کراچی: سندھ حکومت نے سرکاری و نجی اسکولوں میں موسم سرما کی تعطیلات کا اعلان کردیا جس کا نوٹفکیشن بھی جاری کردیا گیا۔
تفصیلات کے مطابق سندھ کی محکمہ تعلیم نے چھٹیوں کا نوٹیفکیشن جاری کر دیا جس کے مطابق تمام سرکاری اور نجی اسکولز 22 دسمبر سے 31 دسمبر تک موسم سرما کی تعطیلات ہوں گی۔
نوٹیفکیشن میں کہا گیا ہے کہ موسم سرما کی چھٹیوں کے بعد یکم جنوری2024 سے اسکولز دوبارہ کھلیں گے۔
سندھ کی سیکریٹری تعلیم کے مطابق محکمہ کی سالانہ اسٹیرنگ کمیٹی کے فیصلے کے مطابق تعطیلات کی جارہی ہیں۔
کینو اور مالٹے موسم سرما کی ایک خوبصورت سوغات ہیں یہ غذائیت سے بھرپور پھل ہیں، یہ جلد کو مضبوط اور صاف رکھتے ہیں اور بہت سی بیماریوں کے خطرے کو کم کرنے میں بے حد کارآمد ہیں۔
اے آر وائی نیوز کے پروگرام باخبر سویرا میں ماہر غذائیت حنا انیس نے ناظرین کو کینو کے فوائد اور اس کے استعمال کرنے سے متعلق آگاہ کیا۔
انہوں نے کہا کہ یہ بات مشہور ہوگئی ہے کہ کینو کو کھانا نہیں پینا چاہیے یہ بالکل غلط ہے کینو کا صرف جوس ہی نہیں بلکہ یہ پورا کا پورا فائدہ مند ہے اس کو چبا کر کھانا چاہیے اس کی جو وائٹ چھلی ہوتی ہے اس میں جو وائٹ جھلی ہوتی ہے اس میں سب سے زیادہ وٹامن سی اور کیلشیئم ہے۔
حنا انیس نے بتایا کہ کینو کے بیج بھی بہت فائدہ مند ہیں یہ گردوں سے زہریلے مادے کو خارج (ڈی ٹاکس) کرتے ہیں، لیکن اس کے استعمال کو طریقہ الگ ہے کیونکہ یہ کڑوے ہوتے ہیں لہٰذا ان کو سکھانے کے بعد ابال کر اس کا قہوہ پیئیں، جن بچوں کے پیٹ میں کیڑے ہوتے ہیں ان کیلئے بھی مفید ہیں۔
ان کا کہنا تھا کہ اس پھل میں موجود وٹامن سی جسمانی دفاعی نظام کو بہتر کرتا ہے جو کہ موسمی بیماریوں یا انفیکشن وغیرہ کے خلاف مزاحمت کرتا ہے جبکہ کینسر کا باعث بننے والے فری ریڈیکلز کو بھی کم کرتا ہے۔
اس کے علاوہ یہ بھی افواہ ہی ہے کہ کھٹے کینو کھانے سے گلا خراب ہوجائے گا ایسا بالکل نہیں کیونکہ اس میں وٹامن سی ہوتا ہے اس کو پسی ہوئی کالی مرچ اور نمک کے ساتھ کھائیں بہت فائدہ دے گا۔
اگر آپ اکثر کھانے کے بعد معدے میں تیزابیت یا سینے میں جلن کو محسوس کرتے ہیں، تو اس موسم میں کینو آپ کے لیے بہترین علاج ہے۔
یہ پھل معدنیاتی نمک سے بھرپور ہوتا ہے جو کہ معدے کی تیزابیت کو کم کرتا ہے جبکہ اسے روز کھانا سینے میں جلن کے مسئلے کو بھی دور رکھتا ہے۔
عام طور پر یہ تصور کیا جاتا ہے کہ کوئی بھی میٹھی چیز صحت کیلئے نقصان دہ ہوتی ہے لیکن کھجور ایک ایسا پھل ہے جو اس زمرے میں نہیں آتا۔
گلوکوز سے بھرپور خشک پھل کھجور صحت کے لیے انتہائی مفید ہے، کھجور کے اندر صحت کے لیے کئی ایسے فوائد چھپے ہیں جو خاص طور پر موسم سرما میں اسے کھانے سے انسان کو بہت سے امراض سے محفوظ رکھتے ہیں۔
