کوئٹہ: صوبہ بلوچستان میں سردی کی شدت میں اضافہ ہوگیا ہے، زیارت میں درجہ حرارت 5 اور قلات میں 4 ڈگری سینٹی گریڈ ریکارڈ کیا گیا۔
تفصیلات کے مطابق محکمہ موسمیات کا کہنا ہے کہ بلوچستان میں سردی کی شدت میں اضافہ ہوچکا ہے۔
محکمہ موسمیات کا کہنا ہے کہ بیشتر اضلاع میں موسم خشک رہے گا اور کسی علاقے میں بارش کا امکان نہیں۔
کوئٹہ میں آج زیادہ سے زیادہ درجہ حرارت 17 ڈگری سینٹی گریڈ ریکارڈ کیا گیا ہے، زیارت میں درجہ حرارت 5 اور قلات میں 4 ڈگری سینٹی گریڈ ریکارڈ کیا گیا۔
اسلام آباد: وزیر مملکت برائے پیٹرولیم مصدق ملک کا کہنا ہے کہ پچھلے سال کی نسبت اس سال گیس کی صورتحال بہتر ہوگی، لیکن ایسا بھی نہیں کہ سردیوں میں گیس کا کھلا کھاتہ ہوگا۔
تفصیلات کے مطابق وزیر مملکت برائے پیٹرولیم مصدق ملک کا کہنا ہے کہ جنوری کے لیے ایل این جی کے ایک اضافی کارگو کا بندوبست کر چکے ہیں۔
مصدق ملک کا کہنا ہے کہ اس سال فروری کے لیے 9 کارگوز دستیاب ہوں گے، اس کے باوجود بھی ہماری تگ و دو جاری ہے۔ پچھلے سال کی نسبت اس سال گیس کی صورتحال بہتر ہوگی۔
انہوں نے کہا کہ میں بالکل نہیں کہہ رہا کہ سردیوں میں گیس کا کھلا کھاتہ ہوگا، گیس کمپنیوں کو کہا گیا ہے کہ ایل پی جی گیس فراہمی کا بندوبست کریں، سوئِی ناردرن پنجاب اور پختونخواہ میں ایل پی جی سلنڈرز فراہم کرے گی۔
وزیر مملکت کا کہنا تھا کہ گیزرز اور بوائلرز سب سے زیادہ گیس استعمال کرتے ہیں، درخواست کروں گا کہ گیس کے استعمال میں کفایت شعاری کریں۔
مصدق ملک نے مزید کہا کہ پاکستان میں توانائی کا مستقبل کیا ہے، یہ وزیر اعظم بتائیں گے۔
اسلام آباد :وزیرمملکت پٹرولیم مصدق ملک نے خبردار کیا ہے کہ موسم سرما میں صارفین گیس لوڈشیڈنگ کے لئے تیار ہوجائیں۔
تفصیلات کے مطابق سینیٹ کی قائمہ کمیٹی برائےپٹرولیم کاسینٹیرعبدالقادرکی زیر صدارت اجلاس ہوا ، جس میں موسم سرمامیں گیس کی دستیابی کی صورتحال پر وزیرمملکت پٹرولیم مصدق ملک نے بریفنگ دی۔
وزیر مملکت پٹرولیم مصدق ملک نے خبردار کیا ہے کہ موسم سرما میں صارفین گیس لوڈشیڈنگ کے لئے تیار ہو جائیں۔
مصدق ملک نے بتایا کہ گزشتہ سال کےمقابلے جنوری،فروری میں20کروڑ مکعب فٹ ایل این جی اضافی ہوگی، چاہتے ہیں نجی شعبہ ایل این جی ٹرمینلز میں سرمایہ کاری کرے۔
وزیر مملکت پٹرولیم کا کہنا تھا کہ جنوری اور فروری میں ایل این جی کا ایک ایک کارگو اضافی ہو گا، ایک ایک کارگو اضافی ہونے کے باوجود موسم سرما گیس لوڈشیڈنگ کرنا پڑے گی۔
انھوں نے مزید کہا کہ جنوری میں ایل این جی کے 10 اور فروری میں ایل این جی کے 9 کارگو دستیاب ہوں گے۔
کیا آپ نے کبھی غور کیا ہے کہ اکثر اوقات موسم سرما میں ہمیں ایک عجیب سی اداسی اور مایوسی لاحق ہوجاتی ہے، ہمارا دل ہر کام سے اچاٹ ہوجاتا ہے حتیٰ کہ ہم اپنے پسندیدہ کاموں سے بھی بیزار اور لاتعلق ہوجاتے ہیں۔
