ARYNews.tv | Urdu – Har Lamha Bakhabar

Tag: منی لانڈرنگ

  • منی لانڈرنگ اورجعلی اکاونٹس والوں کی شامت ، ایف بی آر کا ’بےنامی‘ قانون 8 فروری سے لاگو ہوجائےگا

    منی لانڈرنگ اورجعلی اکاونٹس والوں کی شامت ، ایف بی آر کا ’بےنامی‘ قانون 8 فروری سے لاگو ہوجائےگا

    اسلام آباد : فیڈرل بورڈ آف ریونیو نے منی لانڈرنگ اور جعلی اکاونٹس کے خلاف مزید گھیرا تنگ کرنے کی تیاری مکمل کرلی، ایف بی آر کا’بے نامی‘ قانون 8 فروری سے لاگو ہوجائےگا۔

    تفصیلات کے مطابق منی لانڈرنگ اور کرپشن کے خلاف مزید گھیرا تنگ ہونے جارہا ہے، ایف بی آر کا بے نامی قانون رواں ہفتے سے نفاذ العمل ہوگا۔

    ذرائع کا کہنا ہے کہ فیڈرل بورڈ آف ریونیو کا ’بے نامی‘ قانون آٹھ فروری سے لاگو ہونے کا امکان ہے، جس کے تحت اکاؤنٹ ہولڈرز کی تمام جائیداد ضبط کر لی جائے گی۔

    ایف بی آر ذرائع کے مطابق یہ قانون انتہائی سخت ہے اور اس کے تحت بے نامی اکاؤنٹ رکھنے والے کی تمام جائیداد ضبط ہو سکتی ہے، ٹیکس نیٹ کے اندر رہتے ہوئے لوگ بے نامی جائیدادیں خرید رہے ہیں۔

    بے نامی جائیدادوں سے متعلق قانون کا مسودہ وزارت قانون کو بھیج دیا ہے، اس قانون سے معیشت کو ڈاکومنٹ کرنے میں مدد ملے گی جبکہ بے نامی اکاونٹس کے حوالے فی الحال کوئی ایمنسٹی اسکیم نہیں آرہی ہے۔

    مزید پڑھیں : گزشتہ مالی سال کی نسبت اس بار تین فی صد زیادہ ٹیکس جمع ہوا: ایف بی آر

    گذشتہ روزایف بی آر ممبران ڈاکٹر حامد عتیق اور سیماشکیل نے میڈیا سے گفتگو کرتے ہوئے  کہا تھا کہ گزشتہ مالی سال کی نسبت اس بار تین فی صد زیادہ ٹیکس جمع ہوا ہے، جولائی تا جنوری 2 ہزار ارب روپے سے زیادہ ٹیکس جمع کیا گیا، البتہ سات ماہ کے دوران ہدف سے 191 ارب کم ٹیکس اکٹھا ہوا، ود ہولڈنگ ٹیکس کی مد میں 40 ارب روپے کم ٹیکس جمع ہوا ہے۔

    ایف بی آر  کے مطابق 12 لاکھ روپے تک آمدن پر ٹیکس چھوٹ سے بھی ریونیو پر منفی اثر پڑا، بینکنگ کے شعبے میں ٹیکس میں ایک فیصد کمی آئی، حکومت سے درخواست ہے، محصولات کے ہدف پرنظر ثانی کرے۔

    ایف بی آرحکام کا کہنا تھا کہ پہلے7 ماہ میں ریونیو شارٹ 195 ارب روپے ہے، بے نامی سے متعلق قانون سخت کیا جارہا ہے، کسی جائیدادپر بے نامی ثابت ہوئی، تو وہ سرکارضبط کر لے گی، ایف بی آرنے 6 ہزار افراد کو نوٹس جاری کیے ہیں. 204 کیسز میں 6 ارب کی ٹیکس ڈیمانڈ جاری کی گئی۔

  • خدمت خلق فاؤنڈیشن کے نام پر منی لانڈرنگ: ایف آئی اے نے گاڑیوں کی تفصیلات طلب کرلیں

    خدمت خلق فاؤنڈیشن کے نام پر منی لانڈرنگ: ایف آئی اے نے گاڑیوں کی تفصیلات طلب کرلیں

    اسلام آباد: وفاقی تحقیقاتی ایجنسی (ایف آئی اے) نے متحدہ قومی موومنٹ کے فلاحی ادارے خدمت خلق فاؤنڈیشن کی 48 گاڑیوں کی مکمل جانچ پڑتال کا فیصلہ کرتے ہوئے محکمہ ایکسائز کو خط لکھ دیا۔

    تفصیلات کے مطابق ایم کیو ایم کے فلاحی ادارے خدمت خلق فاؤنڈیشن پر منی لانڈرنگ کیس کے حوالے سے ایف آئی اے نے اہم پیشرفت دکھاتے ہوئے ادارے کی گاڑیوں کی مکمل جانچ پڑتال کا فیصلہ کیا ہے۔

    اس سلسلے میں ایف آئی اے انسداد دہشت گردی ونگ نے محکمہ ایکسائز کو خط لکھ کر ادارے کی 48 گاڑیوں کی تفصیلات طلب کی ہیں۔

