ARYNews.tv | Urdu – Har Lamha Bakhabar

Tag: موساد

  • ایران نے موساد سے وابستہ سائبر ٹیم کے سربراہ کو پھانسی دیدی

    ایران نے موساد سے وابستہ سائبر ٹیم کے سربراہ کو پھانسی دیدی

    تہران: ایران نے اسرائیل کی خفیہ تنظیم ’موساد‘ سے وابستہ سائبر ٹیم کے سربراہ کو پھانسی دے دی۔

    ایران کی سرکاری خبر رساں ادارے تسنیم کے مطابق ایران نے محمدامین شایستہ نامی ایک قیدی کو پھانسی دے دی جسے اسرائیل کی خفیہ ایجنسی موساد کے ساتھ مبینہ طور پر تعاون کے الزام میں سزائے موت سنائی گئی تھی۔

    ایرانی میڈیا کے مطابق محمدامین شایستہ کو 2023 میں گرفتار کیا گیا تھا اور تسنیم نے اسے "موساد سے وابستہ سائبر ٹیم کا سربراہ” قرار دیا تھا۔

     واضح رہے کہ 13 جون کو اسرائیلی حملوں کے آغاز کے بعد ایرانی حکام کم از کم 3 افراد کو اسرائیل کے لیے جاسوسی کے جرم میں پھانسی دے چکے ہیں۔

    ایران اسرائیل کشیدگی سے متعلق تمام خبریں

    گزشتہ روز ایرانی عدلیہ سے وابستہ خبر رساں ادارے میزان نے اطلاع دی تھی کہ مجید موسیبی نامی شخص کو اسرائیل کے لیے جاسوسی کرنے اور اس کی انٹیلی جنس ایجنسی موساد کو حساس معلومات فراہم کرنے کی کوشش کے الزام میں اتوار کی صبح پھانسی دے دی گئی۔

    جبکہ چند روز قبل ایرانی حکام نے اسرائیل کی خفیہ ایجنسی موساد کیلیے جاسوسی کے الزام میں مزید پانچ افراد کو گرفتار کر لیا تھا۔

    یہ گرفتاریاں اسلامی انقلابی گارڈ کور کے انٹیلی جنس یونٹ نے مغربی ایران کے صوبہ لرستان میں کی تھیں۔ مشتبہ افراد نے مبینہ طور پر خرم آباد، بروجرد اور دورود کے شہروں میں موساد کی ہدایت پر کارروائیاں کرنے کی کوشش کی۔

    ایرانی حکام کا دعویٰ تھا کہ یہ گرفتاریاں ملک کے اندر غیر ملکی انٹیلی جنس کارروائیوں کے خلاف ایک تیز مہم کا حصہ ہیں۔

  • موساد نے ایران کے اندر ڈرون کیسے اسمگل کیے؟ اے آئی سے کیسے مدد لی؟

    موساد نے ایران کے اندر ڈرون کیسے اسمگل کیے؟ اے آئی سے کیسے مدد لی؟

    امریکی نیوز ایجنسی ایسوسی ایٹڈ پریس نے رپورٹ کیا ہے کہ اسرائیل کی جاسوسی ایجنسی موساد نے ایران میں ڈرون اسمگل کیے تھے، اور حملے کی تیاری کے لیے آرٹیفیشل انٹیلیجنس (AI) کا استعمال کیا۔

    ایسوسی ایٹڈ پریس کے مطابق موساد نے ایران پر حملے کی تیاری کے لیے مصنوعی ذہانت اور اسمگل شدہ ڈرونز کا استعمال کیا، اے پی نے رپورٹ کیا کہ ایران کی جوہری تنصیبات پر حملے کی تیاری برسوں سے جاری تھی۔

    ایک سابق انٹیلیجنس افسر، جس نے حملے کے بارے میں علم رکھنے کا دعویٰ کیا تھا، نے بتایا کہ موساد اور اسرائیلی فوج نے آپریشنل بنیاد ڈالنے کے لیے کم از کم 3 سال تک مل کر کام کیا۔

    ایران نے اسرائیل پر فتح 1 ہائپر سونک میزائل داغ دیا

    اسرائیل کے دو موجودہ سیکیورٹی حکام نے نام ظاہر نہ کرنے کی شرط پر بتایا کہ اکتوبر میں اسرائیل نے ایران پر متعدد بار فضائی حملے کیے تھے، اس کے بعد ایرانی فضائی دفاع کو مزید کمزور کرنے کے لیے موساد کے ایجنٹوں نے ایسے ہتھیار ایران اسمگل کیے جو قریب سے حملہ کرنے کے لیے تیار کیے گئے تھے۔

