Tag: ملتان

ملتان: وزیر خارجہ شاہ محمود قریشی نے اہم بیان دیتے ہوئے کہا ہے کہ جنوبی پنجاب کو وہی حقوق ملیں گے جو دیگر صوبوں کو ملتے ہیں، اس سلسلے میں ہمیں فی الفور اے آئی جی اور ایڈیشنل چیف سیکریٹری کی تعیناتی کرنا ہوگی۔

اے آر وائی نیوز کے پروگرام باخبر سویرا میں گفتگو کرتے ہوئے پی ٹی آئی رہنما شاہ محمود نے کہا کہ پیپلز پارٹی اور ن لیگ ماضی میں صوبے کے مطالبے کی حمایت کرتی رہی ہیں، جنوبی پنجاب کے عوامی نمایندے اس حوالے سے اپنی قیادت پر دباؤ ڈالیں، خواہ ان کا تعلق پی پی سے ہو یا ن لیگ سے، تاکہ اس علاقے کا دیرینہ مسئلہ حل ہو۔

انھوں نے کہا کہ جنوبی پنجاب سیکریٹریٹ کا ایک حصہ بہاولپور اور دوسرا ملتان میں ہوگا، یہ یکم جولائی سے فکشن کرنا شروع کر دے گا، سیاسی حمایت کے لیے مشاورت کا عمل بھی ساتھ ساتھ جاری رہے گا۔ وزیر اعظم کا کہنا تھا کہ اے آئی جی اور ایڈیشنل چیف سیکریٹری کی تعیناتی اپریل میں ہو جائے گی۔

خیال رہے کہ گزشتہ روز وزیر اعظم عمران خان کی زیر صدارت اجلاس میں بڑا فیصلہ کیا گیا ہے، حکومت نے جنوبی پنجاب صوبے کے قیام کی جانب پہلا قدم اٹھاتے انتظامی سیکریٹریٹ بہاولپور میں قائم کرنے کا اعلان کیا، وزیر خارجہ شاہ محمود قریشی نے کہا کہ جنوبی پنجاب کے لیے تاریخی فیصلے پر وزیر اعظم کا شکریہ ادا کرتے ہیں، جنوبی پنجاب صوبے کے قیام سے متعلق بل جلد قومی اسمبلی میں پیش کیا جائے گا۔

اس سلسلے میں فردوس عاشق اعوان کا کہنا تھا کہ جنوبی پنجاب کے عوام کے ساتھ رشتے کو مضبوط کیا جائے گا، ہم علاقے کے احساس محرومی کا خاتمہ چاہتے ہیں۔

ملتان: پولیس نے شکایت پر ملتان ڈسٹرکٹ بار سے خاتون کو ٹھگنے والا جعلی وکیل گرفتار کر لیا۔

تفصیلات کے مطابق ڈسٹرکٹ بار ملتان سے جعلی وکیل ساتھی سمیت پکڑا گیا، امین الرحمان نامی شخص نے جعلی وکیل بن کر خاتون سے 60 ہزار روپے کیس فیس وصول کی تھی۔

اے آر وائی نیوز کے مطابق ابن سینا اسپتال کے قریب رہایش پذیر خاتون معراج کنول نے امین الرحمان کو اپنے بیٹے کی رہائی کے لیے فیس دی تھی، بیٹا رہا نہ ہونے پر کچہری جا کر خاتون نے سعید احمد بھٹہ ایڈووکیٹ کو شکایت کر دی۔

خاتون کی شکایت پر ڈسٹرکٹ بار کا ریکارڈ چیک کیا گیا تو مذکورہ وکیل کا کوئی ریکارڈ نہ ملا، پولیس تھانہ گلگشت نے اطلاع پر امین الرحمان نامی جعلی وکیل کو ساتھی آصف سمیت حراست میں لے لیا۔

یاد رہے کہ گزشتہ برس اکتوبر میں کراچی میں بھی سپریم کورٹ سے ایک جعلی وکیل کو گرفتار کیا گیا تھا، سلام ولد عبدالسلام نامی شخص اپنے آپ کو وکیل بنا کر کیس کی سماعت کر رہا تھا، جے ایم ویسٹ کی عدالت میں کیس میں دلائل دیتے ہوئے پکڑا گیا، عدالت نے وکالت کی ڈگری مانگی تو اس کی اصلیت سامنے آ گئی، ملزم کو گرفتار کر کے اس کے خلاف ایف آئی آر درج کی گئی۔

ملتان: بستی خداداد میں کم سن بچیوں کی شادیوں پر پولیس نے کارروائی کرتے ہوئے ایک دولھا گرفتار کر لیا۔

تفصیلات کے مطابق ملتان کے ایک علاقے بستی خداداد میں پولیس نے 2 لڑکیوں کی کم عمری میں شادی کی کوشش ناکام بنا دی، پولیس نے ایک دولھا گرفتار کر لیا جب کہ دوسرا فرار ہونے میں کامیاب ہو گیا۔

پولیس کا کہنا ہے کہ ملزمان نے 12، 12 سال کی لڑکیوں کے ساتھ گزشتہ روز نکاح کیا تھا، رخصتی ہو رہی تھی کہ اطلاع ملنے پر پولیس نے چھاپا مارا اور اس کارروائی کے دوران ایک دولھا فرار جب کہ دوسرا پکڑا گیا۔

رپورٹس کے مطابق تھانہ کینٹ کے علاقے بستی خداداد میں 45 سالہ فیصل کی 12 سالہ فائزہ جب کہ 37 سالہ احسن کی 12 سالہ طیبہ سے شادی کی کوشش کی جا رہی تھی۔ رخصتی کی تقریب میں باراتی بھی موجود تھے جو پولیس کو دیکھ کر فرار ہو گئے، پولیس نے لڑکیوں کی رخصتی کی کوشش کو ناکام بناتے ہوئے دولھے احسن کو گرفتار کر لیا۔

پولیس کے مطابق فرار ہونے والے دوسرے دولھے فیصل کی گرفتاری کے لیے کارروائی کی جا رہی ہے، جلد ہی اسے بھی گرفتار کر لیا جائے گا۔ پولیس کا کہنا تھا کہ ملزمان کے خلاف کم عمر لڑکیوں کے ساتھ شادی کرنے پر مقدمہ بھی درج کیا جا رہا ہے۔

بچیوں کے بارے میں معلوم نہیں ہو سکا ہے کہ ان کے والدین کون ہیں، تاہم پولیس نے انھیں اپنی تحویل میں لے لیا ہے۔