کراچی: ٹریفک پولیس نے شہر قائد میں ملین مارچ کے پیش نظر میں متبادل روٹ پلان جاری کردیا ہے ، جس میں کہا گیا ہے کہ شہر کی اہم سڑکیں ٹریفک کے لیے بند ہوں گی۔
تفصیلات کے مطابق کراچی میں ملین مارچ کے سلسلے میں ٹريفک پوليس نے متبادل روٹ پلان جاری کرديا، جس میں بتایا گیا ہے ہے کہ شہر کی اہم سڑکیں ٹریفک کے لیے بند ہوں گی۔
ٹریفک پولیس کا کہنا ہے کہ ملین مارچ کی وجہ سےنیو پریڈی اسٹریٹ اورکارساز روڈبندہوگا، اسٹیڈیم کے اطراف فلائی اوور بھی بندہوں گےجبکہ دوپہر 2 بجے پارکنگ پلازہ روڈ کو ٹریفک کے لیے بند کرديا جائےگا۔
حکام کے مطابق صدر دواخانہ سے ٹریفک کوڈائی ورژن دی جائے گئی اور ٹاور سے آنے والاٹریفک پریڈی چوک اور ایم اے جناح روڈ بھیجا جائے گاجبکہ ہیوی ٹریفک، بس اور کوچز کو پریڈی چوک کی طرف موڑدیاجائےگا۔
ٹریفک پولیس نے کہا ہے کہ چھوٹی گاڑیوں کو پریڈی چوک سے ایم اے جناح روڈ کی طرف اور جیل چورنگی سےآنے والاٹریفک کشمیر روڈ شارع قائدین موڑ دیا جائے گا اور یونیورسٹی روڈ سےآنےوالا ٹریفک گرومندر ایم اے جناح روڈ پر بھیجا جائے گا۔
حکام کا کہنا تھا کہ دوپہر 2 بجے پیپلز چورنگی کٹ بند کیاجائے گا جبکہ کارساز روڈ، ملینیم روڈ اور نیو ٹاون روڈ کو بھی بند کردیاجائے گا جبکہ یونیورسٹی روڈ کو بند نہیں کیا جائے گا اور اسٹیڈیم روڈپرواقع اسپتال جانے کی اجازت ہوگی۔
خیال رہے جمیعت علمائے اسلام (ف) آج کراچی میں اسرائیل نامنظور ملین مارچ نکالے گی، مولانا فضل الرحمٰن نے پی ڈی ایم کی قیادت کو بھی شرکت کی دعوت دی ہے، ملین مارچ کا قافلہ سہراب گوٹھ سے چلے گا اور نمائش پہنچے گا۔
اسلام آباد: جمعیت علمائے اسلام (ف) کے رہنما مولانا عبدالغفور حیدری نے کہا ہے کہ حکومت مختلف حربوں سے انھیں بلیک میل کرنے کی کوشش کر رہی ہے۔
تفصیلات کےمطابق آج سینیٹ اجلاس میں عبدالغفور حیدری نے بتایا کہ حکومت نے ڈرانے دھمکانے کی کوشش کی ہے جب ہم نہیں ڈرے تو فضلالرحمان کی سیکورٹی واپس لے لی گئی۔
انھوں نے اجلاس میں کہا کہ مولانا فضل الرحمان پرماضی میں متعدد خود کش حملے ہوئے، اگر انھیں کچھ ہوا تو وزیر اعظم اور وزیر داخلہ کے خلاف مقدمہ درج کرائیں گے۔
عبدالغفور حیدری نے کہا ہمارے ساتھ پولیس کی سیکورٹی کیوں واپس لی گئی، آئی جی سے رابطے پر کہا گیا کہ اوپر سے آرڈر ہے، حکومت جے یو آئی ف کو تنگ کر رہی ہے، مختلف طریقوں سے فضل الرحمان کو تنگ کیا جا رہا ہے۔