    سابق انٹیلی جنس افسر کے مطابق ان ہتھیاروں میں چھوٹے مسلح ڈرونز شامل تھے، جنھیں ایجنٹوں نے گاڑیوں میں ایران کے اندر اسمگل کیا تھا۔ جب کہ اسرائیل نے AI کا استعمال اپنی جمع کردہ معلومات کا تجزیہ کرنے اور ڈیٹا کے ڈھیروں کو چھاننے کے لیے کیا۔

    ایران اسرائیل جنگ سے متعلق تازہ ترین خبریں یہاں پڑھیں

  • ایران نے موساد کے لیے جاسوسی کے الزام میں ایک شخص کو پھانسی دے دی

    ایران نے موساد کے لیے جاسوسی کے الزام میں ایک شخص کو پھانسی دے دی

    تہران : ایران نے اسرائیلی انٹیلی جنس ایجنسی موساد کے لیے جاسوسی کے الزام میں ایک شخص کو پھانسی دے دی۔

    تفصیلات کے مطابق ایرانی نیوز ایجنسی تہران ٹائمز کی جانب سے بتایا گیا ہے کہ ایران میں اسرائیلی انٹیلی جنس ایجنسی موساد کے لیے جاسوسی کے الزام میں گرفتار شخص کو پھانسی دی گئی ہے۔

    ایران کی سپریم کورٹ نے جاسوس اسماعیل فکری کو مکمل فوجداری مقدمے کے بعد آرٹیکل سکس کے تحت سزائے موت کا حکم دیا۔

    جاسوسی کے الزام میں پھانسی پر چڑھائے گئے شخص کا نام اسماعیل فکری ہے،متعلقہ شخص کو دسمبر میں گرفتار کیا گیا تھا۔

    رپورٹ میں کہا ایرانی موقف ہے کہ اسماعیل فکری موساد کے دو ایجنٹس سے رابطے میں تھا اور اورانہیں انتہائی حساس اور قومی سلامتی سے متعلق انٹیلی جنس معلومات فراہم کررہا تھا۔

    سیکیورٹی حکام نے اسماعیل فکری کے الیکٹرانک آلات کا فرانزک تجزیہ کیا، جس میں موساد کے ہینڈلرز سے تفصیلی مواصلات اور ہدایات کا پردہ فاش کیا۔

    مزید پڑھیں : اسرائیل کیلیے دھچکا، ایران میں موساد کے ایجنٹس گرفتار

    گذشتہ روز ایران میں اہم کارروائی کے دوران اسرائیل کی بدنام زمانہ خفیہ ایجنسی موساد کے ایجنٹ کو گرفتار کیا گیا تھا، ایجنٹ کو اُس وقت گرفتار کیا گیا جب وہ ایرانی صوبے البرز میں دھماکا خیز مواد اور الیکٹرانک آلات تیار کر رہے تھے۔

    واضح رہے کہ ایران میں پہلے بھی موساد سے تعلق رکھنے والے متعدد ایجنٹ کو گرفتار کیا جا چکا ہے، خاص طور پر اُن لوگوں کو جو جوہری پروگرام کو مجروح کرنے کیلیے تخریب کاری اور قتل کی کوششوں مین ملوث ہیں۔

  • حزب اللہ کے راکٹوں کا ہدف موساد کے خفیہ ٹھکانے تھے، اسرائیلی میڈیا کا دعویٰ

    حزب اللہ کے راکٹوں کا ہدف موساد کے خفیہ ٹھکانے تھے، اسرائیلی میڈیا کا دعویٰ

    اسرائیلی میڈیا نے دعویٰ کیا ہے کہ حزب اللہ کے راکٹوں کا ہدف موساد کے خفیہ ٹھکانے تھے۔

    غیر ملکی میڈیا رپورٹس کے مطابق حزب اللہ نے اسرائیل پر ایک بار پھر راکٹوں کی بارش کر دی ہے، اسرائیلی میڈیا نے کہا ہے کہ اسرائیلی فوج کا دعویٰ ہے کہ لبنانی گروپ کا ارادہ راتوں رات وسطی اسرائیل میں ملٹری انٹیلی جنس اور موساد کے ٹھکانوں پر حملہ کرنا تھا۔

