Tag: ملک گیر احتجاج

جے یو آئی سربراہ فضل الرحمان نے کم عمر شادی قانون کو قرآن وسنت کے منافی قرار دیتے ہوئے اس کے خلاف ملک گیر احتجاج کا اعلان کر دیا ہے۔

اے آر وائی نیوز کے مطابق جمعیت علمائے اسلام کے سربراہ مولانا فضل الرحمان نے پشاور میں نیوز کانفرنس کرتے ہوئے کہا ہے کہ آئین پاکستان واضح ہے کہ قرآن وسنت کے منافی کوئی قانون سازی نہیں ہو سکتی لیکن اب 18 سال سے کم عمر بچوں کی شادی کے قانون پر یون این قرارداد کا حوالہ دیا جا رہا ہے۔ مغربی دنیا کو راضی کرنے کیلیے اقدامات کرنیوالے آئین اور عوام کے مجرم ہیں۔

فضل الرحمان نے کہا کہ پاکستان اسلام کے نام پر بنا تھا لیکن اس کی شناخت کو ختم کیا جا رہا ہے۔ حکمرانوں کی غلامانہ ذہنیت کی وجہ سے جمہوریت اپنا مقدمہ ہار رہی ہے اور پاکستان کے حکمرانوں کی وجہ سے پارلیمنٹ سے اعتماد اٹھ چکا ہے۔ اس بل کے خلاف تمام عملی اقدامات اور مختلف شہروں میں جلسے کریں گے۔ 29 جون کو ہزارہ ڈویژن میں بڑی کانفرنس منعقد کی جائے گی۔

ان کا کہنا تھا کہ اسلام دنیا کے ساتھ تصادم کرنے والا دین نہیں بلکہ ساتھ چلنے والا دین ہے۔ 18 سال سے کم عمر بچوں کی شادیوں کے بل کو اسلامی نظریاتی کونسل بھی مسترد کر چکی ہے۔ انہوں نے یہ بھی سوال اٹھایا کہ مدارس کی رجسٹریشن سے متعلق قانون سازی کیوں نہیں ہو رہی؟

جے یو آئی سربراہ نے مزید کہا کہ چین کی قیادت میں ایشیا اقتصادی ٹائیگر بننے جا رہا ہے۔ پاکستان اور افغانستان میں سفیر کی سطح پر تعلقات کی بحالی اہم پیشرفت ہے۔

انہوں نے یہ بھی کہا کہ مودی کی حماقتوں کی وجہ سے پاک بھارت کشیدگی بڑھی لیکن بھارتی جنگی جارحیت میں پاکستان کو عزت ملی۔ تاہم ہندوستان کی جانب سے اب بھی جارحیت کے خدشات موجود ہیں لیکن ہمیں پاکستان کی دفاعی قوتوں پر اعتماد ہے۔

مولانا فضل الرحمان نے کہا کہ پی پی کرپشن کے خلاف نہیں بلکہ کرپشن میں اپنا ریکارڈ ٹوٹنے پر احتجاج کر رہی ہے۔ ملک سے کرپشن اس وقت تک ختم نہیں ہو سکتی، جب تک جے یو آئی کی حکومت نہ آئے۔

https://urdu.arynews.tv/president-zardari-signs-bill-prohibiting-child-marriage-into-law/

جماعت اسلامی پاکستان کی جانب سے جمعہ 31 جنوری کو ملک بھر میں آئی پی پیز کے خلاف احتجاج کا اعلان کیا گیا ہے۔

جماعت اسلامی پاکستان کے نائب امیر لیاقت بلوچ نے کہا ہے کہ امیر جماعت اسلامی کے اعلان کے مطابق جمعہ 31 جنوری کو ملک بھر میں آئی پی پیز مافیا کے خلاف بھرپور احتجاج کیا جائے گا۔