اگر آپ موسم سرما میں صحت کے حوالے سے مختلف مسائل مثلا نزلہ ، ٹھنڈ ، جوڑوں کے درد ، الرجی اور فلو کا شکار رہتے ہیں تو آپ کو لازمی طور کھجور کا استعمال کرنا چاہیے۔
صحت کے امور سے متعلق ویب سائٹ "بولڈ اسکائی” پر کھجور کے ایسے فوائد پیش کیے گئے ہیں جن کو جان کر آپ سردیوں میں کھجور کھانے پر مجبور ہو جائیں گے :
کھجور کو ریشے ، فولاد ، کیلشیئم ، وٹامن اور میگنیشیئم کا اچھا ذریعہ شمار کیا جاتا ہے اور یہ سب عناصر سردیوں میں انسانی جسم کو گرم رکھنے میں مدد دیتے ہیں۔
اگر آپ ٹھنڈ کے اثر سے نزلے میں مبتلا ہیں تو آپ دو سے تین کھجوریں ، دو عدد چھوٹی الائچی اور چند ٹکڑے لال مرچ کو لے کر گرم پانی میں ڈال کر کچھ دیر اُبال لیں اور پھر چھان کر سونے سے پہلے اسے مشروب کے طور پر استعمال کریں۔
کھجور کے ذریعے دمے اور سانس سے متعلق دیگر الرجیوں کا بھی علاج ممکن ہے جن کا شمار سردیوں کے موسم میں پھیلے عمومی عام مسائل میں ہوتا ہے۔ اس مقصد کے لیے روزانہ صبح اور شام کھجور کے ایک یا دو دانے پابندی سے کھنا چاہئیں۔
کھجور میں موجود قدرتی شکر انسانی جسم کو فوری توانائی دینے میں مددگار ہوتی ہے۔
چوں کہ کھجور ریشے سے بھرپور ہوتی ہے لہذا اسے رات بھر پانی میں بھگو کر صبح اس کو Blender میں پیس لیں اور نہار منہ پی لیں۔ یہ عمل قبض کے علاج میں بہت مفید ثابت ہوگا۔
ریشے سے بھرپور ہونے کے پیشِ نظر کھجور دل کی صحت کی حفاظت کرتی ہے۔ یہ دل کی دھڑکن کی رفتار اعتدال اور کنٹرول میں رکھتی ہے۔ اس کے علاوہ دل کے دوروں کے خطرات سے بھی بچاتی ہے ۔
کھجور انسان کے جوڑوں کے درد اور سوجن کی تکلیف میں کمی کرتی ہے بالخصوص سردیوں کے موسم میں جب کہ یہ مسئلہ بکثرت پھیلا ہوتا ہے۔
کھجور میں موجود میگنیشیئم اور پوٹاشیئم بلند فشار خون کو کم کرنے کے لیے قدرتی عامل ہیں۔ اس واسطے روزانہ 5 سے 6 کھجوریں کھانے کی ہدایت کی جاتی ہے۔
اسلام آباد : نگران حکومت نے نئے گیس کنکشنز پر پابندی برقرار رکھنے کا فیصلہ کرتے ہوئے موسم سرما میں گیس مہنگی ہونے کے ساتھ صرف 8 گھنٹے ملے گی۔
تفصیلات کے مطابق نگران وزیر توانائی محمد علی نے صارفین کو خبردار کیا ہے کہ موسم سرمامیں گیس مہنگی ہونے کے ساتھ صرف 8 گھنٹے ملے گی۔
محمد علی نے بتایا کہ صبح،دوپہر اور شام کےاوقات میں گیس ملے گی تاہم سردیوں میں 8گھنٹے گیس کی فراہمی یقینی بنائیں گے۔
نگران وزیر توانائی کہا کہ نئے گیس کنکشنز پر پابندی برقرار رکھنے کا فیصلہ کیا یے ، ملک میں جتنی گیس ہے اتنی ہی ملے گی، نئے کنکشنز کیلئے ملک میں گیس نہیں ہے۔
دسمبر کیلئے 2 ایل این جی کارگوز کا بندوبست کرلیا ہے اور جنوری کیلئے بھی 2 ایل این جی کارگوز منگوائیں گے۔
