اسلام آباد : پاکستانی وزارت داخلہ نے ملکی قوانین پر عمل درآمد نہ کرنے والی 18 عالمی این جی اوز کو 60 روز میں ملک چھوڑنے کا حکم جاری کردیا۔
تفصیلات کے مطابق پاکستانی وزارت داخلہ نے این جی اوز سے متعلق اہم اور سخٹ اقدامات اٹھاتے ہوئے پاکستانی قوانین اور قواعد و ضوابط کو تسلیم نہ کرے والی ایک درجن سے زائد عالمی این جی اوز کو ملک چھوڑنے کا حکم دے دیا۔
وزارت داخلہ کے ذرائع کا کہنا ہے کہ وفاقی حکومت کی جانب سے ملک میں کام کرنے والی غیر ملکی این جی اوز پر واضح کردیا ہے کہ جو عالمی این جی اوز پاکستان کے قوانین و ضوابط پر عمل درآمد نہیں کریں گی ان کی اسلامی جمہوریہ پاکستان میں کوئی جگہ نہیں ہے۔
ذرائع کا کہنا ہے کہ وفاقی حکومت نے ملک میں کام کرنے والی 18 عالمی این جی اوز کو پاکستان چھوڑنے کے لیے 60 روز کی مہلت دے دی۔
دفتر داخلہ کے ذرائع کا نے بتایا کہ جن عالمی این جی اوز کو ملک بدری کا حکم دیا گیا ہے ان میں 9 کا تعلق امریکا، تین کا برطانیہ، 2 کا ہالینڈ جبکہ دیگر این جی اوز کا تعلق آئرلینڈ، ڈنمارک، اٹلی اور سوئٹزرلینڈ سے ہے۔
ذرائع کے مطابق پاکستان نے 72 انٹرنیشنل این جی اوز پر پابندی برقرار رکھتے ہوئے کاغذات مکمل کرنے کے لیے مہلت دے دی جبکہ 141 این جی اوز کو گرین سنگل دیتے ہوئے 66 اداروں کو باقاعدہ کام کرنے کی اجازت دی ہے۔
بااثر ذرائع کے مطابق 68 انٹرنیشنل این جی اوز نے ملک کے قواعد و ضوابط تسلیم کرلیے ہیں جس کے تحت وزارت داخلہ کی آڈٹ فرمز سے سالانہ آڈٹ کرانا لازمی ہوگا۔
