بعض لوگ منہ میں بننے والے چھالوں سے بہت پریشان رہتے ہیں، گرمی میں یہ عمل زیادہ دیکھنے میں آتا ہے، اس کے سبب لوگ کھانے پینے میں بڑی تکلیف محسوس کرتے ہیں۔
طبی ماہرین کا کہنا ہے کہ منہ میں چھالے بننے کی وجہ زیادہ تر بخار ہے، یا جب جسم میں کسی وائرس کے خلاف مزاحمت جاری ہوتی ہے تو چھالے بنتے ہیں، تاہم کوئی حتمی وجہ سامنے نہیں آ سکی ہے۔
یہ خیال کیا جاتا ہے کہ برش کی رگڑ سے، مصالحے دار غذائیں کھانے سے، ہارمونز میں تبدیلی یا ذہنی تناؤ وغیرہ کے سبب منہ میں چھالے بن سکتے ہیں، جب کہ چھالے ٹھیک ہونے کا دورانیہ 6 سے 8 دن ہوتا ہے۔
چند آزمودہ گھریلو ٹوٹکے
ایلو ویرا، گھیکوار
ایلو ویرا جِل کے استعمال سے منہ کے چھالے ٹھیک ہونے کا عمل تیز ہو جاتا ہے، درد میں کمی آتی ہے، دن میں 2 سے 3 بار لگائیں۔
چائے
چائے میں ایسے اجزا پائے جاتے ہیں جو منہ میں چھالوں کی تکلیف میں کمی لانے میں مددگار ہیں، اس کے لیے استعمال شدہ ٹی بیگز کو 5 منٹ تک چھالوں پر لگائے رکھیں، اس عمل سے چھالے جلد ٹھیک ہو جائیں گے۔
بیکنگ سوڈا
یہ معدے میں تیزابی کیفیت کو معمول پر لاتا ہے، جس کی وجہ سے منہ میں چھالے بنتے ہیں، بیکنگ سوڈا سے بیکٹیریا بھی مرتے ہیں، ایک چائے کی چمچ بیکنگ سوڈا آدھے کپ گرم پانی میں ملا کر اس سے کلیاں کریں۔
ہائیڈروجن پرآکسائیڈ
یہ ایک طاقت ور جراثیم کش محلول ہے، لیکن نگلنے سے سختی سے پرہیز ضروری ہے، یہ منہ کے چھالوں کو انفیکشن سے بچاتا ہے، اسے ماؤتھ واش کی طرح استعمال کریں۔
وٹامن ای
وٹامن ای کے ایک کیپسول کو کاٹ اس کا تیل چھالوں پر لگائیں، چھالے جلد ٹھیک ہونے میں مدد ملے گی۔
نمکین پانی
نمک ملے پانی سے 30 سیکنڈ تک کلیاں کریں، اس سے چھالوں کے ختم ہونے کا عمل تیز ہو جاتا ہے۔