کراچی : کراچی چمبر کے صدر افتخار شیخ نے حکومت کی جانب سے صنعتوں کے لئے موسم سرما میں سستی بجلی پیکیج پر آمادگی کا خیر مقدم کیا۔
تفصیلات کے مطابق کراچی چیمبر آف کامرس اینڈ انڈسٹری (کے سی سی آئی) کے صدر افتخار احمد شیخ نے وفاقی حکومت کی جانب سے صنعتوں کو موسم سرما میں اضافی کھپت پر سستی بجلی کی فراہمی پر آمادگی کا خیرمقدم کیا۔
افتخار شیخ نے روز دیا کہ کھپت کی بنیاد پر صنعتی بجلی ٹیرف کو حتمی شکل دینے کیلئے آن بورڈ لیا جائے اور کاروباری لاگت میں کمی کیلئے کراس سبسڈی فوری طور پر ختم کی جائے۔
ان کا کہنا تھا کہ وفاقی سیکریٹری نے اضافی کھپت کے لیے 7 ارب جاری کرنے کا وعدہ کیا تھا، 7ارب کےاجراکےمعاملےپرایک ماہ سے کوئی پیش رفت نہیں ہوئی اور کے الیکٹرک نے 7 ارب سےمتعلق کوئی ایڈجسٹمنٹ اب تک نہیں کی۔
صدر کے سی سی آئی نے وفاقی سیکرٹری وزارت توانائی راشد محمود لنگڑیال کے کراچی چیمبر کےدورے کے حوالے سے کہا کہ کے سی سی آئی نے 18 روپے فی کلو واٹ کی رعایتی بجلی ٹیرف پر اصرار کیا تھا لیکن کافی سوچ بچار کے بعد اصولی طور پر موسم سرما میں بڑھتی ہوئی کھپت پر 20 روپے فی کلو واٹ بجلی کے رعایتی ٹیرف پیش کرنے پر اتفاق کیا گیا۔
لاہور : لاہور ہائی کورٹ نے لاہور شہر میں نئے تعمیراتی منصوبے عدالت کی اجازت کے بغیر شروع کرنے سے روک دیااور اسموگ کے تدراک کیلئے موسم سرما کے دوران گاڑیوں اور موٹر سائیکل کی جگہ سائیکل استعمال کرنے کی تجویز دے دی۔
تفصیلات کے لاہور ہائی کورٹ کے جسٹس شاہد کریم نے شہری ہارون فاروق سمیت دیگر کی درخواستوں پر سماعت کی۔
فاضل جج نے حکم دیا کہ عدالتی اجازت کے بغیر کوٸی نیا منصوبہ شروع نہ کیا جاٸے جبکہ جاری منصوبوں میں سموگ اور ماحولیاتی آلودگی کا خیال رکھا جاٸے ۔
عدالت نے تجویز دی کہ سردیوں کے 4 ماہ میں سائیکل کرائے پر دینے کا سلسلہ شروع کیا جاٸے یا ابتداء میں مفت بھی سہولت دی جا سکتی ہے، ایسا پلان مصروف علاقے سے شروع کیا جا سکتا ہے۔
عدالت نے ریمارکس دیے کہ لندن میں سائیکل کرائے پر دینے کا کام شروع کیا گیا تھا، یورپ میں جج بھی ساٸکل آتے ہیں۔عدالت نے دس مرلہ کے مکان کے لیے واٹر ٹریٹمنٹ پلانٹ کی شرط عاٸد کرنے کی بھی ہدایت کی، عدالت نے قرار دیا کہ کہ پانی کا مسٸلہ سنگین صورتحال اختیار کر گیا ہے ۔
عدالت نے ایل ڈی اے کو حکم دیا کہ بابو صابو سگیاں پراجیکٹ پر کام شروع نہ کیا جائے، عدالتی استفسار پر سرکاری وکیل نے بتایا کہ شہر میں گلبرگ میں سنٹر پوائنٹ، سگیاں بابو صابو پراجیکٹ سمیت دیگر منصوبے شامل ہیں، ان میں ابھی بابو صابو سگیاں پراجیکٹ شروع بھی نہیں ہوا۔
سردیوں کے موسم میں بیماریوں سے محفوظ رہنے کے لیے مختلف طریقے اور غذائیں استعمال کی جاتی ہیں جس میں مختلف اقسام کے سوپ زیادہ اہمیت کے حامل ہیں۔