گو کہ یہ علامات ڈپریشن اور اینگزائٹی کی ہیں جو سال میں بھی کسی بھی وقت ہم پر حملہ کرسکتی ہیں، تاہم موسم سرما میں ان علامات کا پہلے سے شکار افراد مزید مشکل سے دو چار ہوجاتے ہیں جبکہ پرامید اور خوش باش رہنے والے افراد بھی سردیوں میں اس سے متاثر دکھائی دیتے ہیں۔
طبی ماہرین کا کہنا ہے کہ یہ کیفیت حقیقی کیفیت ہے جسے سیزنل ایفیکٹو ڈس آرڈر یا سیڈ سنڈروم کا نام دیا جاتا ہے اور اس کا شکار ہوجانا معمول کی بات ہے کیونکہ یہ موسم کی وجہ سے ہوتا ہے۔
دراصل موسم ہمارے مزاج اور کیفیات پر اثر انداز ہوتا ہے اور یہ وہ پہلو ہے جسے ہم اکثر نظر انداز کردیتے ہیں۔
سردیوں میں ہونے والا اداسی کا یہ سنڈروم صرف موسم سرما میں ہی نہیں، بلکہ ابر آلود موسم اور بارش کے دنوں میں بھی لاحق ہوسکتا ہے اور انسان باقاعدہ طبی طور پر اداسی اور مایوسی محسوس کرتا ہے۔
اب تک کی جانے والی کئی تحقیقات سے یہ علم ہوچکا ہے کہ انسان کو جو چیزیں خوش رکھتی ہیں ان میں سے ایک عنصر سورج کی شعاعیں بھی ہیں، سورج کی روشنی سے حاصل ہونے والا وٹامن ڈی طبی طور پر ڈپریشن کی کیفیت کو کم کر کے موڈ کو بہتر کرتا ہے۔
علاوہ ازیں چمکتا ہوا سورج امید کا پیغام دیتا ہے جو خود بخود ہمارے اندر سے مایوسی اور ناامیدی کے جذبات کو کم کرتا ہے۔
موسم سرما میں ایسی کیفیات لاحق ہونے کی ایک اور وجہ سماجی سرگرمیوں میں کمی ہونا بھی ہے، موسم جتنا سرد ہو، لوگ اتنا ہی گھروں سے نکلنے یا ملنے جلنے سے پرہیز کرتے ہیں جس سے ہم ایک قسم کی تنہائی بھی محسوس کرتے ہیں۔
اسی اداسی سے تنگ آکر جب موسم سرما ختم ہوتا ہے اور بہار آتی ہے تو دنیا بھر میں لوگ بہار کا نہایت پرجوش استقبال کرتے ہیں اور اس موقع پر کوئی فیسٹیول منایا جاتا ہے۔
کئی عقائد میں موسم بہار کو سورج کی واپسی یا دوبارہ زندگی سے بھی تشبیہہ دی جاتی ہے جبکہ کئی ثقافتوں میں یہ نئے سال کا بھی آغاز ہوتا ہے۔
یہ موسم دراصل اس زندگی کے پھر سے بحال ہونے کا اشارہ ہوتا ہے جو سخت سردی میں ٹھٹھر کر منجمد ہوچکی ہوتی ہے، چنانچہ اس موسم کو خوشی منا کر تہواروں کے ذریعے خوش آمدید کہا جاتا ہے۔
میکسیکو میں موسم بہار کے آغاز میں ایک تہوار اسپرنگ ایکونوکس منایا جاتا ہے جس کی تاریخ قدیم مایا دور سے ملتی ہے، اس دن کو سورج کی واپسی سے تعبیر کیا جاتا ہے یعنی سردیوں کے طویل موسم کے بعد سورج کی واپسی۔
برصغیر میں بہار کے آغاز پر بسنت کا رنگوں بھرا تہوار منایا جاتا ہے، قدیم روایات کے مطابق موسم سرما میں سفید اور بے رنگی سے اکتائی آنکھوں کو بسنت میں مختلف رنگوں سے تقویت بخشی جاتی ہے۔
دنیا بھر کی ہندو برادری بھی انہی دنوں رنگوں سے بھرا ہولی کا تہوار مناتی ہے۔