    اپنے خط میں ایف آئی اے نے کہا ہے کہ فاؤنڈیشن کی گاڑیاں کس کے نام ہیں اس بارے میں تفصیلات دی جائیں۔ ایف آئی اے نے فاؤنڈیشن کی کسی بھی گاڑی کی ملکیت تبدیل کرنے سے بھی روک دیا ہے۔

    ایف آئی اے نے خط کی نقول انسداد دہشت گردی عدالت (اے ٹی سی) میں بھی جمع کروا دی ہیں۔

    خیال رہے کہ خدمت خلق فاؤنڈیشن کے نام پر اربوں روپے کی منی لانڈرنگ کا انکشاف کچھ عرصہ قبل ہوا تھا۔

    ایف آئی اے کی تحقیقات کے مطابق متحدہ قومی موومنٹ کے 50 سے زائد رہنما غیر قانونی ٹرانزیکشنز میں ملوث تھے۔ ادارے کے نام پر اربوں روپے کی رقوم منی لانڈرنگ کے ذریعے لندن بھجوائی گئیں۔

    بعد ازاں ایف آئی اے کے انسداد دہشت گردی ونگ نے 726 افراد کی فہرست جاری کی تھی جن سے مجموعی طور پر ایک ارب روپے جمع کرنے ہیں۔

    جاری کی جانے والی فہرست میں میئر کراچی وسیم اختر کا نام بھی شامل تھا۔ وسیم اختر کے علاوہ دیگر افراد میں قمر منصور، اشفاق منگی اور تنویر الحق تھانوی سمیت اہم نام شامل تھے۔

    کے کے ایف پر منی لانڈرنگ کا مقدمہ ضابطہ فوجداری کے تحت درج ہے۔

    ایف آئی اے کے مطابق منی لانڈرنگ کی تحقیقات مکمل ہوتے ہی ایم کیو ایم کے اہم رہنماؤں کی گرفتاری کی جائے گی۔

    3 جنوری کو ایف آئی اے نے فاؤنڈیشن کی ساڑھے 3 ارب روپے مالیت کی جائیدادیں بھی ضبط کرلیں تھی۔ ایف آئی اے کے مطابق فاؤنڈیشن کی جائیدادیں بھتے کی رقوم سے بنائی گئیں۔

  • 2019 میں برطانیہ کے ساتھ ملزمان کی حوالگی کا معاہدہ طے ہو جا ئے گا: بیرسٹر شہزاد اکبر

    2019 میں برطانیہ کے ساتھ ملزمان کی حوالگی کا معاہدہ طے ہو جا ئے گا: بیرسٹر شہزاد اکبر

    لاہور: وزیرِ اعظم عمران خان کے معاونِ خصوصی برائے احتساب شہزاد اکبر نے کہا ہے کہ 2019 میں کام اسی طرح جاری رکھیں گے جتنا 3 ماہ میں کیا ہے، کوشش ہوگی نئے سال میں احتساب کا عمل مضبوط ہو۔

    تفصیلات کے مطابق اے آر وائی نیوز کے پروگرام میں گفتگو کرتے ہوئے بیرسٹر شہزاد اکبر نے کہا کہ 2019 کے شروع میں برطانیہ کے ساتھ ملزمان کی حوالگی کا معاہدہ طے ہو جا ئے گا۔

    [bs-quote quote=”اسحاق ڈار کے معاملے پر برطانوی حکومت سے رابطے میں ہیں، برطانوی حکومت کو کیس سے متعلق 26 سوالوں کا جواب بھجوا دیا ہے۔” style=”style-7″ align=”left” color=”#dd3333″ author_name=”بیرسٹر شہزاد اکبر”][/bs-quote]

    بیرسٹر شہزاد نے جے آئی ٹی رپورٹ پر بیان دینے کے حوالے سے کہا کہ یہ رپورٹ بتائی تو جا سکتی ہے مگر اس پر بیان نہیں دے سکتے۔

    انھوں نے کہا ’میرے نام کے ساتھ احتساب منسوب کرنے پر اپوزیشن کا شکر گزار ہوں، ملک میں کھلے عام منی لانڈرنگ ہوتی رہی ہے، ایسے لوگوں کو سامنے لانا ہوگا جو کیسز کو شواہد کی بنیاد پر مضبوط بنائیں۔‘

    وزیرِ اعظم کے معاونِ خصوصی کا کہنا تھا ’اسحاق ڈار کے معاملے پر برطانوی حکومت سے رابطے میں ہیں، برطانوی حکومت کو کیس سے متعلق 26 سوالوں کا جواب بھجوا دیا ہے، ماضی میں سوئس حکومت کے ساتھ آٹومیشن انفارمیشن پر کام نہیں کیا گیا، اب اس پر کام کرنا ہے تاکہ 2019 کے آخر تک معاملہ طے ہو سکے۔‘

    انھوں نے مزید بتایا کہ سوئس حکومت کو لکھا ہے کہ پاکستانی شہریوں کی تفصیلات ہم سے شیئر کی جائیں، امید ہے 2019 میں تفصیلات آنے سے سامنے آئے گا کہ کس کی کتنی جائیداد ہے وہاں۔