ویسے تو بازاروں میں ملنے والے سوپ پر اس لیے اعتبار نہیں کیا جاسکتا کیونکہ اس میں حفظان صحت کے اصولوں کا خیال نہیں رکھا جاتا، اس لیے لوگ گھر پر ہی سوپ بنانے کو ترجیح دیتے ہیں۔
جن میں سب سے اہم مرغی یا مچھلی سے تیار کیا جانے والا سوپ ہے، یہ سوپ ویسے تو ہر موسم میں بہترین غذا ہے لیکن خاص سردیوں کے موسم میں اس کا استعمال زکام سے بچاؤ میں بڑی مدد کرتا ہے
اے آر وائی نیوز کے پروگرام باخبر سویرا میں معروف خاتون شیف ثمرین جنید نے ناظرین کو مرغی اور مچھلی کے گوشت سے مزیدار سوپ بنانے کی تراکیب بتائیں۔
ان کا کہنا تھا کہ اگر چکن سوپ میں ابلی ہوئی سبزیاں بھی شامل کرلی جائیں (یعنی سادہ چکن سوپ کی جگہ چکن ویجی ٹیبل سوپ پیا جائے) تو اس کے مفید اثرات اور بھی نمایاں ہوجاتے ہیں۔
چکن آدھا کلو
گاجر ایک عدد ہری پیاز ایک عدد
لونگ 3سے 4 عدد
کالی مرچ 3سے 4عدد
کارن فلاور دو چمچ
انڈا ایک عدد
چکن کو ابالنے وقت اس کے اندر ایک عدد گاجر اور ہری پیاز کے ٹکڑے کاٹ کر ڈال دیں، اور اس کے ساتھ ہی لونگیں اور کالی مرچ بھی شامل کرکے ہلکی آنچ پر آدھا گھنٹہ ابالیں، اس کے بعد اس کو چھان کر چکن کو رکھ لیں اس یخنی کو چھ ماہ فریزر میں رکھ کر استعمال کیا جاسکتا ہے۔
مرغی کی یخنی کو گرم کریں اور ایک کپ پانی میں مکئی کا آٹا (کارن فلور) دو کھانے کے چمچ شامل کریں اور ساتھ ہی ایک عدد پھینٹا ہوا انڈا ڈال کر اسے اچھی طرح مکس کرتے ہوئے پکائیں اور بعد میں ابلی ہوئی چکن کے چھوٹے چھوٹے سے ٹکڑے بھی شامل کردیں۔ اب آپ کا مزیدار چکن سوپ تیار ہے۔
اسلام آباد : نگراں حکومت نے موسم سرما میں متوقع طور پر آنے والے گیس کے بحران سے نمٹنے کیلئے حکمت عملی تیار کرلی ہے۔
اس سلسلے میں نگران حکومت نے ماہ دسمبر میں ایل این جی سپلائی کیلئے ٹینڈر جاری کردیا، جسے پاکستان ایل این جی لمیٹڈ نے جاری کیا ہے۔
پی ایل ایل ذرائع کا کہنا ہے کہ عالمی کمپنیوں سے ایل این جی سپلائی کی بولیاں مانگی گئی ہیں دسمبر کیلئے2 ایل این جی کارگوز کیلئے بولیاں طلب کی گئیں۔
ذرائع کے مطابق 7سے 8دسمبر اور13سے 14دسمبر کی ڈلیوری کیلئے درخواستیں مانگی گئیں مذکورہ درخواستیں4 اکتوبر تک وصول کی جائیں گی،4اکتوبر کو ہی بولیوں کی درخواستیں کھول دی جائیں گی۔
کیو: یوکرین کے صدر وولودیمیر زیلنسکی کا کہنا ہے کہ عوام مشکل ترین موسم سرما گزارنے میں کامیاب رہی ہے، حکومت اگلے موسم کے لیے تیاری شروع کر چکی ہے۔
بین الاقوامی ویب سائٹ کے مطابق یوکرینی صدر وولودیمیر زیلنسکی نے کہا ہے کہ بنیادی ڈھانچے پر روسی حملوں کے دوران حکومت کی جانب سے توانائی اور گرمائش کو یقینی بنانے کی کوششوں کی وجہ سے ان کا ملک موسم سرما گزارنے میں کامیاب رہا ہے۔