لیکن سردیوں کی اداسی سے کیسے چھٹکارا پایا جائے؟
موسم سرما میں اداسی اور مایوسی کے غلبے سے چھٹکارا پانے کے لیے سب سے پہلے تو خود کو حرکت میں لانا ضروری ہے، باقاعدہ ورزشیں اس سلسلے میں معاون ہوسکتی ہیں۔
ان دنوں اگر آپ گھر پر زیادہ وقت گزار رہے ہیں تو گھر کے وہ ادھورے کام کر ڈالیں جو آپ وقت کی کمی کے سبب نہیں کر پاتے کیسے کوئی مرمتی کام یا صفائی ستھرائی۔
صبح اٹھ کر دروازے کھڑکیاں کھول دیں تاکہ سورج کی روشنی اندر آسکے۔
روزانہ دھوپ میں کچھ وقت ضرور گزاریں۔
سماجی سرگرمیوں میں اضافہ کریں، اگر سرد موسم کی وجہ سے آپ باہر نہیں جانا چاہتے تو دوستوں کے ساتھ مل کر گھر میں ہی گیٹ ٹوگیدر کا اہتمام کریں۔
اپنی غذا کا خاص خیال رکھیں، گرم اور صحت مند غذائیں کھائیں اور پانی کا استعمال بھی زیادہ سے زیادہ کریں تاکہ طبی و جسمانی طور پر آپ فٹ رہیں۔
اگر آپ ڈپریشن کی دوائیں استعمال کرتے ہیں تو اپنی نئی علامات ڈاکٹر کو ضرور بتائیں اور ان کے مشورے سے دوائیں تبدیل کریں۔
موسم سرما میں جلد کی خشکی عام مسئلہ بن جاتی ہے جو بعض اوقات شدید بھی ہوسکتی ہے، یہ خارش اور الرجی کا سبب بھی بنتی ہے۔
اکثر دھول مٹی جلد کی خشکی یا پھر کمبل وغیرہ سے الرجی کے باعث بھی خارش کا مسئلہ ہوتا ہے۔
لیکن اگر سرد اور خشک موسم میں خارش ایک بار شروع ہو جائے تو رکتی ہی نہیں ہے، تاہم کچھ گھریلو ٹوٹکوں سے آپ اس مسئلے سے چھٹکارا پاسکتے ہیں۔
ناریل کا تیل
ماہرین کے مطابق ناریل کا تیل خارش سے نجات دلانے میں اہم کردار ادا کرتا ہے، کیونکہ ناریل میں اینٹی بیکٹریل اور اینٹی الرجک خصوصیات موجود ہوتی ہیں۔
خارش کی صورت میں متاثرہ جگہ یا پھر پورے جسم پر ناریل کے تیل کی مالش کریں۔
پیٹرولیم جیلی
اگر آپ اپنی جلد کو چکنا رکھنا چاہتے ہیں تو اس کے لیے معیاری پیٹرولیم جیلی سے بہتر کچھ نہیں ہے، جب خارش ہو یا جلد خشک ہو تو پیٹرولیم جیلی لگائیں اس سے آرام آئے گا۔
امرت دھارا
امرت دھارا ایک طرح کی جڑی بوٹی ہے، سردیوں میں اگر کسی بھی چیز سے الرجی ہو جائے اور بے تحاشہ خارش ہو تو فوری ناریل کے تیل میں امرت دھارا ملائیں اور اسے اچھی طرح مکس کر کے خارش والے متاثرہ حصے پر لگائیں۔
اس سے فوری طور پر خارش دور ہو گی اور الرجی بھی ختم ہو جائے گی۔
نیم کے پتے
نیم میں قدرت نے بے شمار فوائد رکھے ہیں، اس کی اہم خصوصیات میں ایک یہ بھی ہے کہ اسے خارش اور الرجی سے نجات کے لیے بھی استعمال کیا جا سکتا ہے۔
نیم کو پتوں کو گرم پانی میں پکا کر اس پانی سے نہا لیں تو جسم سے تمام جراثیم اور خارش ختم ہو جائے گی۔
کراچی: معروف بیوٹی ایکسپرٹ کاشف سلیم نے موسم سرما میں دلہن بننے والی لڑکیوں کے لیے بالوں کو خوبصورت بنانے کی ٹپس بتائیں۔
