Tag: منفی سوچ

کیا آپ زندگی میں کامیاب اور خوشحال بننا چاہتے ہیں اور آپ نے اپنی زندگی میں کئی اہداف طے کر رکھے ہیں جن کی تکمیل کرنا چاہتے ہیں؟ تو پھر سب سے پہلے اپنے ارد گرد موجود ناکارہ، نکمے اور منفی سوچ پھیلانے والے افراد سے جان چھڑائیں۔

ایک امریکی بزنس مین گیری وینرک نے ایک پروگرام میں گفتگو کرتے ہوئے زندگی میں کامیابی اور اطمینان حاصل کرنے کا انوکھا اصول بتایا جسے اکثر لوگ نظر انداز کردیتے ہیں، نتیجتاً وہ زندگی میں وہ سب حاصل نہیں کر پاتے جو وہ چاہتے ہیں۔

گیری کا کہنا ہے کہ ہم اپنی روزمرہ زندگی میں بہت سے افراد سے ملتے ہیں لیکن ان میں سے کچھ ہمارے بہت قریب اور خاص ہوتے ہیں۔

مزید پڑھیں: خبردار! پریشان لوگوں سے دور رہیں

ان کے مطابق ہماری زندگی کے 5 قریبی افراد ہماری اپنی زندگی پر بھی اثر انداز ہوتے ہیں۔

گیری نے بتایا کہ اگر یہ 5 افراد مثبت سوچ رکھنے والے، زندگی کو روشن خیالی سے دیکھنے والے، کامیاب اور خوشحال ہوں گے تو یہی ساری خصوصیات آپ کی زندگی میں بھی در آئیں گی۔

اس کے برعکس اگر یہ افراد منفی سوچ رکھنے والے، رونے دھونے والے، ہر چیز کی شکایت کرنے والے، منفی پہلوؤں پر نظر رکھنے والے اور ناشکرے ہوں گے تو لاشعوری طور پر آپ بھی یہ عادات اپنا لیں گے۔

ایسی عادات رکھنے والے افراد زندگی میں کبھی کامیاب نہیں ہوتے لہٰذا ایسے افراد کی شکوے شکایتیں تا عمر جاری رہتی ہیں اور اگر آپ نے انہیں اپنی زندگی کا اہم حصہ بنا رکھا ہے تو لازمی طور پر اس کا اثر آپ کی زندگی پر بھی پڑے گا۔

گیری کا کہنا ہے کہ مثبت سوچ رکھنے والے افراد کی صحبت میں وقت گزارنا آپ کے اندر بھی توانائی، جوش وجذبہ بھر دیتا ہے اور آپ کو نئے کام کرنے، اور پرانے کاموں کو پایہ تکمیل تک پہنچانے کی طرف راغب کرتا ہے۔

مزید پڑھیں: منفی سوچ رکھنے والے افراد سے بچیں

آپ زندگی کے مثبت پہلوؤں کی طرف نظر کرتے ہیں، نئی چیزیں سیکھتے ہیں، نئے آئیڈیاز حاصل کرتے ہیں نتیجتاً آپ کے اندر خوشی اور اطمینان پیدا ہوتا ہے۔

اس کے برعکس منفی سوچ رکھنے والے افراد کی صحبت میں وقت گزارنا آپ کو پریشان، مایوس اور پراگندہ طبیعت بنا دیتا ہے اور آپ خود کو بھی ناکارہ محسوس کرنے لگتے ہیں۔

دنیا میں کامیابی پانے والے تمام افراد اس نکتے سے متفق ہیں۔ لہٰذا اگر آپ بھی اپنی زندگی کو بامقصد اور کامیاب بنانا چاہتے ہیں تو یقیناً آپ کو اپنے دوستوں اور عزیزوں کی فہرست پر نظر ثانی کرنی ہوگی۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