کراچی: ٹڈاپ کیس میں مخدوم امین فہیم کی استثنی کی درخواست منظورکرلی گئی ہے۔
ٹڈاپ کیس کی سماعت کراچی اینٹی کرپشن عدالت میں ہوئی، پیپلزپارٹی کے رہنماء مخدوم امین فہیم فاروق ایچ نائیک کے ہمراہ عدالت میں پیش ہوئے۔
انسداد بدعنوانی کی عدالت میں سابق وفاقی وزیر مخدوم امین فہیم کی ضمانت قبل از گرفتاری منظور کرتے ہوئے حاضری سے استثنیٰ دیدی۔
فاروق ایچ نائیک نے صحافیوں سے گفتگومیں کہا مقدمہ سیاسی انتقام ہے، امین فہیم کا نام ایف آئی آر میں نہ ہونے کے باوجود فائنل چالان میں شامل کیا گیا ہے۔
پیپلزپارٹی کےرہنماء مخدوم امین فہیم نے کہا ہے کہ پیٹرول بحران پر وزیرِاعظم کو اخلاقی طور پر مستعفی ہوجانا چاہئے۔
یاد رہے کہ سابق وزیرِاعظم یوسف رضا گیلانی اور مخدوم امین فہیم پر ٹریڈ ڈیولپمنٹ اتھارٹی آف پاکستان میں کرپشن کے الزامات کے تحت ایف آئی اے کی جانب سے مقدمات درج کیے گئے تھے۔
اس سے قبل امین فہیم نے ایف آئی اے کے خلاف درخواست دائر کی تھی، جس میں یہ مؤقف اختیار کیا گیا تھا کہ انہیں سیاسی طور پر انتقامی کارروائی کا نشانہ بناتے ہوئے ہراساں کیا جا رہا ہے۔
جس پر سندھ ہائی کورٹ نے فاروق ایچ نائیک کے دلائل سننے کے بعد سابق وزیرِ تجارت امین فہیم کو گرفتار نہ کرنے کا حکم دے دیا تھا۔