عبدالغفور حیدری کا کہنا تھا کہ 14 جولائی کو کوئٹہ میں ملین مارچ کریں گے، 21 جولائی کو پشاور میں ملین مارچ ہوگا، اس حکومت کے خلاف جو کچھ ہو سکے گا کریں گے، کوئٹہ اور پشاور کے بعد اسلام آباد کا رخ کریں گے، ہمارے ملین مارچ نے حکومت کی نیندیں اڑا دی ہیں۔
جے یو آئی رہنما نے کہا کہ پُرامن طریقے سے اپنی جدوجہد جاری رکھی ہوئی ہے، لیکن حکمرانوں کو خدشہ ہے کہ ان مظاہروں سے حکومت ہی نہ چلی جائے۔
خرطوم : سوڈان میں مظاہرین کے رہنماوں نے دھمکی دی ہے کہ اگر ملک کے فوجی حکمرانوں نے ان کے مطالبات نہ مانے اور اقتدار سویلین انتظامیہ کو نہ سونپا گیا، تو وہ عام ہڑتال کی کال دے سکتے ہیں۔
تفصیلات کے مطابق گزشتہ روز ایک مظاہرے سے خطاب کرتے ہوئے مظاہرین کے رہنما صدیق فاروق نے کہا کہ اگر ملکی فوج عبوری حکومت سے الگ نہیں ہوتی، تو وہ ملین مارچ اور ملک بھر میں پہیہ جام ہڑتال بھی کر سکتے ہیں۔
حال ہی میں بڑے عوامی مظاہروں کے بعد سوڈان میں برسوں تک حکومت کرنے والے عمر البشیر کا اقتدار ختم ہو گیا تھا، تاہم تب سے اقتدار عبوری طور پر ملکی فوج کی ایک کونسل نے اپنے ہاتھ میں لے رکھا ہے۔
خیال رہے کہ عالمی تنظیموں سمیت افریقہ کی یونین نے بھی سوڈانی فوج پر ڈباؤ ڈالا تھا کہ وہ سویلین تک اقتدار منتقل کرنے کے لیے حکمت عملی تیار کرے۔
غیر ملکی خبر رساں ادارے کا کہنا ہے کہ افریقی یونین کے رہنماؤں نے قاہرہ میں منعقدہ اجلاس میں سوڈان میں حکمران فوجی کونسل کو ملک میں جمہوری اصلاحات کے لیے تین ماہ کی مہلت دی ہے۔
قبل ازیں سوڈان کی عبوری فوجی قیادت کو اقتدار کی سول قیادت کو منتقلی کے لیے گزشتہ ہفتے صرف پندرہ دن کی مہلت دی تھی، جو اب تین ماہ کردی گئی تھی۔
دریں اثنا افریقی یونین کے ایک سربراہی اجلاس کے بعد مصری صدر السیسی نے منگل کے روز قاہرہ میں کہا کہ سمٹ کے شرکاء نے سوڈانی فوج کو مزید وقت دینے کا فیصلہ کیا ہے۔
خیال رہے کہ سوڈان کی فوجی کونسل کے سربراہ و وزیر دفاع عود بن عوف نے سابق آمر عمر البشیر کا تختہ الٹنے کے ایک دن بعد ہی استعفیٰ دے دیا تھا، عود ابن عوف نے اپنے فیصلے کا اعلان سرکاری ٹی وی پر کیا۔
فوجی کونسل کے سربراہ عود بن عوف نے لیفٹیننٹ جنرل عبدالفتاح عبدالرحمان برہان کو اپنا جانشین نامزد کردیا، فوج کا کہنا ہے کہ 2 سال تک اقتدار میں رہنے کے بعد انتخابات کرائے گی۔
یاد رہے کہ سوڈانی عوام گزشتہ تین مہینوں نے صدر عمر البشیر کے خلاف مظاہرے کررہے تھے، صدر عمر حسن البشیر صدارت سے مستعفی ہوگئے جس کے بعد انہیں فوج نے گرفتار کرکے نظر بند کردیا تھا اور وہ تاحال نظر بند ہیں۔
کراچی : امریکی صدر کی جانب سےبیت المقدس کو اسرائیل کا دارالحکومت تسلیم کرنے کے خلاف جماعت اسلامی اور دیگر مذہبی جماعتیں آج کراچی میں ملین مارچ کریں گی۔
