واشنگٹن : ٹرمپ انتظامیہ نے سفری پابندیاں لگانے والے ممالک کی فہرست تیار کرلی ، اب سوال اٹھتا ہے کہ کیا پاکستان اس فہرست میں شامل ہیں۔
تفصیلات کے مطابق دنیا بھر سے امریکا آنے والوں کی سخت جانچ پڑتال کے منصوبے کے تحت امریکی صدر ٹرمپ کی انتظامیہ مختلف ممالک پر سفری پابندیاں عائد کرنے پرغورکررہی ہے، جس میں پاکستان سمیت اکتالیس ممالک شامل ہیں۔
رائٹرز کو ملنے والی انٹرنل میمو کی تفصیلات میں بتایا گیا کہ مجموعی طور پراکتالیس ممالک کو تین الگ الگ گروپوں میں تقسیم کیا گیا ہے، تاہم میمو ابھی باضابطہ طور پر جاری نہیں کیا گیا۔
میمو میں کہا گیا ہے کہ پاکستان اُس گروپ کا حصہ ہے جس میں اگر حکومتوں نے سکیورٹی امور بہتر نہ کیے تو ان ممالک کے شہریوں کو امریکی ویزا پابندیوں کا سامنا کرنا پڑ سکتا ہے۔
پہلا گروپ وہ ہے جس میں مکمل ویزا معطلی ہوگی، اس گروپ میں افغانستان، ایران، شام، کیوبا اور شمالی کوریا سمیت دس ممالک شامل ہیں۔
دوسرا گروپ جزوی ویزا معطلی والا ہے، جس میں اریٹیریا، ہیٹی، لاؤس، میانمار اور جنوبی سوڈان کے شہریوں کو سیاحتی، تعلیمی اور امیگریشن ویزوں میں محدود پابندیوں کا سامنا ہوگا۔
تیسرا گروپ مشروط ویزا معطلی کا ہے، جس میں پاکستان، بیلاروس اور ترکمانستان سمیت چھبیس ممالک شامل ہیں، ان ممالک کو ساٹھ روز میں سیکیورٹی سکریننگ اور ویزا پراسیسنگ کے معیار میں بہتری کی ہدایت دی گئی ہے، اگر ان ممالک نے اس معاملے پر توجہ نہ دی تو ان کے شہریوں کے لیے امریکی ویزوں پر جزوی پابندیاں لگ سکتی ہیں۔
دوسری جانب نیویارک ٹائمزکے مطابق ٹرمپ انتظامیہ نےتینتالیس ممالک پر سفری پابندیوں سےمتعلق ڈرافٹ تیارکیا ہے، جو ریڈ، اورنج اور یلو فہرست پر مشتمل ہے، پاکستان اورنج لسٹ میں شامل ہے، جس کا مطلب ہے پاکستان کے شہریوں کیلئے ویزہ پابندیاں سخت ہوں گی۔
امریکی اخبار کا کہنا تھا کہ اس فہرست میں تبدیلیاں ہوسکتی ہیں، امریکی وزیر خارجہ مارکو روبیو سمیت انتظامیہ کی جانب سے ابھی اس فہرست کی منظوری نہیں دی گئی
