اسلام آباد : صدر مملکت ممنون حسین نے پارلیمنٹ کا مشترکہ اجلاس اکیس اپریل صبح نو بجکر پچیس منٹ پر طلب کرلیا۔ پارلیمنٹ کے مشترکہ اجلاس سے چینی صدر ژی جن پنگ خطاب کریں گے۔
پارلیمنٹ کے مشترکہ اجلاس میں وزیر اعظم ،وفاقی کابینہ کے اراکین ،تینوں مسلح افواج کے سربراہان سمیت مختلف سیاسی جماعتوں کے سربراہان ،بیوروکریٹس اورغیر ملکی سفیر شریک ہوں گے۔
تمام مہمانوں کو دعوت نامے جاری کر دیئے گئے ہیں جن میں انہیں بروقت شرکت کی تاکید کی گئی ہے۔ذرائع کے مطابق چین کے صدر پاکستان اور خطے کے بارے میں چین کی پالیسی کا اعلان کریں گے ۔
ان کا خطاب دنیا بھر میں براہ راست نشر کیا جائے گا۔ واضح رہے کہ چینی صدر اپنی اہلیہ سمیت ساٹھ رکنی وفد کے ہمراہ کل پاکستان پہنچ رہے ہیں۔
اسلام آباد پہنچنے پر ان کا پرتپاک استقبال کیا جائے گا جس کےلئے تیاریوں کو حتمی شکل دی جا چکی ہے۔علاوہ ازیں عمران خان چینی صدر سے کل اہم ملاقات کریں گے۔
تحریک انصاف کے چیئر مین عمران خان چینی صدر ژی جن پنگ سے کل اہم ملاقات کریں گے،دو طرفہ تعلقات سمیت اہم امور پر بات چیت ہو گی۔
ترجمان تحریک انصاف شیریں مزاری کی جانب سے جاری بیان میں کہا گیا ہے کہ چینی صدر کی پاکستان آمد کے موقع پر پارٹی چیئر مین عمران خان ان سے کل شام ساڑھے چھ بجے اہم ملاقات کریں گے۔
ملاقات میں وائس چیئر مین شاہ محمود قریشی بھی شریک ہوں گے،ملاقات میں دو طرفہ تعلقات سمیت خطے میں جاری اہم معاملات اور امور زیر غور آئیں گے۔ذرائع کے مطابق یہ ملاقات اسلام آباد کے نجی ہوٹل میں ہو گی۔