    یہ بھی پڑھیں:  آصف زرداری کے خلاف پوری چارج شیٹ آگئی ہے، شہزاد اکبر

    بیرسٹر شہزاد اکبر نے کہا کہ جن لوگوں کے اثاثوں کا پتا چل رہا ہے، انھیں نوٹس بھجوایا جا رہا ہے، ان کے اکاؤنٹس بھی منجمد کیے جا رہے ہیں، ماضی میں منی لانڈرنگ کے انسداد کے لیے کوئی بھی اقدامات نہیں کیے گئے، ایف اے ٹی ایف چاہتا ہے کہ منی لانڈرنگ روکنے کے لیے قوانین ہونے چاہئیں۔

    انھوں نے کہا ’ملک میں فنانشل مانیٹرنگ یونٹ کو مضبوط کرنے کی ضرورت ہے، حکومت کی کوشش ہے فنانشل مانیٹرنگ یونٹ خود مختار ہو، نئے سال میں اسے فعال کرنا حکومت کا ٹارگٹ ہے۔‘

    شہزاد اکبر نے کہا کہ 2019 میں کیسز مکمل ہوں گے تو اس کے نتیجے میں گرفتاریاں بھی ہو سکتی ہیں، نیب کسی کو گرفتارکرتی ہے تو 24 گھنٹے میں عدالت کے سامنے پیش کر دیتی ہے۔

  • منی لانڈرنگ کیخلاف ملکی تاریخ کا سب سے بڑا آپریشن کرنے جارہے ہیں، وزیراعظم

    منی لانڈرنگ کیخلاف ملکی تاریخ کا سب سے بڑا آپریشن کرنے جارہے ہیں، وزیراعظم

    اسلام آباد : وزیراعظم عمران خان نے کہا ہے کہ منی لانڈرنگ کے خلاف ملکی تاریخ کا سب سے بڑا آپریشن کرنے جارہے ہیں، منی لانڈرنگ کرنے والوں کی چیخیں سن رہا ہوں۔

    یہ بات انہوں نے اسلام آباد میں سُفرا کانفرنس سے خطاب اور صحافیوں سے گفتگو کرتے ہوئے کہی، عمران خان کا کانفرنس سے خطاب میں کہنا تھا کہ ہمیں دوسروں پر انحصار کی پالیسی ترک کرنے کیلئے مائنڈ سیٹ تبدیل کرنا ہوگا۔

    عمران خان نے کہا کہ کانفرنس کے انعقاد پر وزارت خارجہ مبارکباد کی مستحق ہے، قومی غیرت کی بات کی جائے تو ہمارا مذاق اڑایا جاتا ہے، قوم تب اٹھتی ہےجب وہ یقین کرناشروع کرتی ہے، جہاں آج پاکستان ہے، سمجھتا ہوں یہ ہمارے لیےبہت بڑا موقع ہے، ایک چیز واضح ہوجانی چاہیے کہ پاکستان ایسے آگےنہیں چل سکتا۔

    وزیر اعظم کا کہنا تھا کہ ہم نے اپنے ملک کو بہت نقصان پہنچایا ہے، گھر قرضوں پر زیادہ دیرنہیں چل سکتا، اس طرح ملک بھی قرضوں پر زیادہ دیر نہیں چلتا، دوسروں پر انحصارکی پالیسی ترک کرنے کیلئے مائنڈ سیٹ تبدیل کرنا ہوگا، ہمیں دوسروں پر انحصار کی پالیسی ترک کرنا ہوگی، قوم تب اٹھتی ہےجب وہ یقین کرناشروع کرتی ہے۔

    عمران خان نے کہا کہ سب سے زیادہ ہمارے ملک کو نقصان غیرت ختم ہونے کی وجہ سے پہنچا، ہم نے اپنے خرچے کم نہیں کیے ہم ایک قوم نہیں بن سکے، جتنے بھی مسائل دیکھ لیں وہ اسی مائنڈ سیٹ سے آئےہیں، فراڈ قسم کے مائنڈ سیٹ نے پاکستان کو بہت نقصان پہنچایا ہے۔

    ماضی میں ملکی آمدن بڑھانے کے بجائے شارٹ کٹ لیتے رہے، قومی وقار کی بات کرتے ہیں تو مذاق اڑایا جاتاہے، ملک کی بہتری کیلئے دفترخارجہ اپنا مائنڈ سیٹ تبدیل کرے، دوسروں پر انحصار کی پالیسی کی وجہ سے خارجہ پالیسی کوبھی نقصان پہنچا، ملک کا امیج خراب کرنے میں ہم سب کا بہت بڑا ہاتھ ہے، ہم نے ماضی میں مختصر مدت کے مفاد کیلئے غلط فیصلے کئے بیرون ملک قرضوں سے اشرافیہ مستفید ہوتی رہی، ہماری اپنی اشرافیہ نےخود ملک کو بدنام کیا

    اوورسیز پاکستانی اثاثہ ہیں، ملک ان ہی کی کمائی سے چل رہا ہے، وزیراعظم

    وزیراعظم عمران خان نے کہا ہے کہ اوورسیز پاکستانی ملک کے لئے سب سے بڑا اثاثہ ہیں، میں نے شوکت خانم اسپتال کیلئے بھی اوورسیز پاکستانیوں سے ہی رابطہ کیا تھا، مجھے پتہ ہے اوورسیز پاکستانی بہت کو آپریٹو ہیں، ہمیں ان کو یقین دلانا ہوگا ان کاپیسہ ٹھیک جگہ پر لگ رہا ہے، بیرون ممالک مقیم پاکستانیوں سے روابط رکھنا بہت ضروری ہیں۔

