اسلام آباد : وزیراعظم عمران خان نے وزیراعلیٰ پنجاب عثمان بزدار کو سانحہ چونیاں کا ملزم پکڑے جانے پر مبارکباد دی ہے، ان کا کہنا تھا کہ پی ٹی آئی حکومت میں یہ ٹیسٹ کیس تھا جس میں اللہ نے سرخرو کیا۔
تفصیلات کے مطابق چونیاں میں گزشتہ دنوں ملنے والی چار بچوں کی لاشوں کے کیس کا معمہ حل ہوگیا، پولیس نے سائنسی بنیادوں پر تفتیش کرتے ہوئے سفاک ملزم کو گرفتار کرلیا۔
پولیس کی اس کامیابی پر وزیراعظم عمران خان نے وزیراعلیٰ پنجاب عثمان بزدار کو ٹیلی فون کیا، وزیر اعظم نے سانحہ چونیاں کا ملزم پکڑے جانے پر وزیراعلیٰ اور آئی جی پنجاب کو مبارکباد پیش کی۔
ان کا کہنا تھا کہ پی ٹی آئی حکومت کیلئے یہ ایک ٹیسٹ کیس تھا جس میں اللہ نے ہمیں سرخرو کیا۔
یاد رہے کہ وزیراعلیٰ پنجاب عثمان بزدار نے ایک پریس کانفرنس میں سانحہ چونیاں کے سفاک ملزم سہیل شہزاد کو میڈیا کے سامنے پیش کیا تھا۔
مزید پڑھیں: چونیاں میں بچوں سے زیادتی اور قتل کا ملزم گرفتار
سفاک ملزم سہیل شہزاد کو لاہور منتقل کردیا گیا، ملزم سہیل شہزاد کو سی ٹی ڈی نے تحویل میں لے لیا، سفاک ملزم کو صبح انسداد دہشت گردی کی عدالت میں پیش کیا جائے گا۔