    اسرائیلی میڈیا کا کہنا ہے کہ ایسا لگتا ہے کہ حزب اللہ نے ایک اسٹریٹجک ہدف کو نشانہ بنایا، جب کہ اسرائیلی فوج نے یہ بھی دعویٰ کیا ہے کہ اس نے قبل از وقت لبنانی گروپ کے ٹھکانوں پر حملے کیے، اور جنوبی لبنان میں سیکڑوں راکٹ لانچروں کو تباہ کر دیا۔

    اسرائیل اور حزب اللہ کے درمیان تنازعہ کے آغاز کے بعد سے یہ اسرائیلی فوج کی طرف سے کیا گیا سب سے بڑا حملہ تھا، ایک وسیع حملہ جس میں 40 مقامات کو نشانہ بنایا گیا۔ اسرائیلی فوج کا کہنا ہے کہ انھوں نے جو بھی حملے کیے وہ اپنے دفاع میں تھے، نیتن یاہو نے بھی ایک بیان میں کہا کہ اسرائیل نے لبنانی گروپ کے خطرے کو دور کرنے کے لیے قبل از وقت حملے کیے۔

    حزب اللہ اور اسرائیل نے ایک دوسرے پر میزائل حملے شروع کر دیے

    تاہم دوسری طرف حزب اللہ نے کہا ہے کہ اسرائیل کی جانب سے قبل از وقت کارروائیوں اور گروپ کے اہداف کو نشانہ بنانے اور گروپ کے حملوں میں رکاوٹ کے دعوے بے بنیاد اور زمینی حقائق کے منافی ہیں۔

    لبنانی گروپ نے کہا کہ تمام ڈرون اپنی سائٹوں سے مخصوص اوقات میں لانچ کیے گئے، اور یہ سرحد پار کر کے اسرائیل میں ’متعدد راستوں سے اپنے مطلوبہ اہداف کی طرف‘ گئے، اور اس طرح، آج کے لیے ’’ہمارا فوجی آپریشن مکمل ہو گیا ہے۔‘‘ حزب اللہ کا یہ بھی کہنا ہے کہ آج کسی وقت اس کے سربراہ حسن نصر اللہ ان حملوں کی تفصیلات ٹی وی خطاب میں بتائیں گے۔

  • اسماعیل ہنیہ کا قتل موساد نے ایرانی ایجنٹوں کے ذریعے کیا، برطانوی اخبار کا دعویٰ

    اسماعیل ہنیہ کا قتل موساد نے ایرانی ایجنٹوں کے ذریعے کیا، برطانوی اخبار کا دعویٰ

    برطانوی اخبار ٹیلی گراف نے ایک رپورٹ میں دعویٰ کیا ہے کہ اسرائیلی خفیہ ایجنسی موساد نے حماس کے سیاسی رہنما اسماعیل ہنیہ کو ایرانی ایجنٹوں کے ذریعے قتل کرایا۔

    برطانوی اخبار نے اپنی رپورٹ میں ایک اور انکشاف بھی کیا ہے کہ ایرانی ایجنٹوں نے گیسٹ ہاؤس کے 3 کمروں میں پہلے ہی دھماکا خیز مواد نصب کیا تھا، اور دھماکا خیز مواد نصب کرنے والے ایجنٹ ایران چھوڑ چکے تھے۔

    رپورٹ میں انکشاف کیا گیا ہے کہ ایران کے صدر ابراہیم رئیسی کے جنازے میں شرکت کے موقع پر اسماعیل ہنیہ کو قتل کیا جانا تھا، تاہم نئے صدر کی حلف برداری کے موقع پر یہ اقدام کیا گیا، اور دھماکا خیز مواد ایران کے باہر سے ریموٹ کنٹرول کے ذریعے تباہ کیا گیا۔

    اخبار کے مطابق ایرانی حکام کے پاس گیسٹ ہاؤس کے کمروں میں ایجنٹوں کے انتہائی تیزی سے آنے جانے کی ویڈیو بھی موجود ہے۔

    دوسری طرف برطانوی میڈیا کا کہنا ہے کہ گزشتہ 2 روز میں ایران کے رہبر اعلیٰ متعدد بار تمام کمانڈروں کو طلب کر چکے ہیں، وہ ان سے جواب کے خواہاں ہیں، اور ان کے نزدیک سیکیورٹی کی خلاف ورزی کو حل کرنا اب بدلہ لینے سے زیادہ اہم ہے۔

