کراچی : پاکستان شوبز انڈسٹری کے معروف اداکار منیب بٹ نے بتایا ہے کہ ایک بار فٹبال کھیلتے ہوئے ایک شخص نے مجھ سے ایک بات کہی جسے سن کر میں چونک گیا۔
اے آر وائی ڈیجیٹل کے پروگرام شان سحور میں ٹی وی اداکار منیب بٹ نے شرکت کی اور اپنے کیریئر کے ابتدائی ایام اور جدوجہد کے بارے میں ناظرین کو دلچسپ قصے سنائے۔
انہوں نے بتایا کہ میں نے اداکار بننے کیلئے جان توڑ کوششیں کیں، لائنوں میں لگ کر آڈیشنز دیا کرتا تھا، میرے پورے خاندان میں کوئی بھی اس فیلڈ میں نہیں لیکن میں نے باقاعدہ ایکٹنگ کی کلاسز لے کر اس شعبے میں قدم رکھا۔
انہوں نے ایک قصہ سنایا کہ ہمارے محلے میں ایک شخص تھا ایک دن اس نے مجھے فٹبال کھیلتے ہوئے مخصوص انداز میں کہا کہ یار آپ میں کچھ ہے۔ میں نے پوچھا ایسا کیا ہے تو اس نے کہا کہ کچھ دن بعد ایک ٹی وی ایڈ کی شوٹنگ ہے تم آجانا۔
جب میں صبح سات بجے اس جگہ پہنچا تو دیکھا چار کوسٹرز میں لڑکے بھرے ہوئے ہیں تو سوچا کہ کیا ان سب میں بھی کچھ بات ہے؟ بہر حال میں بھی سوار ہوگیا اور سیٹ پر جاکر معلوم ہوا کہ وہ شخص جونئیر فنکاروں کا کوآرڈینٹر تھا اس کا کام ہی یہی تھا کہ سب کو کہتا رہے کہ آپ میں کچھ ہے۔
