پاکستان ٹیلی ویژن کے سنہری دور میں جہاں کئی فن کار اپنی لاجواب اداکاری کے سبب پہچانے گئے، وہیں وہ اپنے منفرد لب و لہجے اور آواز و انداز کی وجہ سے بھی مشہور ہوئے اور منصور بلوچ انہی میں سے ایک ہیں۔ منصور بلوچ 3 مئی 1994ء کو لاہور میں وفات پا گئے تھے۔
آج ٹیلی ویژن ڈراموں اور فلموں کے اس مشہور و معروف اداکار کی برسی منائی جارہی ہے۔
1942ء میں پیدا ہونے والے منصور بلوچ کا تعلق سندھ کے شہر نواب شاہ سے تھا۔ لاہور میں وفات پانے والے منصور بلوچ کو اسی ضلع نواب شاہ کے ایک گاؤں میں سپردِ خاک گیا گیا۔
منصور بلوچ نے متعدد سندھی فلموں اور ڈراموں میں کام کیا۔ ان کے فنی سفر کا آغاز بھی سندھی زبان میں بننے والی ایک فلم سے ہوا تھا، بعد میں انھیں پاکستان ٹیلی وژن پر ڈراموں میں اداکاری کے جوہر دکھانے ملا اور وہ پی ٹی وی کے ناظرین کو اپنی لاجواب اداکاری کے سبب متوجہ کرنے میں کام یاب رہے۔
منصور بلوچ کو ٹیلی وژن کے مقبول ترین ڈراما سیریل دیواریں اور جنگل میں ان کے کرداروں کی وجہ سے گویا راتوں رات شہرت نصیب ہوئی۔ ڈراما سریل دیواریں میں ان کی شان دار پرفارمنس کو ناظرین نے بہت سراہا اور یہ ایک یادگار ڈراما ثابت ہوا۔ منصور بلوچ کو ان کی کردار نگاری پر پی ٹی وی ایوارڈ سے نوازا گیا تھا۔