    اس سے قبل امریکی اخبار نیویارک ٹائمز نے رپورٹ میں انکشاف کیا تھا کہ حماس لیڈر اسماعیل ہنیہ کی شہادت ان کے کمرے میں نصب دھماکا خیز مواد پھٹنے سے ہوئی، جو ریسٹ روم میں 2 مہینے قبل چھپایا گیا تھا اور بم کو ریموٹ کنٹرول سے اُس وقت پھاڑا گیا جب اسماعیل ہنیہ کی اپنے کمرے میں موجودگی کی تصدیق ہوئی۔ اس دھماکے میں اُن کا ذاتی محافظ بھی شہید ہوا۔

    واضح رہے اسماعیل ہنیہ شمالی تہران کے جس گیسٹ ہاؤس میں قیام پذیر تھے وہ جس کمپاؤنڈ میں واقع ہے، اس کا کنٹرول ایران کی سپاہِ پاسداران انقلاب کے پاس تھا اور یہ کمپاؤنڈ کئی سرکاری عمارات کے ایک سلسلے کا حصہ ہے جسے ’نشاط‘ کہا جاتا ہے۔

    حماس سربراہ نے ایرانی صدر مسعود پزشکیان کی تقریب حلف برداری کے لیے تہران آئے تھے اور ایک روز قبل انھوں نے اس تقریب میں شرکت کی تھی۔

  • ایران میں اسرائیلی خفیہ ایجنسی کے 4 افراد کو پھانسی دیدی گئی

    ایران میں اسرائیلی خفیہ ایجنسی کے 4 افراد کو پھانسی دیدی گئی

    ایران میں اسرائیل کی خفیہ ایجنسی موساد سے تعلق رکھنے والے 4 افراد کو پھانسی پر لٹکا دیا گیا۔

    بین الاقوامی خبر رساں ادارے کی رپورٹ کے مطابق چاروں افراد نے ملکی سلامتی کے خلاف موساد کے افسران کے کہنے پر کارروائیاں کی تھیں، جنہیں آج صبح ان کے انجام تک پہنچا دیا۔

    ایران نے اس سے قبل اسرائیل سمیت بیرونی ممالک کے لیے کام کرنے والے مبینہ ایجنٹوں کی گرفتاریوں اور انہیں سزائے موت دینے کا فیصلہ کیا تھا، ایران کی جانب سے متعدد بار موساد کی کارروائیوں کو ناکام بنانے کا دعویٰ بھی سامنے آیا ہے۔

    دوسری جانب ایران کی پاسداران انقلاب کے سربراہ جنرل حسین سلامی نے اسرائیل کو واضح پیغام دیتے ہوئے کہا ہے کہ ہمارا انتقام صیہونی ریاست کے خاتمے کے ساتھ ہی رکے گا۔

    رپورٹ کے مطابق جنرل حسین سلامی نے ایران کے دارالحکومت تہران میں اجتماع سے خطاب کرتے ہوئے کہا کہ ہمارا بدلہ بہت ہولناک ثابت ہوگا، ایران اپنے شہریوں کی ہلاکت کو فراموش نہیں کرسکتا۔

    اسرائیل جانیوالے بحری جہازوں پر حوثی باغیوں کا 22 واں حملہ

    جنرل حسین سلامی کا کہنا تھا کہ طوفان اقصیٰ کارروائی کو کسی بیرونی مدد کے بغیر سر انجام دیا گیا، جو 75 سالوں سے جاری اسرائیلی ظلم اور بربریت پر ردعمل تھا، طوفان اقصیٰ آپریشن مکمل طور پر فلسطینی کارروائی تھی جسے خود فلسطینیوں نے عملی جامہ پہنایا۔

  • موساد سے تعاون، ایران میں 4 افراد کو سزائے موت

    موساد سے تعاون، ایران میں 4 افراد کو سزائے موت

    تہران: ایران میں اسرائیلی انٹیلی جنس سے تعاون اور اغوا کے جرم پر 4 افراد کو سزائے موت کی سزا دی گئی۔

    ایرانی خبر ایجنسی مہر کے مطابق بدھ کو ایرانی عدالت نے چار افراد کو اسرائیلی خفیہ تنظیم موساد کے ساتھ تعاون اور اسرائیلی انٹیلی جنس سروس کی ہدایات پر چوری چکاری، اغوا اور عوامی املاک کو نقصان پہنچانے کے جرم میں ملوث پائے جانے پر سزائے موت دے دی۔

    اس گروہ کے دیگر 3 افراد کو قومی سلامتی کو نقصان پہنچانے، غیر قانونی اسلحہ رکھنے اور اغوا کی وارداتوں میں معاونت پر 5 سے 10 سال قید کی سزا سنائی گئی۔ یہ گروہ پاسداران انقلاب اور وزارتِ خفیہ اطلاعات کی مشترکہ کارروائی میں پکڑا گیا تھا۔

