کراچی: وزارت داخلہ نے سندھ میں نو اور دس محرم الحرام کو موبائل فون سروس بند رکھنے کا فیصلہ کرلیا، موٹر سائیکل کی ڈبل سواری پر پہلے ہی 11محرم الحرام تک پابندی عائد ہے۔
وزارت داخلہ سندھ کے ذرائع نے بتایا کہ محرم الحرام کی سیکیورٹی کے پیش نظر سندھ بھر میں نو اور دس محرم الحرام یعنی منگل اور بدھ کو موبائل فون سروس بند رہے گی جس کے اوقات کار کا حتمی تعین ابھی باقی ہے۔
یہ پڑھیں: کراچی میں فائرنگ کے واقعات، ہائی الرٹ، ڈبل سواری پر پابندی
قبل ازیں سندھ حکومت نے سیکیورٹی خدشات کے پیش نظر وفاقی حکومت کو 8 تا 10 محرم الحرام موبائل فون سروس اور موٹر سائیکل کی ڈبل سواری پر پابندی عائد کرنے کی تجویز دی تھی جس پر عمل درآمد کیا جارہا ہے۔
یہ بھی پڑھیں:سندھ حکومت کی محرم میں موبائل فون اور ڈبل سواری پرپابندی کی تجویز
8 تا رات 10 بجے بندش کی سفارش کردی، سیکریٹری داخلہ
سیکریٹری داخلہ ریاض سومرو نے بتایا کہ سندھ میں صبح آٹھ سے رات 10 بجے تک موبائل فون سروس بند کرنے کے لیے وفاق سے سفارش کی ہے اس لیے کہ موبائل فون کی سروس بند کرنے کا اختیار وفاق کا ہے تاہم بندش کے معاملے پر تاحال وفاق کے جواب کے منتظر ہیں۔
بندش کا حکم تاحال موصول نہ ہوا، موبائل فون کمپنیاں
دوسری جانب موبائل فون سروس فراہم کرنے والی کمپنیاں بھی سروس کی بندش کے معاملے پر احکامات کی منتظر ہیں، انہیں تاحال وزارت داخلہ یا پاکستان ٹیلی کام اتھارٹی(پی ٹی اے) کی جانب سےکوئی حکم ابھی تک موصول نہیں ہوا۔
