لاہو : ایف بی آر نے سینیٹ کی قائمہ کمیٹی برائے خزانہ کے رو برو سینٹ جیمز ہوٹل کی خریداری پہ رپورٹ پیش کردی، ہوٹل سینٹ جمیزممتاز صنعت کار اور حکومت کی اہم ترین شخصیت کے دوست میاں منشاء کی ملکیت ہے۔

تفصیلات کے مطابق ممتاز صنعت کارمیاں منشاء نے سنگاپور میں ایک پرتعیش ہو ٹل خریدا تھا جس کی بازگشت ایوانوں میں بھی سنی گئی۔ سینیٹ کی قائمہ کمیٹی برائے خزانہ نے ایف بی آر کوحکم دیا کہ خریداری سے متعلق تمام تفصیلات فراہم کی جائیں اور یہ بھی پتہ چلایاجائے کہ خریداری کے لیے رقوم کس طرح منتقل ہوئیں؟

ایف بی آر نے تحقیقاتی کمیٹی تشکیل دے کرتحقیقات کا آغازکردیا۔ آج سینیٹ کی قائمہ کمیٹی برائے خزانہ کے اجلاس میں ایف بی آرحکام نے پیش ہوکر بتایا کہ سینٹ جمیز ہوٹل کی خریداری کے حوالے سے  سنگاپور کی حکومت سے رجوع کرلیا ہےجنہوں نےمعلومات فراہم کرنے کے لیے90 دن کا وقت مانگا ہے جو ابھی پورا نہیں ہوا۔

انہوں نے مزید بتایا کہ ہوٹل سینٹ جمیز کی خریداری کے معاملے پرکچھ شواہد برطانیہ سے اکھٹے کیے گئے ہیں جو ابھی ناکافی ہیں اس لیے ان کو کمیٹی کے سامنے پیش کرنا قبل از وقت ہوگا۔

سینیٹ کی قائمہ کمیٹی کے چیرمین سلیم مانڈوی والا نے کہا کہ آپ نے تحقیقات ہماری ہدایت پرشروع کی تھی لیکن ہم سے پیش رفت کو کیوں چھپا رہے ہیں۔؟آخر اتنی بڑی رقم کیسے بیرون ملک منتقل ہوئی۔

ایف بی آر حکام نے کمیٹی چیئرمین کی جانب سے اٹھائے گئے سوال کے جواب میں کہا کہ چند شواہد برطانیہ سے حاصل کیے گئےہیں اورپاکستان و برطانیہ کے ساتھ ہونے والے معاہدے کے مطابق وہ پابند ہیں کہ تحقیقات مکمل ہونے تک تمام معلومات کو خفیہ رکھا جائے۔