نواں شہر چوک پر احتجاج کیا۔

تفصیلات کے مطابق ملتان میں خواجہ سراؤں نے نواں شہر چوک پر احتجاج کرتے ہوئے مقبوضہ کشمیر میں انسانیت سوز مظالم پر عالمی برادری کے ضمیر کو جھنجھوڑنے کی کوشش کی۔

مظاہرین نے بھارتی وزیر اعظم نریندر مودی کے خلاف نعرے بھی لگائے، ان کا کہنا تھا کشمیر میں انسانی حقوق کی بد ترین خلاف ورزیاں جاری ہیں اس لیے عالمی برادری اپنا کردار ادا کرے۔

واضح رہے کہ اس سے قبل چوبیس اگست کو کراچی کے خواجہ سراؤں نے بھی کشمیریوں سے اظہار یک جہتی کے لیے پریس کلب پر احتجاجی مظاہرہ کیا تھا، جس میں بڑی تعداد میں خواجہ سراؤں نے شرکت کر کے مودی کے خلاف نعرے لگائے۔

مقررین نے مظاہرے سے خطاب میں کہا کہ مودی کی توپوں کا رخ موڑنے کے لیے ہم خواجہ سرا ہی کافی ہیں، کشمیر پاکستان کا حصہ ہے اور رہے گا، مودی جنگ کی کوشش نہ کرے، ہم ملک کے لیے کسی قربانی سے پیچھے نہیں ہٹیں گے۔

تیس اگست کو بورے والا میں بھی خواجہ سراؤں نے کشمیریوں کے حق میں احتجاجی مظاہرہ کیا تھا، انھوں نے ریلی بھی نکالی، خواجہ سرا آشی چوہدری کا کہنا تھا کہ وزیر اعظم حکم دیں ہم کشمیر جا کر اپنی جانیں قربان کرنے کے لیے بھی تیار ہیں۔