کراچی: صوبائی وزیر صنعت و تجارت منظور حسین وسان نے کہا ہے کہ سائٹ ایریا میں سڑکوں پر موجود پانی کا مسئلہ جلد حل کرلیا جائے گا، مالکان اپنی فیکٹریوں کے آگے گرین بیلٹ بنائیں، سندھ میں مزید صنعتی علاقے بنانے پر کام جاری ہے تاکہ ملک ترقی کرے۔
یہ بات انہوں نے سائٹ ایریا میں نو تعمیر شاہراہ معین اختر روڈ کا افتتاح کرتے ہوئے کہی۔
اس سڑک کو سندھ حکومت کی جانب سے لیجنڈ اداکار معین اختر کو خراج عقیدت پیش کرنے کے لیے مرحوم اداکار سے منسوب کرنے کا اعلان کیا گیا تھا، یہ سڑک نورس چورنگی کے قریب واقع ہے جو کہ 462 ملین روپے کی جاری اسکیم کے تحت تعمیر کی گئی ہے اس اسکیم کے تحت 32 کلومیٹر طویل سڑکیں تعمیر ہونی ہیں، یہ سڑک ان میں سے ایک ہے۔
افتتاح کے وقت ایم ڈی سائٹ غلام مجتبی جویو، سیکریٹری انڈسٹریزسمیت دیگر افسران اور میڈیا کے نمائندے موجود تھے۔
منظور حسین وسان نے سائٹ ایریا میں واقع تمام فیکٹری مالکان کو مخاطب کرتے ہوئے کہا کہ وہ اپنی فیکٹریوں کے سامنے گرین بیلٹ بنائیں، اقتصادی راہداری بننے کی وجہ سے غیر ملکی باشندوں کی بھرپور آمد ہوگی جن پر اس عمل سے مثبت تاثر پڑے گا، سائٹ لمیٹڈ میرا دوسرا گھر ہے، سڑکوں پر موجود پانی کا مسئلہ حل کرلیا جائے گا، 15 سے 20 دن میں دوبارہ یہاں کا دورہ کروں گا۔
وزیر صنعت نے مزید کہا کہ ہماری حکومت وزیراعلیٰ سندھ مراد علی شاہ کی قیادت میں کوشش کررہی ہےکہ سندھ میں زیادہ سے زیادہ صںعتی علاقے بنیں، اس کا واضح ثبوت فیز ون خیر پور میں گیس کی فراہمی ہے،لاڑکانہ انڈسٹریل زون میں بھی تیزی سے کام جاری ہے، سندھ ترقی کرے گا تو پاکستان ترقی کرے گا۔
سائٹ کی سڑکیں خراب ہونے کا ذمہ دار واٹر بورڈ ہے، سراج قاسم تیلی
تاجر رہنما سراج قاسم تیلی نے کہا کہ آج صوبائی وزیر نے ہمارے ساتھ 25 کلومیٹر طویل علاقے کا دورہ کیا، سائٹ ایریا میں واقع 2600 فیکٹریوں میں 5 لاکھ سے زائد لوگوں کا روزگار وابستہ ہے خستہ حال سڑکوں کے سبب مشکلات کے شکار ہم ہیں لیکن اس کی ذمہ داری واٹر بورڈ پر عائد ہوتی ہے۔
انہوں نے بتایا کہ واٹر بورڈ نے سڑکوں کی دوبارہ تعمیر کے لیے ہم سے ایم او یو سائن کیا تھا جو کہ موجودہ ایم ڈی واٹر بورڈ ہاشم رضا زیدی کے پاس ہےان کے دستخط بھی اس پر موجود ہیں تاہم اس معاملے میں پیش رفت نہیں ہورہی، میں چاہتا ہوں کہ یہ معاملہ سائٹ کے حوالے کردیا جائے تاکہ سائٹ لمیٹڈ واٹر بورڈ سے پےمنٹ وصول کرے۔
سراج قاسم تیلی نے مطالبہ کیا کہ صوبائی وزیر ہر 3 ماہ میں یہاں کا دورہ ضرور کریں تاکہ آپ کو یہاں کے مسائل سے آگاہی ہوسکے۔
