Tag: موساد کے ایجنٹ کو پھانسی

تہران: ایران نے اسرائیل کی موساد انٹیلی جنس سروس کے ایجنٹ کو پھانسی دے دی۔

روئٹرز کے مطابق ایران کی سرکاری نیوز ایجنسی نے کہا ہے کہ ہفتے کے روز ایران کے جنوب مشرقی صوبہ سیستان بلوچستان میں اسرائیل کی موساد انٹیلی جنس سروس کے ایک ایجنٹ کو پھانسی دے دی گئی ہے۔

خبر میں کہا گیا ہے کہ ایجنٹ کے غیر ملکی ایجنسی موساد کے ساتھ روابط تھے، اور اس نے خفیہ معلومات اکٹھی کی تھیں، اور ساتھیوں کے ساتھ مل کر موساد سمیت غیر ملکی ایجنسیوں کو دستاویزات فراہم کی تھیں۔

جس ایجنٹ کو پھانسی دی گئی ہے اس شخص کا نام ظاہر نہیں کیا گیا ہے، تاہم یہ بتایا گیا ہے کہ ملزم نے اسلامی جمہوریہ کے مخالف گروہوں اور تنظیموں کے لیے پروپیگنڈا کے مقصد کے ساتھ موساد کے افسر کو خفیہ معلومات فراہم کی تھیں۔

ایران میں پولیس اسٹیشن پر دہشت گرد حملہ، 11 سیکیورٹی اہلکار ہلاک

یہ خفیہ معلومات کہاں فراہم کی گئی تھیں، اور مبینہ ایجنٹ کو کب گرفتار کیا گیا تھا، خبر میں اس سلسلے میں کوئی تفصیل فراہم نہیں کی گئی ہے، تاہم مذکورہ ایجنٹ کی جانب سے کی گئی ایک اپیل مسترد کر دی گئی تھی۔

پھانسی سیستان-بلوچستان کی زاہدان جیل میں عمل میں آئی ہے، جہاں ایک روز قبل عسکریت پسندوں کی جانب سے صوبے کے ایک پولیس اسٹیشن پر حملہ کیا گیا تھا، جس میں 11 سیکیورٹی اہلکار ہلاک اور متعدد زخمی ہوئے تھے۔