ملتان : قطر کے سابق وزیراعظم اپنے چار رفقاء کے ہمراہ تلور کے شکار کے لیے سخت سیکیورٹی کے حصار میں ملتان سے چولستان کے لیے روانہ ہو گئے ہیں جہاں نایاب پرندوں کا شکار کھیلا جائے گا.

تفصیلات کے مطابق شکار کی غرض سے پاکستان آئے سابق وزیراعظم قطر شیخ حمد بن خلیفہ الثانی و دیگر قطری شہزادے خصوصی طیارے کے ذریعے ملتان ایئر پورٹ پہنچے تھے بعد ازاں قطری شہزادے حکومت کی جانب سے فراہم کردہ خصوصی اجازت کے ساتھ تلور کے شکار کے لیے ملتان سے چولستان روانہ ہو گئے ہیں.

ذرائع کا کہنا ہے کہ ملتان ائر پورٹ پر سیکیورٹی کے سخت انتظامات تھے اور قطری شہزادوں کو سخت سیکیورٹی حصار میں ملتان سے چولستان کے لیے روانہ کیا گیا ہے اور خصوصی شکار گاہ کے اطراف بھی سیکیورٹی کے سخت انتظامات کیے گئے ہیں اور مقامی افراد کو شکار گاہ کی جانب جانے کی اجازت نہیں ہے.

وفاقی حکومت، قطری شہزادوں کو 8 مقامات پر شکار کی اجازت*

چولستان میں موسم سرما کے آغاز سے ہی نایاب پرندوں کی آمد شروع ہوجاتی ہے جو دیگر ممالک سے ہجرت کر کے یہاں پہنچتے ہیں گو کہ محکمہ وائلڈ لائف کی جانب سے نایاب پرندوں کے شکار پر پابندی عائد ہے تاہم غیر ملکی مہمانوں کے لیے خصوصی اجازت ناموں کا اجراء کیا گیا ہے.

*تلور شکار، قطری شہزادے فصلیں تباہ کردیتے ہیں، مقامی افراد کی شکایت

خیال رہے نایاب پرندوں کے شکار کے لیے قطری شہزادوں کی آمد پر حکومت کو سخت تنقید کا سامنا ہے، اپوزیشن قطری شہزادوں پر حکومتی مہربانیوں کو پاناما کیس میں قطری شہزادے کے خط کو قرار دیتی ہے.

ملتان : سینئر سیاستدان مخدوم جاوید ہاشمی نے کہا ہے کہ میرا اور عمران خان کا ڈوپ ٹیسٹ کروا لیا جائے تو سچ کا پتہ چلا جائے گا،انتخابات پر ناکامی سے مایوس ہوکر پوری قوم کو تباہی کی راہ پر لگا دیا۔

وہ ملتان میں میڈیا سے گفتگو کے دوران سربراہ تحریک انصاف عمران خان کے بیان پر ردعمل دے رہے تھے انہوں نے کہا کہ آج کل عمران خان کو ” پلس” بہت یاد آرہا ہے، مجھے اور عمران خان کو قوم کے سامنے بیٹھا کرفیصلہ کرا لینا چاہیے کہ کون سچ بول رہا ہے اور کون دروغ گوئی سے کام لے رہا ہے۔

انہوں نے سربراہ عمران خان کو سخت تنقید کانشانہ بناتے ہوئے کہا کہ عمران خان نے انتخابات میں نتائج سے مایوس ہو کر قوم کو تباہی کے دھانے پر لاکھڑا کیا جب کہ میں نے پہلے ہی بتادیا تھا کہ تحریک انصاف کو 35 سے 40 سیٹیں مل پائیں گی اور پارلیمانی اجلاس میں شاہ محمود قریشی نے بھی اقرار کیا تھا کہ ایک آدھ واقعے کے علاوہ پنجاب میں کوئی دھاندلی نہیں ہوئی ہے۔

اس کے باوجود پوری قوم کو عمومی طور پر اور نوجونوں کو خصوصی طور پر سڑکوں کی خاک چھنوائی گئی جس کا کوئی مثبت نتیجہ نہ نکلنا تھا اور نہ نکلا، یہ بات میں عمران خان کو پہلے ہی بتا چکا تھا جس کی پاداش میں تحریک انصاف سوشل میڈیا ٹیم نے مجھے دو سال تک معتوب کیا۔