    وزیراعظم عمران خان  نے کہا کہ یہ وہ لوگ ہیں جو اپنے بیوی بچے،ماں باپ چھوڑ کر باہر ملکوں میں کام کرتے ہیں، یہ ملک ان پاکستانیوں کے خون پسینے سے ہی چل رہا ہے، بیرون ملک پاکستانی کمیونٹیز سے مل کر ورکنگ ریلیشن گروپ بنائے جائیں، جو ہمیں چیلنجزہیں ہم انہیں بہتر معیشت کے بغیر دور نہیں کرسکتے۔

    وزیراعظم کا مزید کہنا تھا کہ ملک میں سالانہ دس ارب ڈالر کی منی لانڈرنگ ہورہی ہے اس کی روک تھام کیلئے سخت اقدامات کرنا ہوں گے، بیرون ملک کمانے والے پاکستانیوں کیلئےدل میں رحم پیدا کریں، منی لانڈرنگ کے خاتمے کیلئےبھی آپ کی بڑی مدد چاہئے۔

    جب تک لوگ سرمایہ کاری نہیں کرینگےتوملک میں ترقی نہیں ہوگی، پوری کوشش کریں گےکہ تاجر برادری کے ساتھ کھڑے ہوں، ملائیشیا میں ہماری بہترین سرمایہ کاروں سے ملاقات ہوئی، منی لانڈرنگ کے معاملے میں کل سے میری تعریف ہورہی ہے، فخر ہے ہمارا دفترخارجہ معیاری اورتجربہ کار سفارت کار ہیں، سفارت کاروں کی کارکردگی بہتر ہے اس میں مزید بہتری لانا ہوگی۔

    منی لانڈرنگ کرنے والوں کی چیخیں سن رہا ہوں، عمران خان

    وزیراعظم عمران خان نے صحافیوں سے گفتگو کرتے ہوئے کہا کہ منی لانڈرنگ کےخلاف ملکی تاریخ کاسب سے بڑا آپریشن کرنے جارہے ہیں، منی لانڈرنگ کرنے والوں کی چیخیں سن رہا ہوں، منی لانڈرنگ کسی صورت برداشت نہیں کی جائے گی، منی لانڈرنگ کرنے والوں سے رعایت نہیں برتی جائے گی، ڈالر کی اسمگلنگ کرنے والے اپنے دن گننا شروع کردیں، سندھ میں تو کل سے چیخوں کی آوازیں آنا شروع ہوگئی ہیں۔

    ایک سوال کے جواب میں ان کا کہنا تھا کہ آئی ایم ایف کے پاس جانے میں کوئی جلدی نہیں ہے، ہمیں ڈالر کیلئے آئی ایم ایف پروگرام کی ضرورت نہیں، آئی ایم ایف سے ڈکٹیشن نہیں لیتے، معیشت میں اصلاحات ملک کیلئےکی ہیں، اگلا منی بجٹ عوام دشمن نہیں ہوگا، بجٹ میں کاروبارکا فروغ چاہتے ہیں، ایف اے ٹی ایف کے تمام اقدامات پاکستان کےحق میں ہیں، وہ منی لانڈرنگ روکنے کا کہتا ہے، مسلح گروپوں کا خاتمہ نیشنل ایکشن ٹاسک فورس کا بھی مطالبہ ہے۔

    قوم کو واضح کردوں کہ اب ملک میں اب کسی قسم کا کوئی بحران نہیں ہے البتہ چیلنجز کا سامنا ضرور ہے، سرمایہ کار اطمینان رکھیں ملک میں کوئی غیریقینی صورتحال نہیں ہے، ملک کی تاریخ کاسب سے بڑا اور مؤثر غربت مٹاؤ پروگرام لے کر آرہاہوں۔

  • چوروں کے خلاف کارروائی سے جمہوریت خطرے میں نہیں پڑے گی: حماد اظہر

    چوروں کے خلاف کارروائی سے جمہوریت خطرے میں نہیں پڑے گی: حماد اظہر

    اسلام آباد: وزیرِ مملکت ریونیو محمد حماد اظہر نے کہا ہے کہ شریف خاندان اور آصف زرداری کا منی لانڈرنگ نیٹ ورک بے نقاب ہو چکا، اگر ہماری صفوں میں چور نکلے گا تو خود قانون کے حوالے کریں گے۔

    تفصیلات کے مطابق اسلام آباد میں نیوز کانفرنس سے خطاب کرتے ہوئے حماد اظہر نے کہا کہ دنیا کا سب سے بڑا منی لانڈرنگ کا نیٹ ورک پاکستان میں چل رہا تھا، دونوں خاندانوں کا منی لانڈرنگ نیٹ ورک بے نقاب ہو چکا ہے۔

    [bs-quote quote=”پاکستان میں دنیا کا سب سے بڑا منی لانڈرنگ کا نیٹ ورک چل رہا تھا۔” style=”style-7″ align=”left” color=”#dd3333″ author_name=”وزیرِ مملکت”][/bs-quote]

