پاکستان خصوصاً کراچی میں موبائل فون چھن جانا ایک عام بات بن چکی ہے اور کراچی میں باہر نکلنے والا تقریباً ہر تیسرا شخص کبھی نہ کبھی اپنے موبائل فون سے محروم ہوچکا ہوتا ہے۔
موبائل فون چھن جانے کی صورت میں پیسوں کا ضیاع اور اپنے جاننے والوں اور عزیز و اقارب سے کٹ جانا تو معمول کی بات ہے۔
لیکن اس سے بھی زیادہ خطرناک بات یہ ہے کہ آپ کے سوشل میڈیا اکاؤنٹس، موبائل فون میں محفوظ تصاویر اور ڈیٹا جرائم پیشہ افراد کے ہاتھ لگ سکتا ہے جو نامعلوم کس مقصد کے لیے آپ کی معلومات کو استعمال کریں۔
اس صورتحال سے بچنے کے لیے ایک ایسی ٹیکنالوجی تیار کرلی گئی ہے جو چھن جانے کے بعد آپ کے موبائل کو خود بخود تباہ کردے گی۔
یہ ٹیکنالوجی سعودی عرب کی کنگ عبداللہ یونیورسٹی آف سائنس اینڈ ٹیکنالوجی کے طالبعلموں نے تیار کی ہے۔
یہ ٹیکنالوجی ان افراد کے لیے نہایت مدد گار ہے جو بحالت مجبوری نہایت حساس نوعیت کا ڈیٹا اپنے موبائل فون میں لیے پھرتے ہیں جیسے حساس اداروں کے اہلکار، یا بینک میں لین دین سے وابستہ افراد۔
یہ ٹیکنالوجی ان افراد کو ان کے موبائل فون کے لیے اضافی سیکیورٹی فراہم کرتی ہے۔
اس ٹیکنالوجی کے تحت پولیمر کی ایک باریک تہہ موبائل فون میں لگا دی جاتی ہے۔ اسے ایک ایپ کے ذریعہ کسی دوسرے موبائل سے آپریٹ کیا جاسکتا ہے۔
جیسے ہی اسے آپریٹ کیا جائے گا یہ موبائل کی بیٹری سے حرارت لے کر اس کی سیلی کون کی چپ کو تباہ کردے گی جس کے بعد موبائل میں موجود تمام ڈیٹا ضائع ہوجائے گا۔
