Tag: ملتان

ملتان: پنجاب کے شہر ملتان میں آنکھوں کے ڈاکٹر نے 16 مریضوں کی زندگیوں میں اندھیرا کر دیا۔

تفصیلات کے مطابق ملتان کے ایک علاقے لاڑ میں نجی اسپتال کے ڈاکٹر نے موتیا کے لیے آنکھوں کی سرجری میں غفلت کے باعث ایک ہی روز میں 16 مریضوں کو بینائی سے محروم کر دیا۔

مریضوں کے اہل خانہ نے الزام عائد کیا ہے کہ نجی اسپتال کے میڈیکل کیمپ میں 20 مارچ کو مریضوں کی آنکھوں کا آپریشن کیا گیا تھا، جب پٹی کھولی گئی تو پتا چلا کہ ان کی بینائی ختم ہو چکی ہے۔

آنکھوں کی روشنی چھن جانے پر مریضوں اور لواحقین نے نجی ٹرسٹ اسپتال کے باہر احتجاج کیا، اور محکمہ صحت سے آئی سرجن ڈاکٹر حسنین مشتاق کے خلاف کارروائی کا مطالبہ کیا، تاہم محکمہ صحت نے تاحال نجی اسپتال اور ڈاکٹر کے خلاف کوئی کارروائی نہیں کی۔

رپورٹ کے مطابق جن مریضوں کی آنکھوں کی بینائی گئی، ان میں 7 خواتین بھی شامل ہیں، آپریشن کے چند گھنٹوں بعد ہی ان مریضوں نے آنکھوں میں درد کی شکایت کی تھی۔

آپریشن کے بعد مذکورہ مریضوں کی بینائی مکمل طور پر ختم ہو چکی ہے، نجی اسپتال کے سرجن کا کہنا ہے کہ مریضوں کی بینائی انفیکشن سے متاثر ہوئی ہے، آپریشن میں کوتاہی کے سبب نہیں۔

ملتان: وزیر خارجہ شاہ محمود قریشی نے حکومت کے خلاف اپوزیشن کے اتحاد پاکستان ڈیموکریٹک موومنٹ (پی ڈی ایم) کو بغیر منزل کا کارواں قرار دے دیا۔

تفصیلات کے مطابق آج ملتان دورے کے موقع پر شاہ محمود نے مقامی افراد سے خطاب میں کہا کہ پی ڈی ایم بغیر منزل کا کارواں ہے، اس کو اپنی منزل کا پتا نہیں، کہ اسے کس طرف جانا ہے۔

شاہ محمود قریشی کا کہنا تھا کہ پی ڈی ایم والے پہلے استعفے دے رہے تھے، پھر لانگ مارچ کا شور کیا، اب تحریک عدم اعتماد کی باتیں کر رہے ہیں، مفادات کی بنیاد پر بننے والا اتحاد کبھی کامیابی سے ہم کنار نہیں ہو سکتا۔

انھوں نے کہا لیگی رہنما جھوٹ بول کر عوام کوگمراہ نہیں کر سکتے، عوام کے سامنے ان کی اصلیت عیاں ہو چکی ہے، حکومت کوگرانے کی ان کی خواہش کبھی پوری نہیں ہو سکتی، ہم آئینی مدت پوری کریں گے، اور قومی دولت لوٹنے والوں کو این آر او نہیں ملے گا۔

ن لیگ نے تحریک عدم اعتماد کو دھوکا قرار دے دیا

انھوں نے کرونا ویکسین کے سلسلے میں عوام کو بتایا کہ چین 5 لاکھ ویکسین ڈوزز 31 جنوری تک پاکستان کو تحفتاً مہیا کر دے گا، چین سے درخواست کی ہے کہ ہماری ضرورت 1.1 ملین ہے، جو فروری کے آخر تک مل جائے گی۔

واضح رہے کہ گزشتہ روز پی پی چیئرمین بلاول بھٹو زرداری نے وزیر اعظم عمران خان کے خلاف تحریک عدم اعتماد لانے کا اعلان کیا تھا، اور کہا تھا کہ پی ڈی ایم کی دیگر جماعتوں کو بھی اس پر راضی کرنے کی کوشش کی جائے گی، جب کہ آج ن لیگی ذرائع نے کہا ہے کہ پارٹی تحریک عدم اعتماد کو دھوکا سمجھ رہی ہے، نواز شریف نے بھی اسے مسترد کیا۔