    اسلامی جمہوریہ ایران طویل عرصے سے اپنے دیرینہ دشمن اسرائیل پر اپنی سرزمین پر خفیہ کارروائیاں کرنے کا الزام لگاتا رہا ہے، تہران نے حال ہی میں اسرائیلی اور مغربی انٹیلی جنس سروسز پر ملک میں خانہ جنگی کی سازش کا الزام لگایا تھا، ان دنوں ایران 1979 کے اسلامی انقلاب کے بعد سے سب سے بڑے حکومت مخالف مظاہروں کی زد میں ہے۔

    چین اور روسی جنگی طیارے داخل ہوتے ہی جنوبی کورین طیاروں کی ہنگامی اڑانیں

    مہر نیوز ایجنسی نے اسرائیل کا حوالہ دیتے ہوئے کہا کہ انھیں ’’صہیونی حکومت کی انٹیلی جنس سروسز کے ساتھ تعاون اور اغوا کے جرم میں موت کی سزا سنائی گئی ہے۔‘‘

    دوسری جانب ایران میں کُرد خاتون مہسا امینی کی پولیس کسٹڈی میں ہلاکت کے خلاف مظاہروں پر کریک ڈاؤن کے دوران ہلاکتوں کی تعداد 448 ہو گئی ہے۔

    ہیومن رائٹس واچ کے مطابق نصف سے زائد ہلاکتیں ایران کے نسلی اقلیتی علاقوں میں ہوئیں، اور ہلاک ہونے والے مظاہرین میں 60 افراد کی عمریں 18 سال سے کم تھیں، ہلاک ہونے والوں میں 9 لڑکیاں اور 29 خواتین بھی شامل ہیں۔

  • ترکی نے موساد کا بڑا منصوبہ ناکام بنا دیا، 15 اسرائیلی جاسوس گرفتار

    ترکی نے موساد کا بڑا منصوبہ ناکام بنا دیا، 15 اسرائیلی جاسوس گرفتار

    انقرہ: ترکی نے ایک بڑی کارروائی میں اپنی سرزمین پر اسرائیلی خفیہ ایجنسی موساد کا منصوبہ ناکام بنا کر اس کے 15 جاسوس گرفتار کر لیے۔

    تفصیلات کے مطابق ترکی کی نیشنل انٹیلیجنس آرگنائزیشن ( ایم آئی ٹی) نے ایک کارروائی میں موساد کے ایک بڑے حلقے کو توڑ ڈالا ہے، پندرہ ایسے موساد جاسوس گرفتار کیے گئے ہیں جو ترکی کے علاقے میں کام کر رہے تھے اور ایک سال سے خفیہ طور پر ان کی نگرانی کی جا رہی تھی۔

    جمعرات کو ترک اخبار نے اپنی رپورٹ میں بتایا کہ مشتبہ جاسوس رواں ماہ قبل گرفتار کیے گئے ہیں، ان جاسوسوں نے ترک شہریوں اور ترکی میں تعلیم حاصل کرنے والے طلبہ کے سلسلے میں معلومات موساد کو فراہم کی تھیں، یہ وہ طلبہ تھے جنھیں امکانی طور پر دفاعی انڈسٹری میں جانا تھا۔

    رپورٹس کے مطابق اسرائیلی خفیہ ایجنسی موساد کے جاسوس 7 اکتوبر کو کیے جانے والے ایک خفیہ آپریشن کے ذریعے گرفتار کیے گئے، یہ آپریشن ترکی کے چار مختلف صوبوں میں بیک وقت کیا گیا تھا۔

    ابتدائی طور پر یہ بھی معلوم ہوا ہے کہ موساد کے جاسوسوں کا زیادہ تر ہدف ان ممالک کے طلبہ تھے جو اسرائیل مخالف سمجھے جاتے ہیں، اس حوالے سے یہ انکشاف بھی ہوا ہے کہ موساد کے فیلڈ آفیسرز سے بیرون ملک ملاقاتوں کا بھی اہتمام کیا جاتا تھا۔

    یاد رہے کہ ترکی کا شمار ان مسلم ممالک میں ہوتا ہے جن کے اسرائیل کے ساتھ سفارتی تعلقات قائم ہیں، تاہم یروشلم کے ساتھ انقرہ کے تعلقات اردگان کی فلسطینیوں کی حمایت کی وجہ سے حالیہ برسوں میں ناخوش گوار رہے ہیں۔