اسلام آباد : ملک بھر میں آئندہ ہفتے سے مون سون بارشوں کا سلسلہ شروع ہوجائے گا جبکہ کراچی میں بارش ہونے کے امکانات 80 فیصد ہیں۔
تفصیلات کے مطابق محکمہ موسمیات نے پیشن گوئی کی ہے کہ اگلے ہفتے سے ملک بھر کے مختلف علاقوں پنجاب ، اسلام آباد ، خیبرپختونخوا، کشمیر ،زیریں سندھ اور مشرقی بلوچستان سمیت بیشتر حصوں مون سون بارشوں کا نیا سلسلہ شروع ہوجائے گا ۔
محکمہ موسمیات کی رپورٹ میں امکان ظاہر کیا گیا ہے کہ کراچی میں پیر اور منگل کو مون سون بارش متوقع ہے ، آئندہ 24 گھنٹوں ملک کے بیشتر علاقوں میں موسم گرم اور خشک رہے گا، تاہم میرپور خاص، حیدرآباد، قلات ،مکران ، بہاولپور ، ڈیرغازی خان اور سکھر ڈویژن کے مختلف مقامات پر گرج چمک کے ساتھ بارش متوقع ہے۔
گزشتہ 24 گھنٹوں میں ملک کے بیشتر حصوں میں موسم گرم اور خوشک رہا، دادو 46 ، تربت ، بھکر ، سبی 45، رحیم یار خان،اوکاڑہ ،بہاولنگر ،سکھر ، جیکب آباد ،شہید بے نظیر آباد ،اور روہڑی میں درجہ حرارت44 ڈگری سینٹی گریڈ ریکارڈ کیا گیا۔