تفصیلات کے مطابق بیت المقدس کو اسرائیلی دارالحکومت بنانے اور امریکی صدر ٹرمپ کے وہاں سفارت خانہ کھولنے کے فیصلے کیخلاف کراچی میں مذہبی جماعتیں آج ملین مارچ کریں گی۔
القدس ملین مارچ کی قیادت امیر جماعت اسلامی سراج الحق کریں گے، مارچ میں سنی تحریک اور دیگر مذہبی جماعتیں بھی شریک ہوں گی۔
جماعت اسلامی کے ترجمان کے مطابق القدس ملین مارچ ملکی تاریخ کا سب سے بڑا عوامی مظاہرہ ہوگا۔ احتجاجی مظاہرے میں فلسطینی مسلمانوں کی جدوجہد سے اظہار یکجہتی بھی کیا جائے گا۔
یاد رہے کہ امریکی صدر نے یروشلم کو اسرائیل کا دارالخلافہ تسلیم کرنے کا سرکاری اعلان کیا تھا جس کیخلاف
دنیا بھر میں مظاہروں کا سلسلہ جاری ہے، امریکی صدر کا کہنا تھا کہ یروشلم کو اسرائیل کا دارالحکومت تسلیم کرنے کا معاملہ کافی عرصے سے سرد خانے میں تھا تاہم آج یروشلم کو اسرائیل کا دارالخلافہ تسلیم کرلیا گیا ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
لاہور : امیر جماعت اسلامی سراج الحق نے کہا ہے کہ معاشرے کو سیاست دان یا اسلحہ نہیں بچا سکتے ہیں بلکہ معاشرے کا اصل دفاع دین اور مضبوط خاندانی نظام ہے.
امیرجماعت اسلامی لاہور میں اپنے مرکزی دفتر میں علماء و مشائخ کو دیئے گئے عشایئے سے خطاب کر رہے تھے انہوں نے کہا کہ مسئلہ الیکشن کی جیت کا نہیں اس امت کی بقا کا ہے.
سراج الحق نے کہا کہ امت مسلمہ اس وقت مشکل دور سے گزر رہی ہے اور استعماری اور طاغوتی قوتیں آپس میں متحد ہو کر امریکا کے زیر سایہ مسلمانوں پر حملہ آور ہو چکے ہیں.
انہوں نے کہا کہ دین کی کچھ قوتیں ایم ایم اے میں شامل ہوچکی ہیں کیوں کہ ظالم سرمایہ داروں کے مقابلے کے لیے متحد ہونا بہت ضروری ہے جس کو مد نظر رکھتے ہوئے ایم ایم کی بحالی کےعمل میں تیزی سے گامزن ہیں.
سراج الحق نے کہا کہ دین ی قوتیں امانتدار اور شفاف قیادت کے ذریعے ملک کے دریرنہ مسائل کو حل کرنے کی مکمل صلاحیت رکھتے ہیں جس سے حقیقی انقلاب برپا ہوگا.
انہوں نے مزید کہا کہ فلسطینیوں سے اظہار یکجہتی کے لیے 17 دسمبر کو کراچی میں ملین مارچ کیا جائے گا اور عوام کی بھرپور قوت بیت المقدس پر امریکی موقف کو تبدیل کرنے پر مجبور کردے گی.
امیر جماعت اسلامی کا کہنا تھا کہ او آئی سی ایشو بیت المقدس کے معاملے پر امریکا کا بائیکاٹ کرے اور اسلامی ممالک کے حکمرانوں کو بھی چاہیئے کہ امریکا سے اسلحہ خریدنا بند کر دیں جب عوام الناس امریکا کی تمام مصنوعات کا مکمل بائیکاٹ کریں.