    وزیرِ مملکت نے کہا کہ چوروں کے خلاف کارروائی سے جمہوریت خطرے میں نہیں پڑے گی، ہم کسی کے لیے جمہوریت کو خطرے میں نہیں ڈالیں گے، چوروں کو نیب کے حوالے کریں گے۔

    حماد اظہر نے کہا ’جے آئی ٹی رپورٹ میں منی لانڈرنگ کا کچا چٹھا کھول دیا گیا ہے، نیب اور جے آئی ٹی نے جتنی پیچیدہ ٹرانزکیشنز پر کام کیا ہے وہ قابلِ تحسین ہے۔‘

    انھوں نے کہا کہ اوورسیز پاکستانی محنت کر کے پیسے ملک بھیجتے تھے، یہ کمیشن کے چکر میں پیسا واپس باہر لے جاتے، 2 خاندانوں کی کرپشن چھپانے کے لیے جو لوگ سامنے آ رہے ہیں ان کو شرم آنی چاہیے، ان کو سمجھنا چاہیے کہ ان کی وفاداری پاکستان کے لیے ہونی چاہیے چوروں کے لیے نہیں۔

    یہ بھی پڑھیں:  نواز شریف اور زرداری کا طریقہ واردات ایک جیسا ہے، فواد چوہدری

    وزیرِ مملکت برائے ریونیو نے کہا کہ ماضی میں کاروباری لوگوں پر بلا وجہ ٹیکس لگائے گئے، ہم کسی غریب آدمی پر ڈائریکٹ ٹیکس نہیں لگائیں گے، پاکستان کی برآمدات میں اضافہ اور درآمدات میں کمی ہوئی، پاکستان کی معیشت آہستہ آہستہ سنبھل رہی ہے۔

  • لندن: نیشنل کرائم ایجنسی کا آپریشن، 5 لاکھ پاؤنڈ سے زائد رقم ضبط

    لندن: نیشنل کرائم ایجنسی کا آپریشن، 5 لاکھ پاؤنڈ سے زائد رقم ضبط

    لندن: برطانوی نیشنل کرائم ایجنسی نے کامیاب آپریشن کرتے ہوئے کیش وین سے 5 لاکھ پاؤنڈ سے زائد رقم ضبط کرلی۔

    غیرملکی خبررساں ادارے کے مطابق لندن کی نیشنل کرائم ایجنسی نے پیسے سے بھری وین کو موٹروے پر روکا اور وین سے 5 لاکھ پاؤنڈ سے زائد رقم ضبط کرلی۔

    نیشنل کرائم ایجنسی کے مطابق وین کے ڈرائیور کے گھر سے بھی ایک لاکھ پاؤنڈ برآمد کیے گئے ہیں جبکہ پولیس نے منی لانڈرنگ قوانین کے تحت مقدمہ درج کرلیا۔

    ڈپٹی ڈائریکٹر نیشنل کرائم ایجنسی نے کہا کہ ناجائز دولت کو ضبط کرنے کے لیے کارروائی شروع کردی گئی ہے، ناجائز پیسہ جرائم کو جنم دیتا ہے۔

    مزید پڑھیں: منی لانڈرنگ کے خلاف برطانیہ کا بڑا اقدام

    واضح رہے کہ رواں ماہ منی لانڈرنگ کے خلاف برطانیہ نے بڑا قدم اُٹھایا تھا اور کاروباری و دولت افراد کے لیے متعارف کروائی گئی گولڈن پلیٹڈ ویزا اسکیم معطل کردی تھی۔

    دنیا بھر میں منی لانڈرنگ ، انسانی اسمگلنگ اور دیگر جرائم میں اضافے کے باعث برطانوی حکومت نے گولڈن پلیٹڈویزا اسکیم بند کرنے کافیصلہ کیا تھا۔

    برطانوی وزارت امیگریشن کی جانب سے جاری فہرست میں بتایا گیا ہے کہ پڑوسی ملک بھارت سے 76، ایران سے 69، آسٹریلیا54، کینیڈا سے 50 جبکہ صرف گذشتہ برس 1 ہزار چینی و روسی ارب پتیوں نے گولڈن ویزہ اسکیم سے فائدہ اٹھایا تھا۔

    خیال رہے کہ برطانیہ کی جانب سے گولڈن ویزا اسکیم کو 2008 میں مالی طور پر مستحکم اور کاروباری شخصیات کےلیے متعارف کروایا گیا تھا۔

  • جے آئی ٹی نے زرداری سسٹم کو بے نقاب کر دیا ہے: شہزاد اکبر

    جے آئی ٹی نے زرداری سسٹم کو بے نقاب کر دیا ہے: شہزاد اکبر

    اسلام آباد: وزیرِ اعظم عمران خان کے معاونِ خصوصی برائے احتساب شہزاد اکبر نے کہا ہے کہ جے آئی ٹی رپورٹ کی سمری دیکھنے والا حیران ہو جاتا ہے، منی لانڈرنگ سمجھنے کے لیے صدیوں تک آصف زرداری کی داستان کا ذکر رہے گا۔