لیاقت بلوچ نے اپنے بیان میں کہا کہ حکومت بجلی سستی اور ناجائز ٹیکسز ختم کرے، کیونکہ بجلی، گیس اور تیل سستا ہونے سے ہی ملکی معیشت کا پہیہ چلے گا۔

انہوں نے اسمبلی ممبران سے بھی مطالبہ کیا کہ وہ معاشی بحران کے اس دور میں اپنی تنخواہوں اور مراعات میں اضافہ نہ کریں۔

واضح رہے کہ امیر جماعت اسلامی پاکستان حافظ نعیم الرحمان نے گزشتہ دنوں آئی پی پیز کے خلاف جمعہ 31 جنوری کو ملک گیر احتجاج کرنے کا اعلان کیا تھا۔

ادارہ نورحق میں پریس کانفرنس کرتے ہوئے ان کا کہنا تھا کہ آئی پی پیز مافیا، ان کے سہولت کاروں کے خلاف اور عوام کے حقوق کے لیے 31 جنوری کو پورے پاکستان میں بیک وقت احتجاجی مظاہرے و دھرنے دیے جائیں گے۔

اس پریس کانفرنس میں انہوں نے مطالبہ کیا تھا کہ بجلی کے بل کم اور ناجائز ٹیکسز ختم کیے جائیں، پیٹرول کی لیوی کم کی جائے۔ اربوں روپے کی سرکاری مراعات ختم کی جائیں،تنخواہ دار طبقے کو ریلیف فراہم کر کے جاگیردار طبقے پر ٹیکس عائد کیا جائے۔

لاہور : پی ٹی آئی کے ملک گیر احتجاج سے قبل چھاپوں اور گرفتاریوں کا سلسلہ جاری ہے، پولیس نے 20 سے زائد کارکنوں کو حراست میں لے لیا۔

تفصیلات کے مطابق تحریک انصاف کےملک گیراحتجاج سے پہلے پارٹی رہنماؤں کی گرفتاری کیلئے پنجاب بھرمیں چھاپےاور گرفتاریاں جاری ہیں۔

راولپنڈی میں سابق وزیر قانون راجہ بشارت،راجہ ناصر،راجہ راشد حفیظ، راجہ ماجد حسین دھنیال،اورشہریار ریاض کی گرفتاری کے لیےبھی چھاپےمارے گئے۔

رات بھر چھاپوں کے دوران پولیس نے بیس سے زائد پی ٹی ائی کارکنوں کو حراست میں لیا گیا۔

جہلم میں بھی متعدد پی ٹی آئی کارکنان گرفتارکرلئے گئے جبکہ خان پورمیں کریک ڈاؤن کےدوران دس سے زائد پی ٹی آئی کارکن گرفتارکرلئے گئے۔

پولیس نے کریم پارک میں صدر پی ٹی آئی لاہور کے ڈیرے پر بھی چھاپہ مارا، چوہدری اصغرگجر نے بتایا کہ پولیس نے بغیر وارنٹ میرےڈیرے کی تلاشی لی اور جاتے ہوئے ڈیرے کو باہر سے تالا لگا گئی، پولیس نےبغیر کسی وجہ اور قانونی جواز کے ڈیرے کو تالا لگا دیا ہے۔

پولیس کے مطابق ضلع میں دفعہ ایک سوچوالیس نافذ ہے،کارکنوں کو نقصان امن کے تحت گرفتار کیا گیا ہے۔

خیال رہے پاکستان تحریک انصاف ( پی ٹی آئی )لاہور میں آج 30 مقامات پر احتجاجی مظاہرے کرے گی، نماز جمعہ کے بعد شروع ہونے والے مظاہرے شام تک جاری رہیں گے۔

اسلام آباد : اپوزیشن لیڈر اور  پی ٹی آئی کے رہنما عمر ایوب نے کل ملک گیر احتجاج کا اعلان کرتے ہوئے پاکستانیوں سے بھرپور شرکت کی اپیل کردی۔