تفصیلات کے مطابق اے آر وائی ڈیجیٹل کے مارننگ شو گڈ مارننگ پاکستان میں کاشیز سیلون کے بیوٹی ایکسپرٹ کاشف اسلم نے شرکت کی اور موسم سرما میں بالوں کو خوبصورت بنانے کی ٹپس بتائیں۔
کاشف نے بتایا کہ گھنگھریالے یا لہریے دار بالوں کو خوبصورت بنانے کے لیے مختلف ٹریٹ منٹس کروائی جاسکتی ہیں جن میں کیراٹین یا ری بونڈنگ وغیرہ شامل ہیں۔
پروگرام میں انہوں نے ہیئر ٹرانسفارمیشن نامی ایک ٹریٹ منٹ بھی کی، انہوں نے بتایا کہ اس ٹریٹ منٹ سے بال بلو ڈرائی کی طرح گھنے اور چمکدار لگتے ہیں اور بہترین لک آتا ہے۔
ٹریٹ منٹ کے بارے میں مزید جاننے کے لیے یہ ویڈیو دیکھیں۔
موسم سرما میں بالوں کا خشک اور خراب ہوجانا عام بات ہے تاہم کچھ طریقوں سے سردیوں میں بھی بالوں کو خوبصورت اور چمکدار رکھا جاسکتا ہے۔
اے آر وائی ڈیجیٹل کے مارننگ شو گڈ مارننگ پاکستان میں بیوٹی ایکسپرٹس نے سردیوں میں بالوں کو صحت مند رکھنے کے طریقے بتائے۔
کڑی پتہ، بادیان کے پھول، السی کے بیج، ادرک کا تیل اور اسپغول ملا کر پانی میں ابال لیں، یہ جیل سا بن جائے گا، اس میں 1 چمچ گاجر کا پیسٹ ملائیں اور سر میں لگا لیں۔
2 سے 3 گھنٹے بعد نارمل شیمپو سے دھو لیں۔
ڈاکٹر بتول نے بتایا کہ رات میں سوتے ہوئے بالوں کو باندھنا انہیں خراب ہونے سے بچاتا ہے، آپ کا تکیہ بھی سلک کا ہونا چاہیئے کیونکہ کاٹن بالوں کو نقصان پہنچاتا ہے اور بال پھٹنے لگتے ہیں۔
انہوں نے بتایا کہ نہانے سے قبل ہلدی، شہد اور کالی مرچ کا آمیزہ بنائیں اور بالوں پر لگائیں۔ یہ تمام اشیا بالوں کو نمی فراہم کریں گی اور انہیں نرم و ملائم بنائیں گی۔
موسم سرما میں خشکی سے ہونٹ پھٹ جاتے ہیں جو بعض اوقات تکلیف دہ صورت بھی اختیار کرلیتے ہیں، علاوہ ازیں ہارمونل تبدیلیوں، خون کی کمی یا سگریٹ نوشی کی وجہ ہونٹ کالے بھی پڑجاتے ہیں۔
ہونٹوں کی خشکی دور کرنے اور ان کا رنگ بحال کرنے کے لیے ذیل میں کچھ طریقے بتائے جارہے ہیں۔
ایک چمچ اصلی گھی میں 2 وٹامن ای کے کیپسول اور ایک چمچ گاجر کا تیل شامل کریں اور اسے دن میں دو سے 3 بار ہونٹوں پر لگائیں۔
دیسی گھی میں چٹکی بھر نمک (پنک سالٹ یا سادہ نمک) اور شہد ڈال کر ہونٹوں پر اس کا مساج بھی کیا جاسکتا ہے، اس سے ہونٹوں سے مردہ جلد بھی صاف ہوگی جبکہ ان کی ملائمت میں بھی اضافہ ہوگا۔
ہونٹوں کی رنگت بحال کرنے کے لیے ایک چمچ دودھ میں گلاب کی 3 سے 4 پتیاں اور انار کا ایک پھول شامل کریں، اس کا پیسٹ بنا لیں اور اسے اصلی گھی اور وٹامن ای کے کیپسول والے آمیزے میں شامل کر کے لگائیں۔
یہ تمام اشیا ہونٹوں کی خشکی دور کر کے انہیں نرم و ملائم بنائیں گی جبکہ ان کی گلابی رنگت بھی بحال ہوگی۔