    شہزاد اکبر نے اسلام آباد میں نیوز کانفرنس میں کہا کہ جے آئی ٹی رپورٹ کی سمری ہوش اڑا دینے والی ہے، زرداری کی منی لانڈرنگ داستان کو امریکی ڈیپارٹمنٹ نے ٹیسٹ کیس کے طور پر لیا۔

    [bs-quote quote=”زرداری کی منی لانڈرنگ داستان کو امریکی ڈیپارٹمنٹ نے ٹیسٹ کیس کے طور پر لیا۔” style=”style-7″ align=”left” color=”#dd3333″ author_name=”شہزاد اکبر”][/bs-quote]

    انھوں نے کہا ’اندرونِ سندھ، کراچی کے لوگ زرداری سسٹم سے واقف ہیں، جے آئی ٹی نے سندھ میں زرداری سسٹم کو بے نقاب کر دیا ہے۔‘

    شہزاد اکبر کا کہنا تھا کہ پیسے ایک سے دوسرے اور پھر تیسرے اکاؤنٹ میں ڈالے جاتے رہے، منی لانڈرنگ کیس دیکھا جائے تو اس کے سامنے نواز شریف کو بے چارہ سمجھتا ہوں، غیر ملکی سرمایہ کاری کے نام پر بینک اکاؤنٹس کے بجائے بینک ہی بنا لیا گیا۔

    معاون خصوصی برائے احتساب نے مزید کہا ’سندھ میں منی لانڈرنگ کے لیے بینک بنایا گیا، جعلی اکاؤنٹس کے ذریعے 9 ارب روپے بینک کی ایکوٹی جاتی تھی، جعلی اکاؤنٹس کو اومنی گروپ چلاتا تھا، 2015 میں نواز شریف کی حکومت نے گٹھ جوڑ کے ذریعے رپورٹ دبائے رکھی۔‘

    یہ بھی پڑھیں:  میگا منی لانڈرنگ کیس: آصف زرداری کو نوٹس جاری، اومنی گروپ کی جائیدادیں منجمد کرنے کا حکم

    معاون خصوصی شہزاد اکبر نے بتایا کہ جے آئی ٹی کی تحقیقات کو داد دینے کی ضرورت ہے، جون 2018 میں از خود نوٹس لیا گیا، جے آئی ٹی ستمبر میں تشکیل دی گئی، جے آئی ٹی رپورٹ 900 صفحات پر مشتمل ہے، صرف 20 صفحات پڑھ کر دماغ گھوم جاتا ہے۔

    [bs-quote quote=”بلاول بھٹو کے لیے 27 بکروں کی قربانی بھی جعلی اکاؤنٹ سے کی گئی۔” style=”style-7″ align=”right” color=”#dd3333″ author_name=”شہزاد اکبر”][/bs-quote]

    بیرسٹر شہزاد اکبر نے کہا ’24500 مشتبہ کیش ٹرانزیکشن رپورٹ ہوئی ہیں، اومنی گروپ کے 32 پرائمری اکاؤنٹس 100 سے زائد جعلی اکاؤنٹس دیکھتے تھے، رپورٹ کے مطابق ٹیکس کے ذریعے آنے والا پیسا جائز پیسے میں ملا کر چھپایا جاتا تھا، جے آئی ٹی نے 924 افراد کے 11500 اکاؤنٹس کی جانچ کی جن کا کیس سے تعلق ہے۔‘

    انھوں نے مزید بتایا ’آصف زرداری 2007 تک پاک لین کی ایک کمپنی کے خود ڈائریکٹر تھے، ان کے ایک پلاٹ کو راتوں رات کمرشلائز کیا گیا اور قیمت بڑھائی گئی، نوڈیرو اور نواب شاہ میں زرعی اراضی خریدی گئی۔‘

    معاونِ خصوصی نے کہا ’ گلستان جوہر کی 7 ایکڑ زمین کو 46 ملین میں فروخت کر کے رقم جعلی اکاؤنٹس میں ڈالی گئی، سندھ میں تمام سبسڈیز کی رقم جعلی اکاؤنٹس میں جاتی تھی، 60.13 ارب کی سبسڈی بھی ان جعلی اکاؤنٹس میں گئی، منی لانڈرنگ کے لیے سندھ حکومت کا استعمال کیا گیا۔‘

    شہزاد اکبر نے مزید بتایا ’رپورٹ میں ماڈلز کے ذریعے اور دیگر ذرائع سے منی لانڈرنگ کی نشان دہی کی گئی ہے، اومنی گروپ نے جعلی کمپنیوں کے نام پر قرضے لیے، اومنی گروپ کو اثاثوں کی زائد قیمتیں ظاہر کر کے 54 ارب روپے کا قرضہ دیا گیا، جب کہ اثاثوں کی قیمتیں 15 ارب سے ز ائد نہیں تھیں، قرضہ سندھ بینک اور نیشنل بینک سے دلایا گیا۔

    [bs-quote quote=”گلستان جوہر کی 7 ایکڑ زمین کو 46 ملین میں فروخت کر کے رقم جعلی اکاؤنٹس میں ڈالی گئی، سندھ میں تمام سبسڈیز کی رقم جعلی اکاؤنٹس میں جاتی تھی۔” style=”style-7″ align=”center” color=”#dd3333″][/bs-quote]