تفصیلات کے مطابق پی ٹی آئی کے رہنما عمر ایوب نے تحریک انصاف کے کل ملک گیراحتجاج کے حوالے پیغام میں پاکستانیوں سے احتجاج میں بھرپور شرکت کی اپیل کردی۔

عمر ایوب نے کہا کہ تحریک انصاف کے کارکنان احتجاج میں بھرپور شرکت کو یقینی بنائیں،کل ہمارا پورے ملک میں بھرپور اور پر امن احتجاج ہوگا۔

انھوں نے بتایا کہ احتجاج میں ہمارے تین بنیادی مطالبات ہیں، پہلا بانی ٹی آئی،بشریٰ بی بی اور کارکنان کو رہا کیا جائے، دوسرا حکومت کی جانب سے کی جانےوالی مہنگائی کیخلاف ہے اور تیسرا پاکستان کے مسائل کا حل صاف اور شفاف انتخابات ہیں۔

اپوزیشن لیڈر کا کہنا تھا کہ بانی پی ٹی آئی ایک بارپھروزیراعظم بنیں گےتب ملک ترقی کی راہ پرگامزن ہوگا۔

پشاور : پاکستان تحریک انصاف نے بانی پی ٹی آئی کی رہائی کے لیے ملک گیر احتجاج کا فیصلہ کرلیا۔

تفصیلات کے مطابق وزیرخوراک کے پی ظاہر شاہ طورو نے اپنے بیان میں کہا کہ بانی چیئرمین کی رہائی کے لیے پی ٹی آئی نے ملک گیر احتجاج کا فیصلہ کر لیا ہے، 14 جون کو ملک بھر میں احتجاجی مظاہرے ہوں گے۔

ظاہر شاہ طورو کا کہنا تھا کہ وزیراعلیٰ علی امین گنڈاپور نے بھی صوبے کے تمام اضلاع میں بھرپوراحتجاج کااعلان کیا ہے، احتجاج میں بانی پی ٹی آئی کےخلاف بنائےگئےجعلی کیسزکی بھرپور مذمت کی جائے گی۔

صوبائی وزیر نے کہا آئین اور قانون کی خلاف ورزی کی اجازت کسی کو نہیں دیں گے۔

انھوں نے بتایا کہ مردان میں احتجاجی مظاہرہ شام پانچ بجے ہوگا، کارکن اور عوام مظاہروں میں بھرپور شرکت کریں گے۔

کراچی : پاکستان تحریک انصاف کے رہنما حلیم عادل شیخ کا کہنا ہے کہ پورے پاکستان کی طرح سندھ بھر میں آج احتجاج ہوگا۔

تفصیلات کے مطابق پاکستان تحریک انصاف نے آج ملک گیر احتجاج کا اعلان کیا ہے ، اس حوالے سے رہنما حلیم عادل شیخ نے کہا کہ پورے پاکستان کی طرح سندھ بھر میں آج احتجاج ہوگا، جن کا مینڈیٹ چوری ہوا ہے پوری قوم آج احتجاج ریکارڈ کروائے گی۔

حلیم عادل شیخ کا کہنا تھا کہ سندھ سے ہماری 22 قومی اور 38 صوبائی نشتیں چھینی گئی ہیں، پورے ملک میں 100 سے زائد ہماری قومی اسمبلی کی نشستیں چھینی گئی ہیں، ہم اپنے آئینی حق کے لئے میدان میں نکل رہے ہیں۔

رہنما پی ٹی آئی نے مزید کہا کہ 5سال کیا یہ حکومت 5 ماہ بھی نہیں رہے گی، ہمارا مینڈیٹ چوری کر کے ایم کیو ایم وزارتیں مانگنے گئی تھی۔

ان کا کہنا تھا کہ چوری کا مال نہیں بکا کیوں کہ چوری کی گاڑی نہیں بکتی،جنہوں نےبرے وقت میں پی ٹی آئی کو چھوڑا وہ خوار ہوں گے۔