ایک سوال کے جواب میں انہوں نے کہا کہ ” آرمی دھرنے میں ملوث نہیں تھی مگر چند عناصر تھے جو راحیل شریف کو ناکام کرنا چاہتے تھے اور عمران خان کے ذریعے پارلیمانی نظام کو تباہ کرنا چاہتے تھے“

سینیئر سیاست داں جاوید ہاشمی ایک سوال کے جواب میں کہا کہ منصوبہ یہ بتایا گیا تھا کہ طاہر القادری آگے جا کر پارلیمنٹ پر قبضہ کریں گے اور پیچھے پیچھے ہم جائیں گے۔

انہوں نے کہا کہ عمران خان نے جوڈیشل مارشل لاء کی بات کی تو میں نے مخالفت کی اور پھر اسپتال میں داخل ہو گیا کیونکہ چاہتا تھا کہ تحریک انصاف اور عمران خان کو ایکسپوز نہ کروں۔

واضح رہے دو روز قبل جاوید ہاشمی نے اپنے ایک بیان میں سربراہ تحریک انصاف عمران خان کے حوالے سے کہا تھا کہ عمران خان نے انہیں چیف جسٹس کی مدد سے جوڈیشل مارشل لاء کی خبر دی تھی جس پر عمران خان کا کہنا تھا کہ جاوید ہاشمی کا دماغی توازن درست نہیں،انہوں نے جھوٹ پلس بولا ہے۔

ملتان: نجی اسکول میں والدین کو مطلع کیے بغیر کی جانے والی پولیس کی فرضی تربیتی مشق کو دہشت گردی کا حملہ سمجھ کر والدین پریشان اور خوف زدہ ہو گئے جب کہ ایک طالب علم کی والدہ بے ہوش ہو گئیں،واقعہ پر سی پی او ملتان نے والدین سے معذرت کر لی۔

تفصیلات کے مطابق ملتان کے بوسن روڈ پر واقع نجی اسکول میں والدین کو پیشگی آگاہ کیے گئے بغیر پولیس اور حساس اداروں کی جانب سے فرضی تربیتی مشق کا انعقاد کیا گیا جس میں پولیس کے اہلکاروں ،ریسکیو ادارے اور بم ڈسپوزل اسکواڈ کی ٹیموں نے حصہ لیا۔ اس دوران پولیس اور دیگر اداروں کی گاڑیاں اسکول کے باہر کھڑی رہیں جنہیں دیکھ کر شہریوں میں خوف و ہراس پھیل گیا۔

دوسری جانب جب والدین کو اطلاع ملی کہ اسکول میں پولیس کی بھاری نفری موجود ہے تو حقیقت سے لاعلم والدین دیوانہ وار اسکول پہنچے اور روتے ہوئے اپنے بچوں کو پکارتے رہے، سیکیورٹی اداروں کے اہلکاروں کی جانب سے وضاحت کے باوجود والدین کو تسلی نہ ہوئی۔

اس دوران ایک والده بچے کو پکارتے ہوئے نیم بےہوشی کی کیفیت میں چلی گئیں جنہیں مقامی افراد نے سنبھالا اور پانی پلایا اور پولیس و اسکول انتظامیہ نے والدہ کو یقین دلایا کہ اسکول پر کوئی حملہ نہیں ہوا ہے بلکہ یہاں صرف تربیتی مشق کی جا رہی ہے تا کہ بچوں کو سمجھایا جا سکے کہ دہشت گردی کے کسی بھی واقعے کے وقت کیا کیا احتیاطی تدابیر کرنی چاہیے۔

صورتِ حال کے بگڑنے اور والدین کے غصے کو دیکھتے ہوئے سی پی او ملتان نے والدین کو ماک ایکسرسائز کی بروقت اطلاع نہ ملنے پر معذرت کی اور آئندہ موک ایکسرسائز سے پہلے اسکول پرنسپل کی اجازت اور طالبِ علم کے والدین کو پیشگی اطلاع دینے کی بھی یقین دہانی کرائی۔