اسلام آباد (17 اگست 2025): جڑواں شہروں میں صبح سویرے موسلادھار بارش ہوئی ہے، موسمیات کا کہنا ہے کہ آج سے مون سون کی شدت میں اضافے کا امکان ہے۔

تفصیلات کے مطابق راولپنڈی اور اسلام آباد میں صبح سویرے موسلادھار بارش شروع ہو گئی ہے، اور محکمہ موسمیات نے آج سے مون سون کی شدت میں اضافے کی پیشگوئی کی ہے۔

کشمیر، گلگت بلتستان اور خیبر پختونخوا میں آج سے منگل تک شدید بارشوں کا امکان ہے، پنجاب میں بھی گرج چمک کے ساتھ موسلادھار بارش متوقع ہے، سندھ اور بلوچستان کے مختلف اضلاع میں آج سے جمعرات تک موسلادھار بارش ہو سکتی ہے۔

شدید بارشوں کے باعث دریاؤں اور ندی نالوں میں طغیانی اور لینڈ سلائیڈنگ کا خدشہ ہے، سیاحوں کو پہاڑی علاقوں کا سفر مؤخر کرنے اور انتظامیہ کو الرٹ رہنے کی ہدایات جاری کی گئی ہیں۔

راولپنڈی، اسلام آباد اور گرد و نواح میں موسلادھار بارش سے نالہ لئی میں کٹاریاں کے مقام پر پانی کی سطح 10، گوالمنڈی میں 7 فٹ تک بلند ہو گئی ہے، ایم ڈی واسا سلیم اشرف کے مطابق موسم کی صورت حال میں نشیبی علاقوں اور نالہ لئی پر نظر رکھے ہوئے ہیں۔

ترجمان واسا کے مطابق محکمہ موسمیات کی پیش گوئی پر واسا راولپنڈی ہائی الرٹ ہے، اور عملہ و ہیوی مشینری نشیبی علاقوں میں تعینات ہے، بارشوں کے پیش نظر رین ایمرجنسی نافذ کی گئی ہے، جڑواں شہروں میں مجموعی طور 70 ملی میٹر سے زائد بارش ریکارڈ کی جا چکی ہے۔

لاہور : پنجاب ڈیزاسٹر مینجمنٹ اتھارٹی نے ملک بھر میں مون سون کا نیا اسپیل شروع ہونے کی پیش گوئی کرتے ہوئے الرٹ جاری کردیا۔

تفصیلات کے مطبق پنجاب ڈیزاسٹر مینجمنٹ اتھارٹی (پی ڈی ایم اے) نے 13 اگست سے ملک کے بالائی علاقوں میں مون سون کے نئے اسپیل اور دریائے ستلج و ملحقہ ندی نالوں میں پانی کے بہاؤ میں اضافے کے پیش نظر سیلاب کا الرٹ جاری کر دیا۔

پی ڈی ایم اے نے کہا کہ مون سون بارشوں اور بالائی آبی ذخائر سے پانی کے اخراج کے باعث دریائے ستلج میں پانی کی سطح بڑھنے کا خدشہ ہے، جبکہ گنڈا سنگھ کے مقام پر پانی کے بہاؤ میں نمایاں اضافہ متوقع ہے۔

ڈی جی عرفان علی کاٹھیا نے بتایا کہ گزشتہ ہفتے بھارتی ڈیمز میں پانی کی سطح میں غیر معمولی اضافہ ہوا ہے۔ دریائے ستلج پر قائم بھاکڑا ڈیم 61 فیصد، پونگ ڈیم 76 فیصد اور تھین ڈیم 64 فیصد تک بھر چکے ہیں۔

موسم کی متعلق خبریں

پی ڈی ایم اے نے پنجاب بھر کے کمشنرز اور ڈپٹی کمشنرز کو ہدایت کی ہے کہ وزیراعلیٰ پنجاب کی ہدایات کے مطابق تمام تر انتظامات پیشگی مکمل کیے جائیں۔

ریلیف کمشنر پنجاب نبیل جاوید نے تمام متعلقہ محکموں اور ایمرجنسی کنٹرول رومز کے عملے کو الرٹ رہنے کی ہدایت دی ہے۔

انہوں نے مزید کہا کہ دریاؤں کے پاٹ میں موجود مکانات اور مویشیوں کے بروقت انخلا کو یقینی بنایا جائے تاکہ ممکنہ نقصانات سے بچا جا سکے۔

اسلام آباد: ملک بھر میں شدید بارشوں سے سیلابی صورتحال کا الرٹ جاری کردیا، جس میں متعلقہ اداروں کو ہنگامی تیاری کی ہدایت کی گئی ہے۔

تفصیلات کے مطابق نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں شدید بارشوں کے پیش نظر سیلابی خطرات کا الرٹ جاری کر دیا ہے۔

نیشنل ایمرجنسی آپریشن سینٹر کی رپورٹ میں بتایا گیا ہے کہ گلگت بلتستان، کشمیر، خیبر پختونخوا اور پنجاب کے مختلف علاقوں میں آج شدید بارشیں متوقع ہیں جن سے ندی نالوں میں طغیانی اور لینڈ سلائیڈنگ کے خدشات بڑھ گئے ہیں۔

این ڈی ایم اے کا کہنا تھا کہ گلگت بلتستان کے اضلاع ہنزہ، گھانچے اور شگر میں شدید بارشوں کے باعث اچانک سیلابی صورتحال پیدا ہو سکتی ہے۔

اسی طرح آزاد کشمیر کے علاقوں وادی نیلم، مظفرآباد، راولا کوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور میں بھی سیلاب کا خطرہ ظاہر کیا گیا ہے۔

موسم کی متعلق خبریں

محکمۂ موسمیات کے مطابق دیر، سوات، مانسہرہ اور گلیات میں موسلادھار بارش سے ندی نالوں میں طغیانی کا خدشہ ہے جبکہ لاہور، گوجرانوالہ، سیالکوٹ، راولپنڈی، اسلام آباد، پشاور اور نوشہرہ میں تیز بارش کے باعث نشیبی علاقے زیرآب آ سکتے ہیں

این ڈی ایم اے نے تمام متعلقہ اداروں کو ہدایت کی ہے کہ وہ ممکنہ خطرات سے نمٹنے کے لیے پیشگی اقدامات اور مکمل تیاری یقینی بنائیں۔

نیشنل ایمرجنسی آپریشن سینٹر نے شہریوں کے لیے احتیاطی ہدایات جاری کرتے ہوئے کہا ہے کہ سیلاب سے متاثرہ علاقوں میں غیر ضروری سفر سے گریز کریں ، ندی نالوں، پلوں اور پانی میں ڈوبی سڑکوں سے گزرنے سے اجتناب کریں۔

این ڈی ایم اے کا کہنا ہے کہ صورتحال پر کڑی نظر رکھی جا رہی ہے اور کسی بھی ہنگامی صورت حال میں ریسکیو ادارے فوری کارروائی کے لیے الرٹ ہیں۔