موسم سرما میں جلد اور بالوں کی خشکی عام مسئلہ ہے جس کے لیے مختلف گھریلو ٹوٹکے اور بازاری پروڈکٹس استعمال کی جاتی ہیں۔
ایلوا ویرا ایک ایسی شے ہے جو ہر موسم میں بہترین نتائج دیتی ہے، یہ خشکی کے لیے بھی نہایت مؤثر ہے۔
بالوں اور جلد کی خشکی دور کرنے کے لیے ایلو ویرا کو مندرجہ ذیل طریقوں سے استعمال کیا جا سکتا ہے۔
بالوں کی خشکی کے لیے
ایلو ویرا کا گودا، کنڈیشنر، زیتون کا تیل اور کھوپرے کا تیل ملا کر گرینڈ کرلیں، اس آمیزے کو بالوں میں لگائیں اور ایک گھنٹے بعد سر دھو لیں۔ بال نہایت صاف ستھرے اور نرم ملائم ہوجائیں گے۔
جلد کے لیے
باقاعدگی سے ایلو ویرا چہرے پر لگانا جلد کو شفاف اور نرم کرتا ہے جبکہ جلد کو نمی بھی فراہم کرتا ہے۔ اگر ایلو ویرا کو چاول کے آٹے میں مکس کر کے لگایا جائے تو یہ جھائیوں، سیاہ حلقوں اور خشکی کا قدرتی علاج ہوگا۔
ہاتھ پاؤں کی خشکی
ہاتھ پاؤں کو نم رکھنے کے لیے ایلو ویرا کا پتہ شہد کے ساتھ پیس لیں اور اسے ہاتھ پاؤں کی خشک جلد پر لگائیں۔ پہلی ہی بار میں واضح فرق نظر آئے گا۔
موسم سرما میں جلد کی خشکی نہایت عام مسئلہ ہے جس کے لیے مختلف ٹوٹکے اور کریمز استعمال کیے جاتے ہیں، تاہم ان کے علاوہ بھی موسم سرما میں کچھ عادات اپنانے کی ضرورت ہے تاکہ جلد کی نمی بحال رہ سکے۔
ماہرین کا کہنا ہے کہ سرد موسم میں جلد زیادہ توجہ اور وقت مانگتی ہے۔ ایسے موسم میں جلد کے لیے بہترین موائسچرائزر، پانی کا زیادہ استعمال اور متوازن غذا لینی چاہیئے۔
اس کے علاوہ وہ عادات جو موسم سرما میں اپنائی جانی ضروری ہیں وہ کچھ یہ ہیں۔
گرم شاور سے پرہیز
موسم سرما میں غسل کے لیے گرم پانی کا استعمال کیا جاتا ہے لیکن یہ ہماری جلد کو خشک بنانے والی ایک بڑی وجہ ہے، خاص طور پر اگر کوئی شخص بہت زیادہ گرم پانی سے غسل کرے۔
ماہرین کے مطابق نہاتے ہوئے نیم گرم پانی استعمال کریں، نہانے کا وقت مختصر رکھیں تاکہ زیادہ دیر تک گرم پانی جلد پر نہ پڑے، اور گرم پانی سے نہانے کے فوراً بعد گھر سے باہر نکلنے سے گریز کریں۔
گرم پانی جلد کی نمی کو خشک کردیتا ہے اور اگر نہانے کے فوراً بعد باہر نکلا جائے گا تو گرد و غبار اور سرد ہوا جلد کو مزید نقصان پہنچا سکتی ہے۔
پھلوں کا استعمال
موسم سرما میں پھلوں کا استعمال بڑھا دیں تاکہ جسم میں نمی کی مقدار متوازن رہے، موسمی پھل نہ صرف جسم سے مضر اجزا کی مقدار خارج کرنے میں مدد دیتے ہیں بلکہ جلد کو شفاف اور چمکدار بھی بناتے ہیں۔
ایلو ویرا کا استعمال
ایلو ویرا ایسی چیز ہے جو ہر موسم میں انسانی جسم کے لیے بہترین ہے، یہ جلد اور بالوں کے لیے بہترین غذا ہے۔
موسم سرما میں رات کو سوتے ہوئے شہد میں ایلو ویرا شامل کر کے ہاتھوں اور چہرے پر لگا لیں اور صبح دھو لیں۔ چند ہی دن میں جلد نہایت نرم و ملائم اور چمکدار ہوجائے گی۔