لاہور : امیر جماعت اسلامی سراج الحق نے کہا ہے کہ بیت المقدس کو اسرائیل کا دارالحکومت تسلیم کرنے متنازعہ امریکی فیصلے کے خلاف ملک بھر میں ملین مارچ کریں گے جوعالم اسلام کی تاریخ کا سب سے بڑا مارچ ہوگا۔
ان خیالات کا اظہار انہوں نے لاہور میں پریس کانفرنس کرتے ہوئے کیا، امیر جماعت اسلامی کا کہنا تھا کہ امریکا نے خطے میں قیام امن کی کوششوں کو سبوتاژ کر کے مشرق وسطیٰ میں آگ لگا دی ہے جسے قبول نہیں کیا جائے گا۔
سنیٹر سراج الحق نے لاہور میں پریس کانفرنس سے خطاب کرتے ہوئے کہا کہ امریکا اسرائیل کو دارالحکومت تسلیم کرنے کے فیصلے پر قائم رہے تو معاشی تعلقات منقطع کر دینے چاہئیں۔
انہوں نے مزید کہا کہ فلسطین کامسئلہ اہم ہے جس کے لیے عالم اسلام کے حکمرانوں پر بڑی ذمے داری بنتی ہے اس لیے عالم اسلام کے حکمرانوں سے اپیل ہے کہ ترکی کے مؤقف کی تائید کریں۔
امیر جماعت اسلامی نے حکومت کو تنقید کا نشانہ بناتے ہوئے کہا کہ موجودہ حکومت کی کارکردگی درست نہیں ہے جنہوں نے قوم کو دہشت گردی اور مہنگائی کا تحفہ دیا ہے اور اپنی کرپشن اور نااہلی کے باعث نوازشریف نااہل، اسحاق ڈاراشتہاری اور زاہد حامد مستعفی ہوچکے ہیں۔
انہوں نے کہا کہ یہ ایک افسوسناک صورت حال ہے جس میں کارِ مملکت کو رواں رکھنا ناممکن ہو گیا ہے دوسری جانب تاحال ہمارے کرپٹ حکمرانوں نے کبھی پارلیمنٹ کو اہمیت نہیں دی چنانچہ اس افسوسناک صورت حال کا حل صرف اور صرف بروقت انتخابات ہیں۔
امیر جاعت اسلامی نے کرپشن کے خلاف اپنے عزم کا اعادہ کرتے ہوئے کہا کہ جماعت اسلامی کرپشن کے خلاف اپنی مہم جاری رکھے گی کیوں کہ ہمارا ماننا ہے کہ کرپشن کے خاتمے کے بغیر پاکستان ترقی نہیں کرسکتا۔
اس موقع پر امیرجماعت اسلامی نے مطالبہ کیا کہ جتنے سیاست دانوں کے مقدمات زیر التواء انہیں فوری طور نمٹایا جائے اور کرپٹ شخص کے انتخابات میں حصہ لینے پر پابندی عائد کردی جائے تاکہ پارلیمنٹ تک صرف صادق اور امین افراد پہنچ سکیں۔
ایک سوال کے جواب میں انہوں نے بتایا کہ قبائلی عوام کا خیبرپختونخواہ کے ساتھ انضمام سے متعلق مطالبہ منظورکیا جائے جس کے لیے قبائلی عوام کا لانگ مارچ کل اسلام آباد میں ہوگا اس لیے قبائلی عوام کی دل شکنی کے بجائے اُن کے مطالبات منظور کئے جائیں۔
سانحہ ماڈل ٹاؤن کی انکوائری رپورٹ سے متعلق ان کا کہنا تھا کہ جسٹس باقر نجفی رپورٹ میں جسے ذمے دار قرار دیا گیا ہے اسے سخت سے سخت سزا دی جائے تاکہ ایسے سانحات دوبارہ رونما نہ ہوں۔
کراچی: شاہراہ فیصل پر واقع عائشہ باوانی کے قریب پی ایس پی کارکنان سے کشیدگی کے بعد پولیس نے مصطفیٰ کمال سمیت اور مرکزی قیادت سمیت سینکڑوں کارکنان کو گرفتار کرلیا۔