    بیرسٹر شہزاد اکبر نے بتا کہ جے آئی ٹی رپورٹ کے مطابق جعلی اکاؤنٹس کیس کے مرکزی کردار آصف زرداری ہیں، فریال تالپور کے ڈیفنس کے گھر اور آصف زرداری کے نواب شاہ کے گھر کے لیے سیمنٹ جعلی اکاؤنٹس سے گیا۔ رپورٹ کے مطابق جلسوں کے لیے بلٹ پروف ٹرک کے پیسے بھی جعلی اکاؤنٹس سے گئے، اومنی کے طیارے پر زرداری اور اراکینِ سندھ حکومت نے 110 ٹرپ کیے۔

    انھوں نے بتایا ’جے آئی ٹی نے 16 نیب ریفرنسز دائر کرنے کی درخواست کی ہے، فاروق ایچ نائیک کے نام پر بھی جعلی اکاؤنٹ نکل آیا تھا، رپورٹ میں مراد علی شاہ کے بہ طورِ وزیرِ خزانہ، وزیرِ اعلیٰ کردار کو سامنے لایا گیا ہے، کیس میں بیرون ملک ملزمان کے لنک کی جلد تحقیقات کی درخواست کی گئی ہے، کیس میں ملزمان کا رویہ غیر سنجیدہ بتایا گیا ہے۔‘

    بلاول ہاؤس اور جعلی اکاؤنٹس

    رپورٹ کے مطابق ڈیڑھ ارب سے بلاول ہاؤس کے دونوں اطراف دس گھر خریدے گئے، بلاول ہاؤس میں عام طورپر کھانا منگوانے کے پیسے بھی جعلی اکاؤنٹس سے جاتے تھے، بلاول ہاؤس کراچی کے لیے 1.5 ملین کے یوٹیلٹی بلز جعلی اکاؤنٹس سے ادا کیے گئے۔

    شہزاد اکبر نے بتایا ’بلاول بھٹو کے لیے 27 بکروں کی قربانی بھی جعلی اکاؤنٹ سے کی گئی، بلاول ہاؤس میں ایک لاکھ روپے سے زائد کا برتھ ڈے کیک کھایا گیا جس کے لیے جعلی اکاؤنٹس سے پیسا دیا گیا۔‘

  • نیب کی راولپنڈی میں‌ بڑی کارروائی، خطیر رقم کی منی لانڈرنگ ناکام بنا دی

    نیب کی راولپنڈی میں‌ بڑی کارروائی، خطیر رقم کی منی لانڈرنگ ناکام بنا دی

    اسلام آباد: قومی احتساب بیورو ، راولپنڈی نے خطیر رقم منی لانڈرنگ کرنے کی کوشش ناکام بنا دی.

    تفصیلات کے مطابق نیب راولپنڈی نے آج اہم کارروائی کی ہے، جس میں‌ ای پی آئی کے عہدے دار کے گھرچھاپا مارا، جس میں‌تقریباً 2 کروڑ مالیت کی کرنسی برآمد ہوئی.

    نیب ذرائع کے مطابق برآمد رقم میں 9 ہزار ڈالر، 10 ہزار پاؤنڈ اور دیگرغیرملکی کرنسی شامل ہیں.

    نیب نے یہ اہم کارروائی بچوں کے حفاظتی ٹیکوں کے پروگرام میں کرپشن  کی شکایت پر کی، جس میں‌ خطیر رقم برآمد ہوئی، ملزم کو فی الحال گرفتار نہیں کیا گیا ہے، نیب ذرائع کی جانب سے ملزم کا نام بھی ظاہر  نہیں کیا گیا۔

    بچوں کا حفاظتی بچاؤ کے ٹیکوں کا یہ پروگرام اقوام متحدہ کی معاونت سے چل رہا ہے، جس میں‌ گھپلوں‌ کی اطلاعات تھیں.

    مزید پڑھیں: دہشت گردی اور منی لانڈرنگ کے خلاف پاک ترک باہمی تعاون کا عزم

    نیب ذرائع کے مطابق پیسےمنی لانڈرنگ کے ذریعے بیرون ملک بھجوائے جانے تھے،ای پی آئی کے عہدے دار کے گھرچھاپے میں برآمد ہونے والی رقم ایک فارماسیوٹیکل کمپنی سے کمیشن کے طور پر لی گئی تھی.

    یاد رہے کہ گذشتہ دونوں‌ وزیر اعظم عمران خان نے منی لانڈرنگ کے خلاف قانون سازی کرتے ہوئے سخت اقدامات کا عندیہ دیا تھا.

