کراچی : پولیس نے تیموریہ کے علاقے سے چھینی گئی گاڑی چند گھنٹوں بعد ہی اورنگی ٹاؤن سے برآمد کرلی، ملزمان فرار ہونے میں کامیاب ہوگئے۔
اے آر وائی نیوز کی رپورٹ کے مطابق پولیس نے شہری کی بروقت اطلاع پر کارروائی کرکے ٹریکر کی مدد سے اس کی گاڑی کا تعاقب شروع کیا۔
پولیس کے مطابق ملزمان مذکورہ چھینی گئی گاڑی کو منگھوپیر کے بعد اورنگی ٹاؤن لے کر پہنچے، ملزمان پولیس کو دیکھتے ہی تنگ گلیوں کا فائدہ اٹھاتے ہوئے فرار ہونے میں کامیاب ہوگئے۔پولیس حکام کے مطابق ملزمان کی گرفتاری کیلئے کارروائی شروع کردی گئی ہے۔
اس حوالے سے متاثرہ شہری نے پولیس کو بیان دیا کہ میں شاپنگ مال کے پاس کھڑا تھا کہ اس دوران دو مسلح افراد نے اسلحہ کے زور پر مجھے یرغمال بنالیا۔
متاثرہ شہری نے بتایا کہ ملزمان مجھے اپنے ساتھ لے جانا چاہتے تھے لیکن موقع پاتے ہی میں جان بچا کر بھاگ گیا، جس کے بعد ملزمان میری گاڑی لے کر فرار ہوگئے۔
پولیس کا کہنا ہے کہ گاڑی کو اس میں لگے ٹریکر کی مدد سے برآمد کیا گیا ہے، ملزمان نے ٹریکر نکالنے کی بھی کوشش کی تھی۔
اگر ملزمان تک پہنچنے میں مزید کچھ دیر اور ہوجاتی تو ملزمان کار سے ٹریکر نکال کر فرار ہوچکے ہوتے، شہری نے اپنی چھینی گئی گاڑی ملنے پر ڈسٹرکٹ سینٹرل اور کراچی پولیس کا شکریہ ادا کیا ہے۔
