کوالالمپور: وزیرخارجہ شاہ محمود قریشی نے کہا ہے کہ ملک میں ریونیو کی مد میں 16 فیصد اضافہ ہوا، مثبت معاشی پالیسیوں کے سبب بیرونی سرمایہ کاروں کا اعتماد بحال نظرآرہا ہے۔
تفصیلات کے مطابق ملیشیئن دارالحکومت کوالالمپور میں شاہ محمودقریشی نے پاکستانی نژاد سلطانہ کلثوم آف پاہنگ کے ظہرانے سے گفتگو کرتے ہوئے کہا کہ سخت فیصلوں کی بدولت معاشی استحکام کی طرف بڑھ رہے ہیں۔
انہوں نے کہا کہ 3 سال میں پہلی مرتبہ سرمایہ کاری کا حجم340ملین ڈالر تک پہنچا، اسٹاک مارکیٹ میں 21فیصد تک بہتری کا رحجان دیکھنے میں آیا، معیشت کو پرکھنے کیلئے قائم تمام اشاریے بہتری کی نوید سنا رہے ہیں۔
شاہ محمودقریشی کا کہنا تھا کہ 2019 کی پہلی سہ ماہی تجارتی خسارہ 35 فیصد اور مالی خسارہ 36فیصد کم ہوا، پی ٹی آئی کو جس وقت حکومت ملی معاشی حالت دگرگوں تھی، معاشی اشاریے ہماری زبوں حالی کی تصویر پیش کررہے تھے۔
انہوں نے بتایا کہ معاشی خسارہ بڑھتا جارہا تھا، قرضوں کے بوجھ سے نڈھال تھے، معاشی بحران سے نکلنے کیلئے بہت سے مشکل فیصلے کرنا پڑے، حکومت کاروبار میں آسانیاں پیدا کرنے کے لئے کاوشیں کررہی ہے۔
وزیرخارجہ سرکاری دورے پر ملیشیا پہنچ گئے، مہاتیرمحمد سے اہم ملاقات ہوگی
وزیرخارجہ کا ظہرانے سے خطاب کرتے ہوئے کہنا تھا کہ عالمی بینک کی درجہ بندی 28درجے عبور کرکے ٹاپ ٹن میں شامل ہوگئے، ملک میں جلد معاشی معاملات سنبھل جائیں گے۔
دریں اثنا وزیرخارجہ نے ملائشین بزنس کمیونٹی کو مختلف شعبوں میں سرمایہ کاری کی دعوت دی، ملائشین بزنس کمیونٹی نے پاکستان میں بڑی سرمایہ کاری کا عندیہ دے دیا، شاہ محمود قریشی نے پاکستان میں سرمایہ کاری کے مواقع اور سہولتوں سے بھی آگاہ کیا۔
