پشاور : خیبرپختونخوا میں لینڈ یوز ریگولیشن 2024 سے قبل منظور شدہ رہائشی اور تجارتی منصوبے کالعدم قرار دے دیئے گئے ہیں۔
تفصیلات کے مطابق خیبرپختونخوا میں مقررہ مدت میں تعمیر اتی کام شروع نہ کرنیوالے تمام رہائشی و تجارتی نقشے منسوخ کرنے کا فیصلہ کرلیا۔
خیبرپختونخوا لینڈ یوز اینڈ بلڈنگ کنٹرول اتھارٹی نے لینڈ یوز ریگولیشن 2024 سے قبل منظور شدہ تمام رہائشی اور تجارتی منصوبے کالعدم قرار دے دیے ہیں اور اس حوالے سے ڈی جی لینڈ یوز اینڈ بلڈنگ کنٹرول اتھارٹی کی جانب سے مراسلہ جاری کیا گیا ہے۔
مراسلے میں کہا گیا کہ وہ منصوبے جن پر اب تک تعمیراتی کام کا آغاز نہیں کیا گیا، ان کے نقشے منسوخ تصور ہوں گے۔ تمام کمرشل منصوبوں کے لیے نئی منظوری لازمی قرار دی گئی ہے، جبکہ تعمیر شروع کرنے سے قبل ہر ضلع میں نقشے ازسرِ نو منظور کرانا ہوں گے۔
مزید پڑھیں : اسلام آباد میں رہائشی منصوبوں میں فراڈ کا شکار متاثرین کو رقوم کی ادائیگی
ڈائریکٹر انفورسمنٹ نے تمام افسران کو ہدایت کی ہے کہ نئی درخواستیں صرف اپڈیٹڈ قواعد و ضوابط کے مطابق ہی قبول کی جائیں۔
مراسلے میں واضح کیا گیا ہے کہ مکمل دستاویزات اور قانونی تقاضوں کی عدم تکمیل کی صورت میں کارروائی عمل میں لائی جائے گی۔