تفصیلات کے مطابق شاہراہ فیصل پر واقع عائشہ باوانی کے قریب انتظامیہ سے مذاکرات میں ناکامی کے بعد پاک سرزمین پارٹی کے کارکنان نے شاہراہ فیصل کے دسرے ٹریک کو بند کیا تو پولیس کی جانب سے لاٹھی چارج شروع کردیا گیا۔
لاٹھی چارج کے بعد مظاہرین اورپولیس میں کشیدگی شروع ہوئی جس کے بعد پولیس نے واٹر کینن کا استعمال کیا اور شیلنگ کی، جس کے نتیجے میں پی ایس پی کے رہنما انیس قائم خانی پوری طرح بھیگ گئے، پولیس نے کریک ڈاؤن کا آغاز کرتے ہوئے مصطفیٰ کمال سمیت پی ایس پی کی مرکزی قیادت کو حراست میں لے لیا۔ گرفتارشدگان میں ڈاکٹر صغیر،رضا ہارون اور دیگر شامل ہیں۔
مصطفیٰ کمال کا گرفتاری کے بعد پیغام
گرفتاری کے بعد مصطفیٰ کمال نے میڈیا سے گفتگو کرتے ہوئے اپنی گرفتاری کی تصدیق کرتے ہوئے کہا کہ پولیس نے معصوم بچوں اور خواتین پر شیلنگ کی، انتظامیہ نے یہ کام کر کے ہمارا کام بہت آسان کردیا، اب کراچی کے ہر علاقے میں مظاہرہ ہوگا۔ مصطفیٰ کمال نے کراچی کے عوام سے اپیل کی کہ وہ باہر نکلیں اور اپنے علاقوں میں مظاہرے شروع کریں۔
ایس ایس پی بلدیہ عبد الرزاق نے مصطفیٰ کمال کو تحویل میں لے کر تھانہ کلاکوٹ منتقل کردیا۔ مرکزی قیادت کی گرفتاری کے بعد پی ایس پی کارکنان شاہراہ فیصل سے منتشر ہوگئے اور پولیس نے مرکزی کیمپ اکھاڑ دیا اور گاڑیوں کو سڑک سے ہٹا کر شاہراہ فیصل کو ٹریفک کے لیے کھول دیا گیا۔
آئندہ کا لائحہ عمل
بعد ازاں پی ایس پی کے کارکنان پاکستان ہاؤس پہنچے اور آئندہ کا لائحہ عمل طے کرنے کے لیے اعلیٰ سطح کی مٹینگ بلائی، اسی دوران کارکنان کو اس بات کا علم ہوا کہ مرکزی رہنما آفاق جمال پیر پر گولی لگنے سے زخمی ہوئے۔
پی ایس پی اسٹوڈنٹ ونگ نے پولیس کریک ڈاؤن کے خلاف کل یوم احتجاج کااعلان کرتے ہوئے کہا کہ کراچی، حیدرآباد، سکھر سمیت تمام جامعات میں کل احتجاج کیا جائے گا جبکہ انیس قائم خانی نے اے آر وائی سے خصوصی گفتگو کرتے ہوئے کہا کہ پاکستان ہاؤس میں ہونے والی مٹینگ میں بڑے فیصلے کیے جائیں گے۔
صوبائی وزیر ناصر حسین شاہ کا مؤقف
دوسری جانب صوبائی وزیر ناصر حسین شاہ نے اے آر وائی سے خصوصی گفتگو کرتے ہوئے کہا کہ کراچی کے عوام نے ملین مارچ کو مسترد کردیا، دس لاکھ لوگوں کو جمع کرنے کا دعویٰ کرنے والے 1 ہزار لوگ بھی جمع نہیں کرسکے۔
انہوں نے کہا کہ پاک سرزمین پارٹی سے مذاکرات کے لیے پی پی کا وفد گیا تھا مگر پی ایس پی نے مسترد کردیا، سندھ حکومت کسی بھی جماعت کو عوام کی پریشانی کا سبب نہیں بننے دے گی، پی ایس پی کے عزائم کا سب کو علم ہے اس لیے عوام نے انہیں مسترد کردیا۔ صوبائی وزیر نے پی ایس پی کے رہنماء انیس ایڈوکیٹ کو چیلنج دیا کہ اگر ہمت ہے تو شہر بند کر کے دکھاؤ۔
