پاکستان میں موبائل فون کی مدد سے ڈرائیور کے بغیر چلنے والی کار تیار کرلی گئی، یہ کارنامہ ٹیکسلا کے نوجوان محمد سبحان فاروقی نے انجام دیا ہے۔
مکینیکل ڈپلومہ طالب علم سبحان فاروقی نے موبائل فون کے ذریعے گاڑی چلانے کا کامیاب تجربہ کرکے ٹیکسلا کا نام پاکستان سمیت دنیا بھر میں روشن کردیا یہ نوجوان ایلون مسک سے مقابلے کا بھی خواہش مند ہے۔
ا ےآر وائی نیوز کے پروگرام باخبر سویرا میں اس ہونہار نوجوان نے بحیثیت مہمان شرکت کی اور اپنی اس تاریخی ایجاد کے بارے میں بتایا۔
محمد سبحان نے بتایا کہ میں نے ایک کار بنائی ہے جو موبائل ایپلی کیشن کے ذریعے چلائی جاتی ہے جسے ہم موبائل فون سے کنٹرول کرسکتے ہیں۔
ان کا کہنا ہے کہ یہ اپلی کیشن پلے اسٹور پر پہلے سے موجود ہے ہم نے صرف ایسی کٹ بنائی ہے جو اس ایپ سے منسلک ہوکر گاڑی کو چلاتی ہے۔
اس کٹ کو بنانے میں مجھے تین ماہ کا عرصہ لگا، موبائل فون سے گاڑی کا اسٹیئرنگ بریک ایکسیلیٹر سمیت سب کچھ باآسانی کنٹرول کیا جاسکتا ہے۔
انہوں نے بتایا کہ ابتدائی طور پر یہ معذور افراد کیلیے بنانے کی کوشش ہے میرا ارداہ ہے کہ اب کار کو آرٹیفشل مائنڈ دیا جائے جیسے انسانوں سے بات کی جاتی ہے اسی طرح کار سے کہا جائے گا کہ فلاں شہر چلو تو یہ اپنے سینسرز کا استعمال کرتے ہوئے مطلوبہ شہر تک جائے گی۔
ایک سوال کے جواب میں سبحان نے بتایا کہ میں ایلون مسک سے بہت متاثر ہوں اور چاہتا ہوں ان سے مقابلہ کروں۔