  • دہشت گردی اور منی لانڈرنگ کے خلاف پاک ترک باہمی تعاون کا عزم

    دہشت گردی اور منی لانڈرنگ کے خلاف پاک ترک باہمی تعاون کا عزم

    اسلام آباد: پاکستان اور ترکی نے دہشت گردی اور منی لانڈرنگ کی روک تھام کے سلسلے میں ایک دوسرے سے تعاون کا عزم کر لیا۔

    تفصیلات کے مطابق وزیرِ اعظم عمران خان سے ترک وزیرِ داخلہ سلیمان سوئیلو کی ملاقات میں دونوں ممالک کی طرف سے ایک دوسرے کو دہشت گردی اور منی لانڈرنگ کے سلسلے میں تعاون کی پیش کش کی گئی ہے۔

    [bs-quote quote=”منی لانڈرنگ کی روک تھام کے لیے پاکستان سے تعاون کے لیے تیار ہیں۔” style=”style-7″ align=”left” color=”#dd3333″ author_name=”سلیمان سوئیلو” author_job=”ترک وزیرِ داخلہ”][/bs-quote]

    وزیرِ اعظم عمران خان نے ترکی کو دہشت گردی کے خاتمے کے لیے مشترکہ اقدامات کی پیش کش کرتے ہوئے کہا کہ دہشت گردی ایک ملک نہیں پورے خطے کی سلامتی کے لیے خطرہ ہے۔

    وزیرِ اعظم نے ترک حکام کو منی لانڈرنگ کی روک تھام کے لیے اقدامات پر بریفنگ دیتے ہوئے کہا کہ غیر قانونی امیگریشن اور منی لانڈرنگ کے خلاف ہنگامی بنیادوں پر کام جاری ہے۔

    ترک وزیرِ داخلہ سلیمان سوئیلو نے کہا کہ ہم منی لانڈرنگ کی روک تھام کے لیے پاکستان سے تعاون کے لیے تیار ہیں۔ دریں اثنا دونوں ممالک کا غیر قانونی امیگریشن کے خاتمے کے لیے مضبوط میکنزم بنانے پر بھی اتفاق کیا گیا۔

    یہ بھی پڑھیں:   ترک وزیرداخلہ کی وزیراعظم عمران خان کو دورہ ترکی کی دعوت

    ملاقات میں ترکی کی طرف سے دہشت گردی کے خلاف جنگ میں پاکستان کی قربانیوں کا اعتراف کیا گیا، وزیرِ داخلہ نے کہا کہ پاکستان نے دہشت گردی کے خلاف جنگ میں بے پناہ قربانیاں دیں۔

    وزیرِ اعظم عمران خان نے کہا ترکی کے لیے پاکستانی عوام کے دلوں میں بے پناہ محبت ہے، عوام مصطفیٰ کمال اتاترک کی ترکی کے لیے خدمات کو جانتے ہیں، موجودہ ترک قیادت نے ملکی ترقی کے لیے انتہائی اہم اقدامات کیے۔

  • اے ایس ایف کی کارروائی، دو ملزمان سے 61 ہزار ڈالرکی رقم برآمد

    اے ایس ایف کی کارروائی، دو ملزمان سے 61 ہزار ڈالرکی رقم برآمد

    لاہور: ایئرپورٹ سیکیورٹی فورس نے دو الگ الگ کاروائیوں میں مجموعی طور 61 ہزار امریکی ڈالر سے زائد کی رقم برآمد کرلی ہے، ملزمان کو کسٹم حکام کے حوالے کردیا گیا ہے۔

    تفصیلات کے مطابق لاہور کے علامہ اقبال ایئرپورٹ پر سیکیورٹی فورس نے دو بڑی کارروائیاں کرتے ہوئے مسافروں کے سامان میں سے خطیر رقم برآمد کرتے ہوئے منی لانڈرنگ کی کوشش ناکام بنادی ہے۔

    اے ایس ایف ذرائع کے مطابق لاہور سے بنکاک جانے والے ایک مسافر کے بیگ کی تلاشی لی گئی تو اس میں سے 39100 امریکی ڈالر برآمد ہوئے، ملزم اور برآمد کردہ رقم کو کسٹم حکام کے حوالے کردیا گیا ہے۔

    دوسری کارروائی میں لی ژین وہ نامی ایک خاتون کے سامان کی تلاشی لینے پر 22،505امریکی ڈالر، 1،671چینی یوان اور 10400 پاکستانی روپے برآمد کرلیے۔ یہ خاتون بھی ایک غیر ملکی ائر لائن کے ذریعے بنکاک جا رہی تھیں۔

    برآمد ہونے والے امریکی ڈالروں کی تعداد 61،605 بنتی ہے جن کی مالیت پاکستان کرنسی میں پچاسی لاکھ انہتر ہزار اور دوسو پچپن روپے بنتی ہے۔

    یاد رہے کہ ملک بھر کے ایئرپورٹس پر منی لانڈرنگ کے خلاف زور وشور سے کارروائی جاری ہے اور چند دن قبل پشاور کے باچا خان ایئرپورٹ پر بھی منی لانڈرنگ کی ایک ایسی ہی کوشش ناکام بنادی گئی تھی۔ ابرار نامی مسافرقومی ایئر لائن کی پرواز پی کے 283 سے دبئی جا رہا تھا۔ تلاشی لینے پر اس کے سامان سے 9 ہزار 5 سو یورو برآمد ہوئے تھے۔

    خیال رہے کہ یکم دسمبر کو وزیرِ اعظم عمران خان نے کہا تھا کہ پاکستان میں 10 ارب ڈالر کی سالانہ منی لانڈرنگ ہوتی ہے، منی لانڈرنگ کے خلاف قانون لایا جا رہا ہے، پھر زبردست کریک ڈاون کیے جائیں گے۔