زیلنسکی نے ایک وڈیو پیغام میں کہا کہ یہ موسم سرما ختم ہوگیا ہے، یہ بہت مشکل تھا، اور مبالغہ آرائی کے بغیر ہر یوکرینی نے اس مشکل کو محسوس کیا۔ لیکن پھر بھی ہم یوکرین کو توانائی اور گرمائش فراہم کرنے میں کامیاب رہے۔
ان کا کہنا تھا کہ انہوں نے ملک کے توانائی ڈھانچے کے استحکام پر ایک اجلاس منعقد کیا اور حکومت اگلے موسم کے لیے تیاری شروع کر چکی ہے۔
روس، یوکرین کے مشرقی علاقے دونباس کا مکمل کنٹرول حاصل کرنے کے لیے اپنے حملوں میں تیزی لا رہا ہے۔
یوکرین نے ان علاقوں کو دوبارہ لینے کے لیے موسم بہار کا ایک بڑا جوابی حملہ شروع کرنے کے منصوبوں کا اعلان کیا ہے جن پر روس نے قبضہ کرلیا ہے۔
یوکرین کی فوج کے خفیہ ادارے کے نائب سربراہ ویدائم اسکیبتسکی نے اتوار کے روز شائع ہوئے، جرمن ذرائع ابلاغ کو دیے گئے ایک انٹرویو میں کہا کہ جوابی حملے کا مقصد جنوب میں کریمیا اور مرکزی سرزمینِ روس کے درمیان روسی اگلے محاذ میں فوجی صف بندی کو آگے لے جانا ہے۔
حال ہی میں کئی گئی ایک تحقیق میں ماہرین کو علم ہوا کہ موسم سرما کے دوران ہمارے مختلف بیماریوں کا شکار ہوجانے کی اصل وجہ ہماری ناک کا دفاعی نظام متحرک ہونا ہے۔
جرنل آف الرجی اینڈ کلینکل امیونولوجی میں شائع ہونے والی حالیہ امریکی تحقیق میں موسم سرما کی بیماریوں کا ذمہ دار ہماری ناک کو ٹھہرایا گیا ہے۔
سائنسدانوں کے مطابق 5 سالہ تحقیق میں مشاہدہ کیا گیا ہے کہ ہماری ناک خود کار نظام کے تحت مختلف وائرس اور بیکٹیریاز کا مقابلہ کرنے کے لیے ہر وقت تیار رہتی ہے۔
یہی وجہ ہے کہ جب کبھی بدلتے موسم میں وبائی امراض اور بیکٹیریا حملہ آور ہوتے ہیں تو ہماری ناک کا خود کار دفاعی نظام متحرک ہوجاتا ہے اور ایک مائع سے بھرا غول جاری کرتا ہے، جس کا مقصد اس وائرس یا بیکٹیریا پر حملہ کرنا اور اسے بے اثر کرنا ہوتا ہے۔
ماہرین کے مطابق ہمارا جسم بالکل اسی طرح کام کرتا ہے جیسے کسی جنگ کی صورت میں ہم اپنا دفاع کرتے ہیں، ایسے ہی ہمارا جسم بھی بیکٹریا اور وائرس کے حملے کے نتیجے میں دفاع کرتا ہے۔
نئی تحقیق سے پتہ چلتا ہے کہ ہماری ناک بھی سانس کے ذریعے حملہ کرنے والے کسی بھی وائرس کے حملے کے نتیجے میں ہمارا دفاع کرنے کے لیے سب سے پہلے متحرک ہوجاتی ہے۔
ماہرین کے مطابق کسی بھی صحت مند انسان کی ناک کا درجہ حرارت تقریباً 23 ڈگری سینٹی گریڈ تک ہوتا ہے جبکہ سرد موسم میں یہ 9 ڈگری تک کم ہوسکتا ہے۔
ماہرین نے دوران تحقیق کم درجہ حرارت پر ناک کے دفاعی نظام کو جانچنے کے لیے لیبارٹری میں ناک کے خلیوں کے نمونوں کا ٹیسٹ کیا جس کے نتیجے میں معلوم ہوا کہ کم درجہ حرارت پر مدافعتی نظام کمزور پڑجاتا ہے، جس کی وجہ سے سردیوں میں ناک بہنے کا عمل تیز ہوجاتا ہے۔
ماہرین کے مطابق سردیوں میں ہماری ناک کا مضبوط اینٹی وائرل مدافعتی نظام کمزور ہوجاتا ہے۔