مختلف علاقوں میں حالات کشیدہ
پی ایس پی ریلی پر پولیس کریک ڈاؤن کے بعد لیاقت آباد، نیوکراچی، نارتھ کراچی سمیت مختلف علاقوں میں صورتحال کشیدہ ہوگئی ہے، جس کو قابو میں کرنے کے لیے پولیس اور رینجرز کے گشت کو بڑھا دیا گیا۔
مقدمہ درج کرنے کی تیاری
نمائندہ اے آر وائی نذیر شاہ کے مطابق مصطفیٰ کمال اور 10 کارکنان کو کلاکوٹ تھانے منتقل کردیا گیا، پولیس ذرائع نے نمائندہ اے آر وائی کو بتایا کہ پی ایس پی رہنماؤں کے خلاف مقدمہ درج کرنےغور کیا جارہا ہے۔
اطلاعات سامنے آئی ہیں کہ پی ایس پی قیادت پرمقدمہ کے معاملے پر وفاق اورسندھ حکومت میں ٹھن گئی، وفاقی حکومت نے پاک سرزمین پارٹی کے سربراہ اور قیادت کو رہا کرنے کا مطالبہ کردیا جبکہ سندھ حکومت مقدمات درج کروانے پر بضد ہے۔
صوبائی حکومت سے مشاورت کے بعد پاک سرزمین پارٹی کی مرکزی قیادت دفعہ 144 سمیت دہشت گردی ایکٹ کے تحت مقدمات درج کروائے جانے کا امکان ہے کیونکہ ریلی کے منتظمین کے پاس ایسٹ زون کی حد تک کا این او سی موجود تھا۔
مصطفیٰ کمال کی تھانے منتقلی کے بعد پی ایس پی کارکنان کی بڑی تعداد تھانے کے باہر پہنچ گئی اور وقفے وقفے سے نعرے لگائے جارہے ہیں، نقص امن کی صورتحال کے باعث پولیس کی بھاری نفری کو تھانے کے باہر تعینات کردیا گیا اور مرکزی دروازے کو بھی بند کردیا گیا۔
قبل ازیں پاک سرزمین پارٹی اور انتظامیہ کے درمیان مذاکرات ناکام ہوئے جس کے بعد ملین مارچ دوبارہ وزیراعلیٰ ہاؤس کی جانب روانہ ہوا۔ پی پی رہنماؤں کا کہنا ہے کہ پی ایس پی کے مطالبات پرغورکیا جائے گا۔
جبکہ پی ایس پی کے رہنماؤں نے کہا ہے کہ مذاکرات سے انکار نہیں کیا ہے البتہ جسے ٹھوس اور مثبت مذاکرات کرنا ہے وہ ہمارے ملین مارچ میں آکر کر لیں۔ سولہ مطالبات میں سے10پہلےہی منظورکیے جا چکےہیں، کچھ مطالبات ایسےہیں جن میں قانونی پیچیدگیاں ہیں جنہیں دورکرنے کےبعدہی مطالبات پرعمل ہوگا۔
اس حوالے سے پی ایس پی کے رہنما رضاہارون کا کہنا تھاکہ انتظامیہ مطالبات کی منظوری کیلئےسنجیدہ نہیں ہے،
انہوں نے متنبہ کیا کہ مطالبات کی منظوری تک ملین مارچ کسی صورت نہیں رکےگا۔
کراچی پولیس نےملین مارچ کےشرکاکوروکنےکے لیےکمر کس لی ہے اور ایف ٹی سی کے بعد ہوٹل میٹرو پول پر ملین مارچ کے شرکاء کو روکنے کی کوشش کی جائے گی جہاں واٹر کینین بھی پہلے سے موجود ہیں۔
دوسری جانب ملین مارچ کےروٹ پرجناح اسپتال پل کے نیچے ترقیاتی کام بھی جاری ہے اور ریجنٹ پلازہ کےسامنےپل کےنیچے14فٹ تک کھدائی کی جارہی ہے جسے پار کرنے کے لیے پاک سرزمین پارٹی کے کارکنان حکمت عملی طے کر لی ہے۔
