Tag: موبائل انٹرنیٹ

کوئٹہ : بلوچستان ہائیکورٹ نے صوبے میں فوری موبائل انٹرنیٹ سروس بحال کرنے کا حکم دیتے ہوئے 31 اگست تک بندش کے فیصلے پر نظرثانی کرنے کی ہدایت کردی۔

تفصیلات کے مطابق بلوچستان ہائیکورٹ نے صوبے میں موبائل انٹرنیٹ اور پبلک ٹرانسپورٹ کی بندش کے خلاف دائر پٹیشن پر سماعت ہوئی۔

چیف جسٹس روزی خان بریچ اور جسٹس سردار احمد حلیمی پر مشتمل ڈویژن بینچ نے کیس کی سماعت کی، ایڈووکیٹ جنرل بلوچستان، ایڈیشنل اٹارنی جنرل اور محکمہ داخلہ کے حکام عدالت میں پیش ہوئے۔

ایڈووکیٹ جنرل نے مؤقف اختیار کیا کہ چہلم کے موقع پر سیکیورٹی خدشات کے پیش نظر موبائل سروسز معطل کی گئی ہیں اور صوبے بھر میں 31 اگست تک موبائل ڈیٹا بند رکھنے کا فیصلہ کیا گیا ہے۔

عدالت نے استفسار کیا کہ کیا سیکیورٹی خطرات پورے بلوچستان میں موجود ہیں؟ اس پر ایڈووکیٹ جنرل اور ایڈیشنل چیف سیکرٹری نے جواب دیا کہ سیکیورٹی خدشات صرف مخصوص علاقوں میں ہیں۔

سماعت کے دوران صوبائی حکومت کو حکم دیا کہ پبلک ٹرانسپورٹ سروسز کی معطلی کا نوٹیفکیشن فوری طور پر واپس لیا جائے۔

عدالت نے یہ بھی ہدایت کی کہ سیکیورٹی خدشات نہ رکھنے والے علاقوں میں موبائل فون نیٹ ورکس اور ڈیٹا سروسز فی الفور بحال کی جائیں۔

عدالت نے صوبائی حکومت کو 31 اگست تک بندش کے فیصلے پر نظرثانی کرنے کی ہدایت دیتے ہوئے کیس کی مزید سماعت 21 اگست تک ملتوی کر دی۔

اسلام آباد : پاکستانی خواتین نے موبائل انٹرنیٹ کے استعمال میں بھارت اور بنگلہ دیش کی خواتین کو پیچھے چھوڑ دیا۔

تفصیلات کے مطابق سیلولر ڈیجیٹل سروسز فراہم کرنے والے عالمی ادارے جی ایس ایم اے نے ‘موبائل جینڈر گیپ رپورٹ 2025’ جاری کردی۔

جس میں بتایا کہ خواتین کے موبائل انٹرنیٹ کے استعمال میں نمایاں اضافہ ہوا ہے، پاکستان میں پینتالیس فیصد خواتین موبائل انٹرنیٹ استعمال کر رہی ہیں، جبکہ بھارت میں یہ شرح انتالیس اور بنگلہ دیش میں صرف 26 فیصد ہے۔

رپورٹ میں وسیع تر جنوبی ایشیائی خطے کے مقابلے میں پاکستان کی ترقی پر روشنی ڈالی گئی ہے، جہاں صنفی فرق 32 فیصد پر بڑی حد تک بدستور برقرار ہے۔

سال 2023 میں یہ شرح پاکستان میں تینتیس فیصد تھی، جودوہزار چوبیس میں حیرت انگیز طور پر بارہ فیصد پوائنٹس کے اضافے سے پینتالیس فیصد تک جا پہنچی، جسے رپورٹ نے ’ڈیجیٹل بریک تھرو‘ قرار دیا ہے۔

خاص بات یہ ہے کہ دیہی خواتین بھی اس تیز رفتار ڈیجیٹل تبدیلی کا اہم حصہ بنی ہیں، مردوں کے مقابلےمیں انٹرنیٹ کے استعمال کا فرق بھی کم ہو کر 38 فیصد سے 25 فیصد رہ گیا ہے، صنفی تفریق میں کمی کی وجہ دیہی خواتین کا موبائل انٹرنیٹ کے استعمال میں اضافہ ہوا، یہ پیش رفت پاکستان میں خواتین کی ڈیجیٹل شمولیت اور خودمختاری کی مضبوط دلیل ہے۔

اسی عرصے کے دوران مردوں میں موبائل انٹرنیٹ کے استعمال میں بھی سات فیصد اضافہ ہوا، پاکستان مردوں میں موبائل فون کی ملکیت میں جنوبی ایشیا میں سرفہرست ہے، 93 فیصد کے پاس ڈیوائس ہے، جب کہ انڈیا میں 71% اور بنگلہ دیش میں 68 فیصد ہے۔