واضح رہے پاک سرزمین پارٹی آج نے اپنے 16 نکات کی منظوری کے لیے ملین مارچ کا اعلان کیا تھا جس کے بعد ایف ٹی سی چیئرمین مصطفیٰ کمال کی قیادت میں ملین مارچ وزیراعلیٰ ہاؤس کی جانب رواں دواں ہے۔
لاہور : جماعت اسلامی کے سیکرٹری جنرل لیاقت بلوچ نے کہا ہے کہ مصر کے سابق صدر محمد مرسی کی سزا کے خلاف اسلام آباد میں ملین مارچ کیا جائے گا۔
جماعت اسلامی کی جانب سے محمد مرسی کی سزائے موت کے خلاف لاہور میں احتجاج کرتےہوئے لیاقت بلوچ کا کہنا تھا کہ نام نہاد عدالتوں نے اخوان المسلین کے قائد مرسی کو سزا ئے موت سنائی، ہم اس فیصلے کو تسلیم نہیں کرتے۔
انہوں نے کہا کہ محمد مرسی طویل مدت سے اسلام کے لئے قربانیاں دے رہے تھے عالم اسلام ان کی سزا پراب کیوں خاموش ہے۔
لیاقت بلوچ کا کہنا تھا کہ مصر کے عوام پاکستان سے محبت کرتے ہیں ہمارے حکمرانوں کو اس معاملے پر خاموشی ختم کرنی چاہیئے۔
لیاقت بلوچ نے کہا کہ جیل اور سلاخیں اسلامی تحریک کا راستہ نہیں روک سکتیں۔ انہوں نے کہا کہ امیر جماعت اسلامی سراج الحق احتجاج کی کال دیں گے اور محمد مرسی کی سزائے موت کے خلاف اسلام آباد میں ملین مارچ ہوگا۔
کراچی: فرانسیسی میگزین میں گستاخانہ خاکوں کی اشاعت کے خلاف مذہبی جماعتوں کے تحت کراچی میں احتجاجی ریلیاں اور ملین مارچ نکالے گئے، مذہبی رہنمائوں نے فرانسیسی حکومت سے معافی اور فرانسیسی مصنوعات کے بائیکاٹ کا مطالبہ کر دیا،سراج الحق کا کہنا ہے کہ ناموس رسالت ﷺ پر خون کا آخری قطرہ بھی قربان کر دینگے ۔
فرانسیسی جریدے میں شائع ہونے والے توہین آمیز خاکوں کے خلاف کراچی میں مذہبی جماعتوں کی جانب سے سرور کائنات ﷺ سے محبت کے اظہار اور دین اسلام کے خلاف ہونے والی سازشوں سے نفرت کے اظہار کے لیے احتجاجی مظاہرے اور ملین مارچ کیے گئے ۔
جماعت اسلامی کے تحت یونیورسٹی روڈ پر ملین مارچ سے خطاب میں سراج الحق کا کہنا تھا کہ ناموس رسالت ﷺ پر خون کا آخری قطرہ بھی قربان کر دیں گے،تمام سیاسی جماعتیں ناموس رسالت ﷺ پر متحدہ ہو جائیں ۔
سراج الحق کا کہنا تھا کہ انہوں نے مسلم ممالک کے رہنماؤں کوکہا ہے کہ ملکراحتجاج کرتے ہیں۔ وزیراعظم سے اپیل کی تھی کے او آئی سی کا اجلاس بلائیں۔ اوآئی سی کا اجلاس نہ بلانے پرمختلف ممالک کے سربراہوں سے رابطہ کیا۔
امیر جماعت اسلامی نے کہا کہ فرانسیسی مصنوعات کا بائیکاٹ اور سفیر کو ملک بدر کیا جائے
تحریک حرمت رسول کےتحت کراچی میں ملین مارچ کیا گیا جس کی قیادت پروفیسر حافظ محمد سعید نے کی، حافظ سعید نے کہا کہ وزیراعظم پاکستان اسلام آباد میں تمام مسلم حکمرانوں کا اجلاس بلا کر ناموس رسالت ﷺ پر عالمی سطح پر قانون سازی کرائیں ۔
اس موقع پر امیر جماعت اسلامی سراج الحق نے ایم کیوایم کے قائد الطاف حسین کو شدید تنقید کا نشانہ بناتے ہوئے کہا کہ ریلی فرانس کے سفارت خانے کی جانب جارہی تھی، نائن زیرو تو نہیں گئی تھی۔
گستاخانہ خاکوں کے خلاف جمعیت علمائے پاکستان نے محمد انس نورانی کی قیادت میں ریلی نکالی، مذہبی رہنمائوں نے خاکوں کو عالمی دہشت گردی قرار دیتے ہوئے کہا کہ گستاخ رسول ﷺ کا پیچھا نہیں چھوڑیں گے۔
گستاخانہ خاکوں کے خلاف جماعت اسلامی کے زیر اہتمام لاہور میں شان مصطفی ملین مارچ کیا گیا، دیگر مذہبی اور سیاسی جماعتوں کے رہنماوں کے ہمراہ لیاقت بلوچ نے اسلامی سربراہی کانفرنس کا مطالبہ کرتے ہوئے واضح کیا کہ گستاخ رسول کی سزائے موت پر تمام آئمہ کا اتفاق ہے ۔
فرانسیسی میگزین میں گستاخانہ خاکوں کے خلاف جماعت اسلامی کا ملین مارچ ناصر باغ سے شروع ہوا، شرکاءرسول کریم ﷺسے اظہار محبت کرتے ہوئے پنجاب اسمبلی کے سامنے پہنچے جہاں مارچ جلسے کی شکل اختیار کرگیا ۔
ملین مارچ سے دیگر جماعتوں کے قائدین نے خطاب کرتے ہوئے مسلم حکمرانوں کو سخت پیغام دینے کا مطالبہ کیا ، قائدین رہنماوں کا کہنا تھا کہ حکمران گستاخ رسول پر مصلحت کا شکار ہونے کی بجائے عوام کے جذبات کی ترجمانی کریں۔
ملین مارچ میں مسلم لیگ ن لاہور کے صدر پرویز ملک نے حکمران جماعت کی نمائندگی کی،پرویز ملک ملین مارچ میں خواتین اور بچوں کی بڑی تعداد نے بھی شرکت کرکے رسول اکرمﷺ سے محبت کا اظہار کیا، ہندو اور مسیحی رہنماوں نے بھی شرکت کی۔
مظاہرین نے فرانس کی حکومت کے خلاف شدید نعرے بازی کی اور مطالبہ کیا کہ حکومت پاکستان فرانس سے تعلقات ختم کرکے اسکے سفیر کو واپس بھیجے۔
کراچی : فرانسیسی میگزین میں گستاخانہ خاکوں کی اشاعت کیخلاف جماعت اسلامی کے زیر اہتمام شان مصطفیٰ صلی اللہ علیہ وسلم ملین مارچ نیپا چورنگی سے شروع ہوگیا ہے۔
تفصیلات کے مطابق جماعت اسلامی کی جانب سے گستاخانہ خاکوں کی اشاعت کیخلاف شان مصطفیٰ صلی اللہ علیہ وسلم ملیبن مارچ کا آغاز نیپا چورنگی سے کردیا گیا ہے۔
ملین مارچ کی قیادت امیر جماعت اسلامی پاکستان سراج الحق کررہے ہیں،پورے شہر سے کارکنان کی آمد کا سلسلہ جاری ہے۔
اس حوالےسے انتظامیہ نے نیپا چورنگی سے یونیورسٹی روڈ تک جانے والا راستہ عام ٹریفک کیلئے بند کردیا ہے، جبکہ حسن اسکوائر پر ایک مرکزی اسٹیج بنایا گیا ہے، جہاں مرکزی قائدین شرکاء سے خطاب کریں گے۔
ملین مارچ کی سیکورٹی کے لئے پولیس اور رینجرز کی بھاری نفری کو تعینات کیا گیا ہے ۔ملین مارچ میں خواتین کارکنان کی بڑی تعداد بھی شریک ہوگی۔
